Mariko 6 - Bibliya Yera 1951 1967 (Burundi)

Yesu anēbagurwa n’abo mu ntāra y’i wabo

¹ Avayo, aja mu ntāra y’i wabo, abigishwa biwe baramukurikira.

² Isabato ishitse, aca yigishiriza mw isinagogi: benshi bamwumvise baratangara, bat’ Ivyo vyose uyu yabikūye hehe? Kandi n’ubgenge ki yahawe, n’ivyo bitangaza bingaho bikorwa n’amaboko yiwe n’ibiki?

³ Mbega si wa mubāji, mwene Mariya, mwene nyina wa Yakobo na Yose na Yuda na Simoni? Bashiki biwe na bo ntibari hano i wacu? Ivyiwe birabatsitaza.

⁴ Yesu arababgira, at’ Umuntu avugishwa n’Imana ntabura icubahiro, atari mu ntāra y’i wabo, no mu muryango w’i wabo, no mu nzu y’i wabo.

⁵ Maze ntiyashobora gukoreray’ igitangaza na kimwe, atar’ abarwaye bake yarambitsekw ibiganza, akabakiza.

⁶ Atangazwa n’ukutizera kwabo. Agendagenda mu mihana ihakikije, yigisha.

Yesu atuma intumwa cumi na zibiri kwigisha

⁷ Ahamagara bamwe cumi na babiri, atangura kubatuma babiri-babiri, abaha ububasha ku mpwemu zihumanye.

⁸ Ababuza ngo ntibagire ico bajana ku nzira, atar’ inkoni gusa, ati Ntimujane impamba cank’ isaho cank’ amahera mu mipfuko yanyu,

⁹ ariko mwambare inkweto, kandi ntimwambare amapfundo abiri.

¹⁰ Kand’ arababgira, at’ Inzu yose muzokwinjiramwo, abe ari yo mugumamwo, kugeza aho muzovira aho hantu.

¹¹ Ahantu hose aho bazokwanka kubākīra ntibabumve, mukivayo muze mukunkumure umukungugu wo mu birenge vyanyu, kibe ikimenyetso kibabere icabona.

¹² Baragenda, bigisha kw abantu bakwiye kwihana.

¹³ Basenda abadayimoni benshi, basīga amavuta abarwaye benshi, barakira.

Ingene Herode yishe Yohana Umubatizi

¹⁴ Umwami Herode aravyumva, kukw izina rya Yesu ryari ribaye rurangiranwa, aravuga, ati Yohana Umubatizi yāzutse mu bapfuye, ni co gituma ivyo bitangaza bikorera muri we.

¹⁵ Arikw abandi baravuga, bati Ni Eliya; abandi bati N’umuntu avugishwa n’Imana, nka ba bandi bāvugishwa na yo.

¹⁶ Ariko Herode avyumvise, aravuga, ati Yohana uwo naciye izosi ni we yazutse.

¹⁷ Kuko Herode ubgiwe ari we yari yatumye ngo bafate Yohana, aramuboha, amushira mw ibohero, kubga Herodiya muka Filipo mwene se, kuko Herode yamucikije.

¹⁸ Kandi Yohana yari yarabgiye Herode, ati N’ikizira k’ufise muka mwene so.

¹⁹ Ni co catumye Herodiya amugirira akazīka, agomba kumwica, ntiyaronka uburyo:

²⁰ kuko Herode yatinya Yohana, amuzi kw agororotse kand’ ar’ umuntu yera, aramurinda: iy’ amwumvise hose, ivyiwe vyaramuzazanira, yamara yanezererwa kumwumva.

²¹ Maz’ umusi uragera, uburyo buraboneka: war’ umusi wo kwibutsa ukuvuka kwa Herode; atumira abaganwa biwe, n’abakuru b’abagabisha b’abasoda, n’abapfasoni b’i Galilaya, ngo baze abatereke.

²² Umukobga wa Herodiya nyene arinjira aratamba, Herode n’abashitsi biwe baramushima. Umwami abgira uwo mukobga, ati Nsaba ico ugomba cose, ndakiguha.

²³ Aramurahira, at’ Ico unsaba cose ndakiguha, n’iyo coba igisate c’ubgami bganje.

²⁴ Arasohoka, abaza nyina, ati Nsabe iki? Aramwishura, ati Saba umutwe wa Yohana Umubatizi.

²⁵ Aca aza ah’ umwami ari n’ingoga, aramusaba, ati Ndagomba k’umpa nonaha umutwe wa Yohana Umubatizi ku mubehe.

²⁶ Umwami arababara cane, ariko kubga za ndahiro ziwe, no kubg’ abāsangira na we, bimunanira kuwumwima.

²⁷ Uwo mwanya umwami atuma umushibamyi, amubarira kuzana umutwe wa Yohana. Aragenda, amucira izosi mw ibohero,

²⁸ azana umutwe wiwe ku kibehe, awuha wa mwigeme, na we awuha nyina.

²⁹ Abigishwa biwe bavyumvise baraza, bajana ikiziga ciwe, bagihamba mu cobo.

Yesu ahāza abantu ibihumbi bitanu

³⁰ Nuko za ntumwa zikoranira aho Yesu ari, zimudondera ivyo zakoze vyose n’ivyo zigishije.

³¹ Arababgira, ati Ni muze mwebge mwenyene ahiherereye mu gahinga, muruhuke gatoya. Kuko hāri benshi banyurana, babura n’ingene botamira utwo kurya.

³² Bagenda mu bgato, baja ahantu h’agahinga kwiherērayo.

³³ Bababona bagenda, benshi barabamenya, bava mu bisagara vyose, barirukanga, bajana inkōkoro y’ikiyaga, babatangayo.

³⁴ Avuye mu bgato, abona ishengero ryinshi, rimutera akagongwe kuko bameze nk’intama zitagira umwungere: atangura kubigisha vyinshi.

³⁵ Umusi ukuze, abigishwa biwe baramwēgēra, bati Mbega hano hantu kw ari mu gahinga, umusi ukaba ukuze;

³⁶ basezere, baje mu misozi no mu mihana impande zose, kwirondereray’ ivyo kurya.

³⁷ Arabishura, ati Mube ari mwebge mubagaburira. Baramubaza, bati Tugende tugure imitsima y’idenariyo amajana abiri, tuyibahe ga barye?

³⁸ Na we arababaza, ati Mufise imitsima ingahe? Ni mugende muyirābe. Babimenye baramwishura, bati Ni dutanu, n’udufi tubiri.

³⁹ Ababarira ko bose bicara ku vyatsi bibisi bīcīye intēko.

⁴⁰ Bicara imirongo‐imirongo, hamwe ijana‐ijana, ahandi mirongwitanu‐mirongwitanu, bartyo bartyo.

⁴¹ Yābīra ya mitsima itanu na za fi zibiri, ararangamiza, arāba mw ijuru, arabihezagira, amanyagura iyo mitsima, ayiha abigishwa ngo bayishire imbere y’abantu, n’ifi zompi na zo arazibagaburira bose.

⁴² Bararya bose barahāga.

⁴³ Batororokanya utumanyagu tw’imitsima n’utw’ ifi, twuzura ibisimbo cumi na bibiri.

⁴⁴ Abāriye iyo mitsima bār’ abagabo ibihumbi bitanu.

Yesu agendesha amaguru hejuru ku kiyaga

⁴⁵ Uwo mwanya agōbēra abigishwa biwe ngo batambukire mu bgato, bitangire kujabuka hakurya i Betsayida, aheze gusezera rya shengero.

⁴⁶ Ahejeje gusezerana na bo avayo, adūga umusozi gusenga.

⁴⁷ Bgagorovye, bga bgato bushitse mw idamba, ariko we yar’ i musozi wenyene.

⁴⁸ Abonye ko batamijwe no gusōza, kuk’ umuyaga war’ ubaturutse imbere, ku muteramyi agira kane aza aho bari, agendesha amaguru hejuru ku kiyaga, yagira abarengane.

⁴⁹ Ariko babonye agendesha amaguru hejuru ku kiyaga, bagira ngo n’igihūme, batura ubuku.

⁵⁰ Bose baramubona, basimbga n’umutima. Arik’ uwo mwanya arabavugisha, ati Hūmura ni jewe, ni mureke gutinya.

⁵¹ Aratambuka, aja mu bgato bārimwo: umuyaga uraca. Barumirwa cane mu mitima yabo:

⁵² kuko batātahuye ivya ya mitsima, arikw imitima yabo yar’ ikomantaye.

Yesu akiza abarwaye benshi

⁵³ Bamaze kujabuka hakurya, bafata i musozi mu ntāra y’i Genesareti, bazirika ubgato ku nkombe.

⁵⁴ Bavuye mu bgato, abaho baca baramumenya.

⁵⁵ Birukanga impande zose mur’ ico gihugu cose, batangura guterura abarwaye mu nderuzo, babakwiragirana aho bamwumvise hose.

⁵⁶ Kand’ aho yaja, mu mihana canke mu bisagara canke mu misozi, bāshira abarwaye mu tuguriro, bakamwinginga ngo bamukore naho hoba ku buyonga bg’impuzu yiwe gusa; abamukozeko bose bagakira.