Luka 1 - Bibliya Yera 1951 1967 (Burundi)

Icatumye Luka yandika Ubutumwa Bgiza

¹ Abantu benshi bāgerageje kwandika amajambo adonda ivyābaye muri twebge,

² nk’uko twabirazwe n’abāhereye ubga mbere ar’ivyabona vyavyo n’abasuku b’ijambo ry’Imana.

³ Nuko nanje, mpejeje gukurikiranya vyose neza mpereye ku vya mbere, nabonye kw ari vyiza kubikwandikira uko bikurikirana, wewe Teyofilo umwubahwa,

⁴ kugira ng’ umenye neza yukw amajambo wigishijwe ar’ ay’ ukuri adakekeranywa.

Umumarayika abgira Zakariya yukw azovyara Yohana

⁵ Ku ngoma ya Herode, umwami w’i Yudaya, hārih’ umuherezi yitwa Zakariya, wo mu mutigiri wa Abiya, kandi yar’ afise umugore wo mu nzu ya Aroni, yitwa Elisabeti.

⁶ Bompi bāgororoka imbere y’Imana, bāgendera mu vyagezwe n’amabgirizwa vy’Umwami Imana vyose, batagawa.

⁷ Ariko ntibagira umwana, kuko Elisabeti yar’ ingumba, kandi bompi bāri bageze mu zabukuru.

⁸ Maze yarikw arakora igikorwa c’ubuherezi imbere y’Imana, ukw imbu zabo zikurikirana;

⁹ kandi nk’uk’ umugenzo w’abaherezi war’ uri, ni we yari yatoranijwe n’ubupfindo kwinjira ahēra h’urusengero rw’Umwami Imana, kwosa imibavu:

¹⁰ kand’ ishengero ryose ry’ubgo bgoko ryariko rirasengera hanze mu gihe co kwosa.

¹¹ Maz’ umumarayika w’Umwami Imana aramwiyereka, ahagaze i buryo bg’igicaniro boserezakw imibavu.

¹² Zakariya amubonye ahagarika umutima, aterwa n’ubgoba.

¹³ Umumarayika aramubgira, ati Nta co utinya, Zakariya, kukw ivyo wasavye vyumviswe, umugore wawe Elisabeti azokuvyarira umuhungu, uz’ umwite Yohana:

¹⁴ uzonezerwa, uzohimbarwa, kandi benshi bazonezererwa ukuvuka kwiwe;

¹⁵ kukw azoba mukuru mu nyonga z’Umwami Imana; ntazonywa vino cank’ ikiboreza na kimwe; azokwuzuzwa Mpwemu Yera, ahereye ku kuva mu nda ya nyina,

¹⁶ kand’ azosanganya benshi bo mu Bisirayeli n’Umwami Imana yabo.

¹⁷ Azoyiza imbere ari n’umutima wa Eliya n’ubushobozi bgiwe, ngw asanganye imitima ya ba se n’iy’ abana, n’intabarirwa azisubize ku bgenge bg’abagororotsi, ategurire Umwami Imana ubgoko burorane.

¹⁸ Zakariya abaza umumarayika, at’ Ivyo nzovyerekwa n’iki, ko nd’umutāma, n’umugore wanje akaba ageze mu zabukuru?

¹⁹ Umumarayika aramwishura, ati Ndi Gaburiyeli, nama mpagaze mu nyonga z’Imana, kandi natumwe kubonana nawe no kukubgira ubgo butumwa bgiza.

²⁰ Umve, uragobga ururimi, kandi ntuzoshobora kuvuga, kugeza ku musi ivyo bizoberako, kuk’ utemeye ijambo ryanje, rizoshika mu gihe caryo.

²¹ Abantu bāri barorereye Zakariya batangazwa n’ukw atevye ahēra h’urusengero.

²² Maz’ asohotse ntiyagira ico ashobora kuvugana na bo, bamenya yuko har’ ico yerekewe ahēra h’urusengero: arabagereraniriza, agumya kuba ikiragi.

²³ Maz’ imisi yo gusasa kwiwe ishize, asubira i we.

²⁴ Iyo misi ishize, umugore wiwe Elisabeti asama inda, atinya abantu amezi atanu,

²⁵ at’ Uku ni k’Umwami Imana inkoreye mu misi yandābiyemwo kunteturura mu bantu.

Gaburiyeli abgira Mariya yukw azovyara Yesu

²⁶ Kandi mu kwezi kwa gatandatu, umumarayika Gaburiyeli atumwa n’Imana mu gisagara c’i Galilaya citwa Nazareti,

²⁷ ku nkumi ikowe n’umugabo yitwa Yosefu, wo mu nzu ya Dawidi, izina ry’iyo nkumi ni Mariya.

²⁸ Yinjira ah’ ari, aramubgira, ati N’amahoro, ugiriwe ubuntu, Umwami Imana ari kumwe nawe.

²⁹ Ariko we ahagarika umutima cane w’iryo jambo, yibaza iyo ndamukanyo iy’ ari yo.

³⁰ Umumarayika aramubgira, ati Nta co utinya, Mariya, kuk’ ugiriwe ubuntu n’Imana.

³¹ Umve, uzosama inda, uvyare umuhungu, kand’ uz’ umwite YESU.

³² Azoba mukuru, azokwitwa Umwana w’Īsumba vyose, kand’ Umwami Imana azomuha intebe y’ubgami ya sekuruza Dawidi,

³³ ahangame mu nzu ya Yakobo ibihe bidashira; ubgami bgiwe ntibuzogira iherezo.

³⁴ Mariya abaza umumarayika, at’ Ivyo bizobaho bite, ko ntaramenya icitwa umugabo?

³⁵ Umumarayika aramwishura, ati Mpwemu Yera azokuzako, ubushobozi bg’Īsumba vyose buzogutera igitūtu: ni co gituma uwera azovuka azokwitwa Umwana w’Imana.

³⁶ Kand’ umve, Elisabeti mwene wanyu na we atwaye inda y’umuhungu mu butāmakazi bgiwe, uwitwa ingumba uku n’ukwezi kwiwe kwa gatandatu:

³⁷ kukw ata jambo rivuye ku Mana ribura ububasha.

³⁸ Mariya aramubgira, at’ Ehe nd’ umugurano w’Umwami Imana, bimbere ukw ijambo ryawe rivuzwe. Maz’ umumarayika ava ah’ ari, aragenda.

Mariya agendera Elisabeti, ashima Imana

³⁹ Mur’ iyo misi Mariya arikora, agenda yihuta, aja mu mugamba mu gisagara c’i Yudaya,

⁴⁰ yinjira mu nzu kwa Zakariya, aramukanya na Elisabeti.

⁴¹ Maze Elisabeti yumvise indamukanyo ya Mariya, inda ikinagira muri we, Elisabeti yuzuzwa Mpwemu Yera,

⁴² avuga n’ijwi rirenga, ati Mu bagore urahiriwe, n’imbuto yo mu nda yawe irahiriwe.

⁴³ Kand’ iki kimbereyekw iki, nyina w’Umwami wanje kuza aho ndi?

⁴⁴ Kukw ijwi ry’indamukanyo yawe ryinjiye mu matwi yanje, inda igakinagizwa muri jewe n’umunezero.

⁴⁵ Kandi hahirwa wewe wizeye, kukw ivyo wabgiwe n’Umwami Imana bizoshika.

⁴⁶ Mariya aravuga, at’ Ubugingo bganje butazira Umwami Imana,

⁴⁷ Umutima wanje unezererewe Imana Umukiza wanje:

⁴⁸ Kuko yabonye ubufafara bg’umugurano wayo, Kand’ uhereye none, ab’ ibihe vyose bazonyita umuhirwa.

⁴⁹ Kukw Iy’ ubushobozi inkoreye ibikomeye, Kand’ izina ryayo n’iryera.

⁵⁰ Imbabazi zayo ziri ku bayubaha ku buzukuru no ku buzukuruza‐kuruza babo:

⁵¹ Yerekanishije ubushobozi ukuboko kwayo, Yasābagije abībona mu vyo biyumvira mu mitima yabo.

⁵² Yirukanye abaganza ku ntebe zabo, Yashize hejuru abafafara.

⁵³ Abashonje yabahāgije ivyiza, Yirukanye abatunzi bagenda imvumure.

⁵⁴ Yatabaye Isirayeli umusavyi wayo, Maze ngw imbabazi zayo izibuke,

⁵⁵ Nk’uko yabgiye ba sogokuruza, Kuzigirira Aburahamu n’uruvyaro rwiwe, ibihe bidashira.

⁵⁶ Kandi Mariya amarana na we amezi nk’atatu, asubira i wabo.

Ukuvuka kwa Yohana Umubatizi

⁵⁷ Igihe co kuvyara kwa Elisabeti kirashika, avyara umuhungu.

⁵⁸ Ababanyi biwe n’incuti ziwe bumva yuk’ Umwami Imana yamugiriye imbabazi nyinshi, banezeranwa na we.

⁵⁹ Ku musi ugira umunani baza gukeba uwo mwana, bagomba kumwitiranya na se Zakariya.

⁶⁰ Nyina arababgira, at’ Oya, ni yitwe Yohana.

⁶¹ Baramubgira, bati Mu muryango wanyu kw ata witwa iryo zina.

⁶² Bagereraniriza se, bamubaza ukw agomba ko yitwa.

⁶³ Yaka ico kwandikako, arandika, at’ Izina ryiwe ni Yohana.

⁶⁴ Bose baratangara. Uwo mwanya akanwa kiwe karazibūka, n’ururimi rwiwe ruragobodoka, aravuga, ashima Imana.

⁶⁵ Ababanyi babo bose baterwa n’ubgoba: ayo majambo yose akwira mu mugamba wose w’i Yudaya.

⁶⁶ Abavyumvise bose babishira mu mitima yabo, bati Mbe non’ uyo mwana azoba umuntu ki? Kuk’ ukuboko kw’Umwami Imana kwari kumwe na we.

Zakariya ashima Imana

⁶⁷ Se Zakariya yuzuzwa Mpwemu Yera, avugishwa n’Imana,

⁶⁸ at’ Umwami ashimwe, Imana y’Abisirayeli, Kukw igendeye abantu bayo, ikabacungura;

⁶⁹ Kand’ iduhagurukirije ihembe ry’agakiza Mu nzu ya Dawidi umusavyi wayo,

⁷⁰ Nk’uko yavugiye mu kanwa k’abera yavugisha, bāhereye mbere na mbere,

⁷¹ Ngw idukize abansi bacu n’amaboko y’abatwanka bose:

⁷² Kand’ igirire ba sogokuruza imbabazi, Yibuke isezerano ryayo ryera,

⁷³ Indahiro yarahiye sogokuruza Aburahamu,

⁷⁴ Kw izoduha gukizwa amaboko y’abansi bacu, Tukayisenga ata bgoba,

⁷⁵ Tur’ abera tugororoka mu nyonga zayo imisi yacu yose.

⁷⁶ Kandi nawe, mwana, uzokwitwa umuntu avugishwa n’Īsumba vyose, Kuk’ uzokwītangira imbere y’Umwami Imana gutegūra inzira ziwe:

⁷⁷ Kumenyesha abantu biwe agakiza, Kw ar’ uguharirwa ivyaha vyabo,

⁷⁸ Kubg’ umutima w’imbabazi w’Imana yacu, Ni wo uzotuma umutwenzi utugendera, uvuye mw ijuru,

⁷⁹ Ng’utambikire abicaye mu mwiza no mu gitūtu c’urupfu, Urōngōrere ibirenge vyacu mu nzira y’amahoro.

⁸⁰ Nya mwana arakura, agwiza inkomezi z’umutima, aba mu bugaragwa kugeza umusi yerekewekw Abisirayeli.