Mariko 16 - Bibliya Yera 1951 1967 (Burundi)

Umumarayika avuga yuko Yesu azutse

¹ Maz’ isabato ishize, Mariya Magadalene, na Mariya nyina wa Yakobo, na Salome bagura ibimota neza, ngo baje kubimusīga.

² Kandi mu mutwenzi ku wa mbere w’imisi ndwi barazinduka, bashika ku mva izuba rimennye ijuru.

³ Barabazanya, bati Ni nde adutembagariza ikibuye co ku munwa w’imva?

⁴ Maze bunamuye amaso babona ca kibuye catembagajwe cavuyeho, kandi cari kinini cane.

⁵ Maze binjiye mu mva, babona umusore yicaye mu ruhande rw’i buryo, yambaye imvune yera, barūmirwa cane.

⁶ Arababgira, ati Nta co mwumirwa: ndazi yuko murondera Yesu Umunyanazareti umwe yabambga: none yazutse, ntari hano: ehe, rāba aho bāri bamushize!

⁷ Ariko ni mugende mubgire abigishwa biwe na Petero, mut’ Arabītangira imbere kuja i Galilaya, iyo ni ho muzomubonera, nk’uko yababgiye.

⁸ Bava mu mva, barahunga, kuko bari bafashwe n’agatengo n’akumiza, maze ntibāgira ico babgira umuntu n’umwe, kuko batinye. [

Yesu yiyereka abigishwa bamwe

⁹ Yesu amaze kuzuka mu mutwenzi ku wa mbere w’imisi ndwi, abanza kwiyereka Mariya Magadalene, uwo yasenzemw’ abadayimoni ndwi.

¹⁰ Uwo aragenda, abibarira abābana na we, asanga bababaye barira.

¹¹ Na bo bumvise kw ari muzima, kandi ko yamwiboneye, ntibāvyemera.

¹² Hanyuma y’ivyo yiyereka babiri muri bo, afise iyindi shusho, bagenda baja mu misozi.

¹³ Na bo nyene baragenda, babibgira abasigaye, maze ntibābemerera na bo.

¹⁴ Hanyuma yiyereka bamwe cumi n’umwe, bicaye bariko bararya, abagaya ukutizera kwabo no gukomantara kw’imitima yabo, kuko batemereye abāmubonye, amaze kuzuka.

¹⁵ Arababarira, ati Mugende muje mu bihugu vyose, mubgire abāremwe bose ubutumwa bgiza.

¹⁶ Uwizera akabatizwa azokizwa, arik’ ūtizera azotsindwa n’urubanza.

¹⁷ Kand’ ibimenyetso bizokwama biboneka ku bizera n’ibi: bazosenda abadayimoni mw izina ryanje; bazovuga indimi nsha;

¹⁸ bazofata inzoka; ni banywa ikintu cica, nta co kizobagira na gatoya; bazorambika ibiganza ku barwaye, bakire.

Yesu adūzwa mw ijuru

¹⁹ Kand’ Umwami Yesu ahejeje kubibabarira, adūzwa mw ijuru, avyagira i buryo bg’Imana.

²⁰ Abo bavayo, bigisha hose, Umwami Yesu akorana na bo, ijambo ryiwe arishingishiriza intahe ibimenyetso birikurikira. Amen.]