Luka 24 - Bibliya Yera 1951 1967 (Burundi)

Kuzuka kwa Yesu

¹ Ku wa mbere w’imisi ndwi kare mu mutwenzi baja kuri ya mva, bajanye vya bimota neza bāteguye.

² Basanga ikibuye gitembagajwe kivuye ku mva;

³ binjirayo ntibāsangamw’ ikiziga c’Umwami Yesu.

⁴ Ivyo bikibazazaniye, abagabo babiri bahagarara i ruhande yabo, bambaye impuzu zikayangana.

⁵ Bagitinye, bunamitse amaso hasi, barababaza, bati N’iki gitumye muronderera ūriho, ahantu h’abāpfūye?

⁶ Ntari hano, ariko yāzutse. Mwibuke uko yababgiye, akir’ i Galilaya,

⁷ at’ Umwana w’umuntu akwiye gushirwa mu maboko y’abanyavyaha, no kubambga, no kuzuka ku musi ugira gatatu.

⁸ Bibuka ya majambo yiwe,

⁹ bava mu mva, basubira inyuma, ivyo vyose babibarira bamwe cumi n’umwe n’abandi bose.

¹⁰ Abo bagore ni Mariya Magadalene na Yowana na Mariya nyina wa Yakobo: kandi n’abandi bagore bāri kumwe na bo, babarira intumwa ivyo.

¹¹ Ayo majambo ababera nk’umuyaga, ntibābemera.

¹² Ariko Petero ava hasi, yirukira ku mva, arunama, arungurukamwo, abona impuzu zera ziri zonyene: asubira i we, atangajwe n’ibibaye.

Yesu yiyerekera abigishwa babiri mu nzira ija Emawusi

¹³ Uwo musi nyene babiri muri bo bari mu nzira baja mu mihana ahītwa Emawusi, ni kure y’i Yerusalemu nk’urugendo rwa stadiyo mirongwitandatu,

¹⁴ bavugana ivyabaye vyose.

¹⁵ Bakivugana babazanya, Yesu ubgiwe arabēgēra, ajana na bo.

¹⁶ Arikw amaso yabo atabgamw’ uruhuni ngo ntibamumenye.

¹⁷ Arababaza, ati Mbeg’ ivyo mugenda murabazanya n’ibiki? Barahagarara, bijiriwe.

¹⁸ Umwe muri bo yitwa Kileyopa aramwishura, ati Mbega ni wewe gusa watse indāro i Yerusalemu, utazi ivyabayeyo mur’ iyi misi?

¹⁹ Arababaza, ati N’ibiki? Baramwishura, bati N’ivya Yesu Umunyanazareti, yar’ umuntu avugishwa n’Imana, akaba umunyabushobozi bginshi mu vyo yakora no mu vyo yavuga, imbere y’Imana n’imbere y’abantu bose:

²⁰ n’ivy’ ukw abaherezi bakuru n’abashingantahe bacu bāmutanze ngw acirwe urubanza rwo gupfa, bakamubamba.

²¹ Kandi twari twishimiye yukw ari we azocungura Abisirayeli. Kand’ ikigeretseko, uyu n’umusi ugira gatatu uhereye ah’ ivyo vyabereye.

²² Kandi n’abagore bo muri twebge badutangaje, bazindutse baja ku mva;

²³ babuze ikiziga ciwe, baraza batubarira yukw abamarayika babiyeretse bavuga yukw ariho.

²⁴ Kandi na bamwe mu bari kumwe natwe bagiye ku mva basanga ari ko biri, ukw abo bagore batubariye; ariko we ntibamubona.

²⁵ Arababgira, ati Yemwe mwa mburabgenge, imitima yanyu itevye cane kwizera ivyo abāvugishwa n’Imana bāvuze vyose!

²⁶ Mbega Kristo ntiyar’ akwiye kubabazwa artyo ngw abone kuja mu bgiza bgiwe?

²⁷ Atangurira kuri Mose no ku bāvugishwa n’Imana bose, abasobanurira mu vyanditswe vyose ivyanditswe kuri we.

²⁸ Bashitse hafi y’umuhana bajako, amera nk’ūgomba kuwurēngāna.

²⁹ Baramugōbēra, bati Gumana natwe, kuko bugira bgire kand’ umusi ukuze cane. Arinjira ngw agumane na bo.

³⁰ Yicaye ngw asangire na bo, yābīra umutsima, arawuhezagira, arawumanyagura, arawubaha.

³¹ Uruhuni rubava ku maso, baramumenya: maz’ arakamangana, ntibāba bakimubona.

³² Baravugana, bati Mbeg’ imitima yacu ko yarikw iragurugumba, aho yarikw aravugana natwe mu nzira, aduhishurira ivyanditswe!

³³ Ako kanya barīkora, basubira i Yerusalemu, basanga bamwe cumi n’umwe bakoranye, bo n’abāri kumwe na bo,

³⁴ kandi bavuga, bati N’ukuri Umwami Yesu yāzutse, kandi yabonywe na Simoni.

³⁵ Na bo babadondera vya bindi vyo mu nzira, kandi yuko bamumenyeshejwe n’uko yamanyaguye umutsima.

Yesu yiyereka abigishwa biwe

³⁶ Bariko baravuga ivyo, Yesu ubgiwe ahagarara hagati muri bo, arababgira, at’ Amahoro abe muri mwebge.

³⁷ Ariko bafatwa n’ubgoba bacika ivutu, bagira ngo n’umuzimu babonye.

³⁸ Arababaza, at’ Ikibahagaritse imitima n’iki? Kandi n’iki gitumye mubūranisha imitima?

³⁹ Ni murābe ibiganza vyanje n’ibirenge vyanje, mumenye kw ari jewe ubganje: ni munkorakore, murābe, kuk’ umuzimu utagira inyama n’amagufa, nk’ivyo mumbonana.

⁴⁰ Avuze ivyo, abereka ibiganza vyiwe n’ibirenge.

⁴¹ Akanyamuneza kakibabujije kuvyemera, bariko baratangara, arababaza, ati Har’ utwo kurya mufise hano?

⁴² Bamuha igihimba c’ifi yokeje,

⁴³ aracābīra, akirīra imbere yabo.

Yesu asezera abigishwa biwe, adūzwa mw ijuru

⁴⁴ Arababgira, at’ Aya n’amajambo yanje nababgira nkiri kumwe namwe, y’ingen’ ivyanditswe kuri jewe vyose mu vyagezwe vya Mose no mu majambo y’abāvugishwa n’Imana no muri Zaburi bikwiye gushika.

⁴⁵ Maz’ abungura ubgenge ngo batahure ivyanditswe.

⁴⁶ Arababgira, ati Ni ko vyanditswe yuko Kristo akwiye kubabazwa no kuzuka mu bāpfuye ku musi ugira gatatu,

⁴⁷ kandi yuk’ ukwihana no guharirwa ivyaha bikwiye kuvugwa mw izina ryiwe mu mahanga yose, uhereye i Yerusalemu.

⁴⁸ Namwe mur’ ivyabona vyo kuvuga ivyo.

⁴⁹ Umve, ngira mbarungikire ico Data yasezeranye; ariko mugume mu gisagara, kugeza aho muzokwambikirwa ubushobozi buvuye mw ijuru.

⁵⁰ Abavanaho, abashitsa aharābana n’i Betaniya, aterura amaboko, arabahezagira.

⁵¹ Akibahezagira, atandukanywa na bo, adūzwa mw ijuru.

⁵² Na bo baramusenga, basubira i Yerusalemu bafise akanyamuneza kenshi,

⁵³ bama mu rusengero ubudasība bashima Imana.