Luka 19 - Bibliya Yera 1951 1967 (Burundi)

Zakayo

¹ Ashika i Yeriko, arikw arahaca.

² Hār’ umuntu yitwa Zakayo, yar’ umutozakori mukuru, kandi yar’ umutunzi.

³ Ageza kurāba Yesu, ngw amenye ukw asa, bimwankira kubg’ ishengero, kuko yari mugufi.

⁴ Arirukanga, aja imbere, yūrira igiti citwa umusukomora ngw amurābe, kuko yagira ace mur’ iyo nzira.

⁵ Yesu ahashitse, ararangamiza, aramubarira, ati Zakayo, ururuka vuba, kuk’ uyu musi nkwiye kurāra i wawe.

⁶ Yururuka vuba, amwākīrana akanyamuneza.

⁷ Babibonye, bose baridodomba, bati Ko yinjiye kurārira umuntu w’umunyavyaha!

⁸ Zakayo arahagarara, abgira Umwami Yesu, ati Rāba Mugenzi, umugabane w’itunga ryanje ngira ndawuhe aboro; kand’ umuntu wese nagunze ndabimurihe kane.

⁹ Yesu amuvugako, at’ Uyu musi agakiza gashitse mur’ iyi nzu, kuk’ uyu na we ar’ umwana wa Aburahamu.

¹⁰ Kand’ Umwana w’umuntu yazanywe no kurondera no gukiza icari cazimiye.

Umugani wa mina cumi

¹¹ Bakiriko barumva ivyo, avyongerak’ umugani, kuko yari hafi y’i Yerusalemu, kandi kuko biyumvira yuk’ ubgami bg’Imana bugira buboneke uwo mwanya;

¹² nukw aravuga, ati Hābaye umuganwa yagiye mu gihugu ca kure kwimikirwayo, ngw agaruke.

¹³ Ahamagara icumi bo mu bishikira biwe, abaha amahera cumi yitwa mina, arababarira, ati Muyacuruze, mugeze aho nzozira.

¹⁴ Arikw abantu biwe bāramwanka, bamukurikiza intumwa, bat’ Uyo ntitugomba kw atuganza.

¹⁵ Agarutse, amaze kwimikwa, ahamagaza ba bishikira yasigaranye ya mahera, ngw amenye inyungu umuntu wese yungutsemwo mu kuyacuruza.

¹⁶ Uwa mbere arengutse, aravuga, ati Mugenzi, mina yawe yungutsemw’ izindi mina cumi.

¹⁷ Aramubgira, ati Wagize neza, muntu wanje mwiza, ko wabaye umwizigirwa no kuri gito cane, n’ube umutware w’ibisagara cumi.

¹⁸ Uwa kabiri arengutse, aravuga, ati Mugenzi, mina yawe yungutsemw’ izindi mina zitanu.

¹⁹ Uwo na we aramubarira, ati Nawe twara ibisagara bitanu.

²⁰ Uwundi arengutse, aravuga, ati Mugenzi, ngiyi mina yawe, nabītse itekeye mu kiremo:

²¹ kuko nagutinye k’ur’ umuntu w’umuhambazi, uterura ivyo utāhateretse, wimbura ivyo utārimye.

²² Aramubgira, ati Ndagucira urubanza ku vyakuvuye mu kanwa, wa muntu wanje mubi we. Ko war’ uzi yuko nd’ umuntu w’umuhambazi, nterura ivyo ntāhateretse, nimbura ivyo ntārimye:

²³ none se n’iki cakubujije guha abacurūza amahera yanje, nanje nagaruka nkayakwaka n’inyungu yayo?

²⁴ Abarira abahagazeho, ati Ni mumwake ya mina, muyihe ūfise mina cumi.

²⁵ Baramubgira, bati Mugenzi, mbega kw afise icumi!

²⁶ Ndababgire, Ūfise wese azohabga, arik’ ūdafise azokwakwa n’ico yar’ afise.

²⁷ Arikw abo bansi banje batākunze ko mbaganza ni mubazane hano, mubīcire imbere yanje.

²⁸ Yesu ahejeje kuvuga ivyo, aja imbere, adūga aja i Yerusalemu.

Yesu ashika i Yerusalemu, ari ku nyana y’indogoba

²⁹ Ageze hafi y’i Betifage n’i Betaniya, ku musozi witwa Elayono, atuma babiri bo mu bigishwa,

³⁰ arababarira, ati Muje mur’ iriya mihana ir’ imbere yanyu, ni mwayishikamwo, murabona inyana y’indogoba iziritse, ata muntu yigeze kuyigenderako: muyiziture muyizane.

³¹ Kandi ni hāgira ūbabaza, ati N’iki gitumye muyizitura? mumwishure, muti Databuja ni we ayigomba.

³² Abātumwe baragenda, babisanga uko yabibabgiye.

³³ Bariko barazitura ya nyana y’indogoba, bene yo barababaza, bati Ko muzitura iyo nyana n’iki?

³⁴ Barabishura, bati Databuja ni we ayigomba.

³⁵ Bayizanira Yesu, bayishirakw impuzu zabo, bayiterekako Yesu.

³⁶ Arikw aragenda, basasa impuzu zabo mu nzira.

³⁷ Agira ashike, ageze ku kamanuko k’umusozi wa Elayono, ishengero ryose ry’abigishwa ritangura kunezerwa no guhimbaza Imana n’ijwi rirenga, bayishimira ibitangaza babonye vyose,

³⁸ bati Hashemezwe Umwami, aje mw izina ry’Uhoraho, Amahoro abe mw ijuru, Icubahiro kibe ahasumba ijuru.

³⁹ Abafarisayo bamwe bo mw ishengero baramubarira, bati Mwigisha, zibiza abigishwa bawe.

⁴⁰ Arabishura, ati Ndababgire, Aba ni bahora, amabuye arasemerera.

Yesu aririra Yerusalemu

⁴¹ Ashitse hafi, abona igisagara, arakiririra,

⁴² at’ Uyu musi iy’ umenya ivy’ amahoro! Ariko none bihishijwe amaso yawe.

⁴³ Kukw imisi izokuzako, ah’ abansi bawe bazokurundira ikirundo c’ivu kigukikije, na bo ubgabo bakagukikiza, bakakwugariza impande zose,

⁴⁴ bakagukekana n’abana bawe bo muri wewe; kandi ntibazogusigariza ibuye na rimwe rigeretse ku rindi, kuk’ utāmenye igihe wagendewemwo.

Yesu yirukana abahumanya urusengero

⁴⁵ Yinjira mu rusengero, atangura guhindira hanze abārudandarizamwo,

⁴⁶ arababgira, ati Vyanditswe, ngw Ingoro yanje izoba inzu yo gusengeramwo; ariko mwebge mwayihinduye nk’isenga ry’abambuzi.

⁴⁷ Kandi yigishiriza mu rusengero imisi yose. Arikw abaherezi bakuru n’abanyabgenge b’ivyanditswe n’abantu bakuru‐bakuru bo mur’ ubgo bgoko barondera ingene bomwica,

⁴⁸ babura uko bamugira; kukw abantu bose bāri bamumaseko, bamwumva.