Mariko 10 - Bibliya Yera 1951 1967 (Burundi)

Ukwahukana ntikubereye

¹ Arīkora avayo, aja mu gihugu c’i Yudaya no hakurya ya Yorodani, ishengero ryongera gukoranira kuri we, yongera kubigisha nk’uko yamenyereye.

² Abafarisayo baza kuri we, baramugeza, bati Mbega biremerwa k’umuntu yirukana umugore wiwe?

³ Na we arababaza, ati Mose yabagereye iki?

⁴ Baramwishura, bati Mose yemeye ko handikwa icete co kuvāvānura, akamwirukana.

⁵ Yesu arababgira, ati Gukomantara kw’imitima yanyu ni kwo kwamwandikishije ico cagezwe.

⁶ Arik’ uhereye kw itanguriro ry’ukuremwa, Imana yabaremye bar’ uburyo bubiri.

⁷ Ni co gituma umuntu azosiga se na nyina, akabana n’umugore wiwe akaramata,

⁸ bompi bakaba umubiri umwe. Bituma batakiri babiri, ariko baba babaye umubiri umwe.

⁹ Nukw ico Imana yamatanije umuntu ntaz’ akimature.

¹⁰ Yinjiye mu nzu abigishwa bongera kumubaza iryo jambo.

¹¹ Arababgira, at’ Umuntu wese yirukana umugore wiwe, akābīra uwundi, aba asambanye kand’ amuhemukiye.

¹² Kandi na we ubgiwe, ni yāhukana n’umugabo wiwe, akābīrwa n’uwundi, azoba asambanye.

Yesu ahezagira abana bato

¹³ Maze bamuzanira abana bato, ngw abakoreko: abigishwa barabakankamira.

¹⁴ Maze Yesu abibonye, araraka, arababarira, ati Ni mureke abana bato baze aho ndi, ntimubabuze: kuk’ ubgami bg’Imana ar’ ubg’ abameze bartyo.

¹⁵ Ndababgire ukuri, ūtazokwākīra ubgami bg’Imana nk’umwana muto, ntazobginjiramwo na gatoya.

¹⁶ Arabarera, arabahezagira, abarambitsekw ibiganza.

Umutunzi

¹⁷ Agisohoka ngw akomeze urugendo, haza umuntu kuri we yirukanga, aramupfukamira, aramubaza, ati Mwigisha mwiza, nkore iki, ngo nze ndagwe ubugingo budashira?

¹⁸ Yesu aramubaza, at’ Unyitira iki mwiza? Nta mwiza, atar’ umwe, ni we Mana.

¹⁹ K’uzi ivyagezwe, ngo Ntukice, ntugasambane, ntukibe, ntukāgirize abandi ibinyoma, ntukagunge, wubahe so na nyoko.

²⁰ Aramubgira, ati Mwigisha, ivyo vyose naravyitondeye, mpereye mu buto bganje.

²¹ Yesu amwitegereje aramukunda, aramubgira, at’ Uhajije kimwe: genda, ushōre ivy’ utunze vyose, ugabire aboro, ni ho uzogira itunga mw ijuru, utek’ uze, unkurikire.

²² Yumvise iryo jambo arijirwa, agenda ababaye, kuko yar’ afise itunga ryinshi.

²³ Yesu yeraguza amaso, abgira abigishwa biwe, at’ Erega biragoye kw aba vyinshi binjira mu bgami bg’Imana!

²⁴ Abigishwa batangazwa n’amajambo yiwe. Yesu yongera kubabgira, ati Bana banje, erega biragoye kw abizigiye ubutunzi binjira mu bgami bg’Imana!

²⁵ Icoroshe n’ingamiya guca mu zuru ry’urushinge biruta umutunzi ko yinjira mu bgami bg’Imana.

²⁶ Baratangara rwose, bati None rero, ni nde ashobora gukizwa?

²⁷ Yesu arabitegereza, arababgira, ati Kubg’ abantu ntigishoboka, ariko ku Mana s’uko, kuko vyose bishobokera Imana.

Inshumbushanyo z’ivyaretswe

²⁸ Maze Petero atangura kumubgira, ati Rāba, twebge twaretse vyose turagukurikira.

²⁹ Yesu arababgira, ati Ndababgire ukuri, Nta waretse inzu, canke bene nyina, canke bashiki biwe, canke nyina, canke se, cank’ abana, cank’ itongo, kubganje no kubg’ ubutumwa bgiza,

³⁰ atazobishumbushwa ijana mur’ iki gihe ca none, amazu, na bene nyina, na bashiki biwe, na ba nyina, n’abana, n’itongo, bisukiranijwe no guhamwa, kandi mu gihe kizoza azohabga ubugingo budashira.

³¹ Ariko benshi b’imbere bazoba ab’ inyuma, kand’ ab’ inyuma bazoba ab’ imbere.

Yesu avuga ivy’ urupfu rwiwe

³² Bāri mu nzira badūga i Yerusalemu. Yesu yar’ abagiye imbere, baratangara, abāmukurikira baratinya. Yongera kujana bamwe cumi na babiri bar’ ukwabo, atangura kubabarira ibigira bimubeko,

³³ at’ Ehe, turadūze i Yerusalemu, kand’ Umwana w’umuntu azoshirwa mu maboko y’abaherezi bakuru n’abanyabgenge b’ivyanditswe, bazomucira urubanza rwo gupfa, bamuhe abanyamahanga,

³⁴ bamushinyagurire, bamuvume amate, bamutonagure, bamwice, maz’ imisi itatu ishize azozuka.

Ubukuru bgo mu bgami bg’Imana

³⁵ Yakobo na Yohana bene Zebedayo baramwēgēra baramubgira, bati Mwigisha, turagomba k’uduha ico tugusaba cose.

³⁶ Arababaza, ati Mugomba ko mbaha iki?

³⁷ Baramwishura, bat’ Uduhe ngo tuze twicare, umwe i buryo bgawe uwundi i bumoso, mu bgiza bgawe.

³⁸ Maze Yesu arabishura, ati Ntimuzi ico musaba. Mwoshobora kunywera ku gikombe nnywerako, canke kubatizwa umubatizo mbatizwa jewe?

³⁹ Baramwishura, bati Turashobora. Yesu arababgira, at’ Igikombe nnywerako, muzokinywerako, kandi muzobatizwa umubatizo mbatizwa jewe.

⁴⁰ Ariko gutanga ivyicaro i buryo bganje cank’ i bumoso, s’ivyanje, shit’ abo vyateguriwe.

⁴¹ Bamwe cumi bavyumvise batangura kwitonganiriza ivya Yakobo na Yohana.

⁴² Yesu arabahamagara, arababgira, ati Murazi yukw abavugwa ko baganza amahanga bayatwaza amanyama, kandi n’abakuru bayo bayagirak’ ububasha.

⁴³ Ariko muri mwebge si ko biri. Yamar’ ūgomba kuba mukuru muri mwebge, az’ abe umukozi wanyu:

⁴⁴ kand’ ūgomba kuba uw’ imbere, az’ abe umuja wa mwese.

⁴⁵ Kuko na none Umwana w’umuntu atāzanywe no gukorerwa, atar’ ugukorera abandi, no gutanga ubugingo bgiwe kw incungu ya benshi.

Yesu ahumūra impumyi yitwa Barutimayo

⁴⁶ Nuko bashika i Yeriko: akivana i Yeriko n’abigishwa biwe n’ishengero ryinshi, mwene Timayo yitwa Barutimayo, umusēzi w’impumyi, yari yicaye i ruhande y’inzira.

⁴⁷ Yumvise kw ari Yesu Umunyanazareti atangura gutakamba, ati Yesu, mwana wa Dawidi, ngirira imbabazi.

⁴⁸ Abantu benshi baramuzibiranya ngw ahore: arikw arushiriza cane gutakamba, ati Mwana wa Dawidi, ngirira imbabazi.

⁴⁹ Yesu arahagarara, arababarira, ati Ni mumuhamagare. Bahamagara iyo mpumyi, barayibgira, bati Hūmura, va hasi, araguhamagaye.

⁵⁰ Na yo ita impuzu yayo, irabaduka, yēgēra Yesu.

⁵¹ Yesu arayibaza, at’ Ugomba ko ngukorera iki? Ino mpumyi iramwishura, iti Ndagomba guhumūka, Mwigisha.

⁵² Yesu arayibgira, ati Genda, ukwizera kwawe kuragukijije. Aca arahumūka, amukurikira ku nzira.