Luka 17 - Bibliya Yera 1951 1967 (Burundi)

Ibitsitaza abantu

¹ Kand’ abgira abigishwa biwe, at’ Ibitsitaza abantu ntibizobura kuza, arik’ ūbizana azobona ibara.

² Ivyoba vyiza n’uko yohambīrirwa urusyo ruremereye kw izosi, agatererwa mu kiyaga, hakw atsitaza n’umwe mur’ aba bato.

³ Mwirinde; mugenzawe ni yakora icaha, umuhanūre; ni yihana, umuharire.

⁴ Kandi ni yakugirira nabi indwi ku musi umwe, agahindukira ibihetangabo ndwi, akubgira, ati Ndihannye; uz’ ubimuharire.

Ivyo kwizera

⁵ Kandi za ntumwa zibgira Umwami Yesu, ziti N’utwongere ukwizera.

⁶ Umwami arabishura, ati Namba mufise ukwizera kungana n’akabuto ka sinapi, mwobarira iki giti c’umusukamino, muti Randuka, ubadikwe mu kiyaga, kandi cobumvira.

⁷ Ariko ni nde muri mwebge afise umugurano amurimira cank’ amuragirira intama, iyo yinjiye avuye ku kivi canke kuragira, mbega yomubarira, ati Ngwino n’ingoga wicare urye?

⁸ Ariko ntiyomubarira, at’ Arura ivyo kurya vyanje, ukenyere, ungaburire, gushitsa aho mpereza kurya no kunywa, nawe hanyuma ubone kurya no kunywa?

⁹ Mbeg’ akengurukira uwo mugurano kuko yakoze ivyo yamugezeko?

¹⁰ Abe ari ko namwe mugira, ni mwaheza gukora ivyo mwagezweko vyose, muvuge, muti Tur’ abagurano b’imburakimazi, twakoze ivyo dukwiye gukora gusa.

Yesu akiza abanyamibembe cumi

¹¹ Maze bari mu nzira baja i Yerusalemu, aca hagati y’i Samariya n’i Galilaya.

¹² Ashitse mu mihana, asanganirwa n’abanyamibembe cumi, bahagarara kure,

¹³ baratabaza cane, bati Yesu, Mwigisha, tugirire imbabazi.

¹⁴ Ababonye arababgira, ati Ni mugende, mwiyereke abaherezi. Bariko baragenda barakira, barahumanuka.

¹⁵ Umwe muri bo, abonye akize, agaruka ahimbaza Imana n’ijwi rirenga;

¹⁶ yikubita imbere y’ibirenge vyiwe, aramushima: kand’ uwo yar’ Umusamariya.

¹⁷ Yesu arabaza, ati Ntibahumanutse bose ukw ar’ icumi? Abandi cenda bari hehe?

¹⁸ Nta bandi babonetse ngo bagaruke guhimbaza Imana, atar’ uyu munyamahanga?

¹⁹ Kand’ aramubarira, ati Va hasi, ugende; ukwizera kwawe kuragukijije.

Ibizoba mu gihe c’iherezo

²⁰ Abafarisayo bamubajije igihe ubgami bg’Imana buzozira, arabishura, at’ Ubgami bg’Imana ntibuzoza bgerekanwa,

²¹ kandi ntibazovuga, bat’ Ehe ngubu: canke bati Nguburiya; kuk’ ubgami bg’Imana buri muri mwebge.

²² Abgira abigishwa biwe, ati Hazoza imisi muzokwifurizamwo kubona umusi umwe musa w’Umwana w’umuntu, ntimuzowubona.

²³ Kandi bazobabgira, bat’ Ehe nguriya: canke bat’ Ehe nguyu. Ntimuze mujeyo, kandi ntimubakurikire.

²⁴ Kuko nk’uk’ umuravyo urabiriza mu ruhande rumwe rw’ijuru, ukarabagiranira mu rundi, uko ni k’Umwana w’umuntu azoba ku musi wiwe.

²⁵ Arikw akwiye kuzobanza kubabazwa uburyo bginshi no kwankwa n’ab’ iki gihe.

²⁶ Kand’ uko vyari biri mu misi ya Nowa, ni ko bizoba mu misi y’Umwana w’umuntu:

²⁷ bārarya, bāranywa, bārarongora, bārashingira, bageza kuri wa musi Nowa yinjiye muri bga bgato, umwuzure ukaza ukabahonnya bose.

²⁸ No mu misi ya Loti vyabaye birtyo: bārarya, bāranywa, bāradandaza, bāragura, bāratera, bārubaka;

²⁹ maz’ umusi Loti yaviriye i Sodomu, umuriro n’amazuku biratibuka bivuye mw ijuru, birabahonnya bose.

³⁰ Ni ko bizoba, umusi Umwana w’umuntu azoserukirako.

³¹ Uwo musi, ūzoba ari hejuru ku nzu, ibintu vyiwe biri mu nzu, ntaze yururutswe no kubisahura, n’ūri mu mirima n’uko, ntaz’ asubire inyuma.

³² Mwibuke muka Loti.

³³ Ūzogerageza gukiza ubugingo bgiwe azobubura; arik’ ūzoheba ubugingo bgiwe azoburokora.

³⁴ Ndababgire, Mur’ iryo joro abantu babiri bazoba ku buriri bumwe, umwe azojanwa, uwundi arekwe;

³⁵ ah’ abagore babiri bazoba bariko barasēra hamwe, umwe azojanwa, uwundi arekwe; [

³⁶ aho babiri bazoba mu mirima, umwe azojanwa, uwundi arekwe.]

³⁷ Baramubaza, bati Bizoba hehe ga Mushingantahe? Arabishura, at’ Ah’ umuvyimba uri hose, ni ho ibinyakabaka bizokoranira.