Luka 20 - Bibliya Yera 1951 1967 (Burundi)

Abaherezi bakuru babaza Yesu ububasha bgiwe

¹ Umusi ur’ izina, yigishiriza abantu mu rusengero, avuga ubutumwa bgiza, abaherezi bakuru n’abanyabgenge b’ivyanditswe bazanana kuri we n’abashingantahe:

² baramubaza, bati Tubgire, n’ububasha ki bugutera gukora ivyo, canke ni nde yaguhaye ubgo bubasha?

³ Arabishura, ati Nanje hinge ndababaze ijambo, mumbgire:

⁴ non’ ukubatiza kwa Yohana kwāturutse mw ijuru, canke se mu bantu?

⁵ Bībūranya muri bo, bati Ni twavuga tuti Ni mw ijuru; ahava atubaza, ati N’iki cababujije kumwemera?

⁶ Ariko ni twavuga tuti Ni mu bantu, abantu bose baradutera amabuye, kuko bemeye badakekeranya yuko Yohana yavugishwa n’Imana.

⁷ Bamwishura yuko batazi aho kwavuye.

⁸ Yesu arababgira, ati Nuko rero nanje simbabgira ububasha bunkoresha ivyo.

Umugani w’abarimyi b’abagarariji

⁹ Atangura gucira abantu uyu mugani, ati Hābaye umuntu yateye uruzabibu, arusigarana abarimyi, aja mu mahanga, amaray’ igihe kirekire.

¹⁰ Igihe c’iyera kigeze, atuma umukozi kuri ba barimyi, ngo bamwamurire inzabibu z’uruzabibu: abo barimyi baramushishagura, bamurungika gusa.

¹¹ Yongera gutuma uwundi mukozi; uwo na we baramushishagura, baramutetereza, bamurungika gusa.

¹² Atuma n’uwa gatatu; uwo na we baramukomeretsa, baramuhinda.

¹³ Nyen’ uruzabibu aribaza, ati Ngire nte? Ndatuma umwana wanje nkunda, kumbure bazomusonera.

¹⁴ Arikw abo barimyi bamubonye baja inama, bat’ Urya ni we samuragwa; tumwice, kugira ng’ umwandu uz’ ube uwacu.

¹⁵ Bamuhindira inyuma y’uruzabibu, baramwica. None nyen’ uruzabibu azobagira ate?

¹⁶ Azoza yice rubi abo barimyi, uruzabibu arusigarane abandi. Bavyumvise baravuga, bati Biragahera.

¹⁷ Arabitegereza, arababaza, ati None rer’ aya majambo yanditswe n’amaki, ngw Ibuye abubatsi bāgaye, Ni ryo ryahindutse irigumya imfuruka?

¹⁸ Ūzogwa kur’ iryo buye wese azovunagurika, arik’ uwo rizogwako wese rizomuvungura.

¹⁹ Abanyabgenge b’ivyanditswe bo n’abaherezi bakuru ako kanya barondera ingene bomushōrerakw amaboko, ariko batinya abantu: kuko bamenye yukw ari bo yaciyek’ uwo mugani.

Abafarisayo bamugezesha ivy’ ikori

²⁰ Baramugenza, batuma abo kumudaha bīgira intungane, ngo bakūre urwitwazo mu vyo avuga, bamushīre segaba nyen’ ububasha, ari we cēgēra ca Kayisari.

²¹ Baramubaza, bati Mwigisha, turazi yuk’ uvuga kandi wigisha neza, kandi k’udatinya ijunja ry’abantu, ariko ko wigisha inzira y’Imana vy’ukuri:

²² mbega biremerwa ko dutanga ikori rya Kayisari, canke ntivyemerwa?

²³ Maz’ amenya ubugunge bgabo, arababgira,

²⁴ ati Ni munyereke idenariyo; igishushanyo n’ivyanditswe kuri yo n’ivya nde? Bati N’ivya Kayisari.

²⁵ Arababarira, ati Nuko rer’ ivya Kayisari ni mubihe Kayisari, ivy’ Imana mubihe Imana.

²⁶ Ntibāshobora gukūra urwitwazo mur’ ayo majambo imbere y’abantu, batangazwa n’ivyo abishuye, barahora.

Yesu yishura Abasadukayo ivy’ ukuzuka

²⁷ Abasadukayo bamwe baza kuri we, ni bo bahakana yukw ata kuzuka kuriho, baramubaza,

²⁸ bati Mwigisha, Mose yatwandikiye yuko mwene nyina w’umuntu ni yapfa ar’ imponnyi, agasiga umugore, mwene nyina akwiye gucūra uwo mugore, ngw ahonore mwene nyina.

²⁹ Nuko rero hābaye abavukana ndwi: uwa mbere arongora umugore, apfa ar’ imponnyi:

³⁰ uwa kabiri aramucūra,

³¹ n’uwa gatatu nyene, nuko bose ukw ar’indwi baramucūra, bapfa badasize impfuvyi.

³² Hanyuma na wa mugore arapfa.

³³ None mw izuka azoba muka nde muri bo? Ko bāri bamufise bose ukw ar’indwi!

³⁴ Yesu arabishura, at’ Ab’ iyi si bararongora, kandi barashingirwa,

³⁵ arikw abemerewe gushika muri ya si yindi no kuzuka mu bapfuye ntibarongora kandi ntibashingirwa;

³⁶ kandi ntibaba bagishobora gupfa, kuko baringaniye n’abamarayika, kand’ ar’ abana b’Imana, kukw ar’ abana b’ukuzuka.

³⁷ Arikw abāpfuye ko bazuka na Mose yabimenyekanishije hamwe havuga ivy’ Igisaka c’amahwa, aho yita Uhoraho Imana ya Aburahamu n’Imana ya Isaka n’Imana ya Yakobo.

³⁸ Ereg’ Imana s’iy’ abāpfuye, ariko n’iy’ abariho: kuko kuri yo bose bariho.

³⁹ Bamwe mu banyabgenge b’ivyanditswe baramwishura, bati Mwigisha, uvuze neza.

⁴⁰ Ntibāba bacubahuka kumubaza irindi jambo.

Umwana wa Dawidi

⁴¹ Arababaza, ati Bavuga bate yuko Kristo ari mwene Dawidi?

⁴² Ko Dawidi ubgiwe avuga mu gitabo ca Zaburi, at’ Uhoraho yabariye Umwami wanje, At’ Icara i buryo bganje,

⁴³ Ushitse aho nzohindurira abansi bawe indava yo musi y’ibirenge vyawe.

⁴⁴ Dawidi ko yamwise Umwami, non’ ashobora ate kuba umwana wiwe?

Uburyarya bg’abanyabgenge b’ivyanditswe

⁴⁵ Maz’ abarira abigishwa biwe, abantu bose bumva,

⁴⁶ ati Mwirinde abanyabgenge b’ivyanditswe, bakunda kugenda bambaye imvune, bagakunda kugirwako bgakeye mu tuguriro, no kwicara ku ntebe z’icubahiro mu masinagogi, n’ivyicaro vyo haruguru aho batumiwe.

⁴⁷ Barya ingo z’abapfakazi, kandi basengesha menshi bahūmba; abo bazocirwa urubanza ruruta izindi.