Kuvayo 6 - Bibliya Yera 1951 1967 (Burundi)

Imana yongera kwibarira Mose

¹ Uhoraho abarira Mose, at’ Uhereye none uzorāba ivyo nzogirira Farawo: ukuboko kw’ ubushobozi kuzomugondōza, abarekure, mber’ ukuboko kw’ubushobozi kuzomugondōza, abirukane mu gihugu ciwe.

² Imana ibarira Mose, iti Nd’ UHORAHO;

³ kandi niyeretse Aburahamu, na Isaka, na Yakobo, ko nd’ Imana Ishobora vyose, ariko sinabīmenyesha mur’ iryo zina ryanje UHORAHO.

⁴ Kandi nakomeje isezerano ryanje na bo, ko nzobaha igihugu c’i Kanani, igihugu bābayemw’ ar’ inyambukīra.

⁵ Kandi numvise amaborogo y’Abisirayeli, Abanyegiputa bazigiye mu buja; nibuka isezerano ryanje.

⁶ Nuko barira Abisirayeli yuko nd’ Uhoraho, kandi nzobakūra ku bikebere Abanyegiputa babakebera, mbakūre mu buja barimwo, mbacunguze ukuboko kuramvuye, n’ibihano bikomeye:

⁷ kandi nzobagira abantu banje, nanje nzoba Imana yanyu; ni ho muzomenya ko nd’ Uhoraho Imana yanyu, ibakūye ku bikebere Abanyegiputa babakebera.

⁸ Kandi nzobajana mu gihugu narahiye mmanitse ukuboko ko nemeye kuzogiha Aburahamu na Isaka na Yakobo; nzokibaha kibe ishamvu yanyu; nd’ Uhoraho.

⁹ Mose abibarira Abisirayeli nk’uko nyene; ariko ntibāmwumvira kubg’ ubgihebe bgo mu mitima, no kubg’ ubuja bārimwo bg’agahahazo.

¹⁰ Uhoraho abarira Mose,

¹¹ ati Genda kwa Farawo umwami wa Egiputa, umubarire arekure Abisirayeli bave mu gihugu ciwe.

¹² Mose arishura ar’ imbere y’ Uhoraho, ati Rāba, Abisirayeli ntibanyumviye, none Farawo yonyumvira ate, kand’ iminwa yanje ihumanye?

¹³ Arik’ Uhoraho abarira Mose na Aroni, abatuma ku Bisirayeli no kuri Farawo umwami wa Egiputa, ngo bakūre Abisirayeli mu gihugu ca Egiputa.

Amamo ya Mose na Aroni

¹⁴ Aba ni bo bakuru b’amazu ya ba sekuruza. Bene Reyubeni imfura ya Isirayeli ni Henoki na Palu na Hesironi na Karumi: abo ni bo mazu ya Reyubeni.

¹⁵ Bene Simeyoni ni Yemuweli na Yamini na Ohadi na Yakini na Sohari, bo na Sauli umwana yavyaye ku Munyakananikazi: abo ni bo mazu ya Simeyoni.

¹⁶ Aya ni yo mazina ya bene Lewi, nk’ uko bagiye bavyarana: bene Lewi ni Gerushoni na Kohati na Merari; imyaka Lewi yamaze n’ijana na mirongwitatu n’indwi.

¹⁷ Bene Gerushoni ni Libuni na Shimeyi, nk’ukw amazu yabo ari.

¹⁸ Bene Kohati ni Amuramu na Isihari na Heburoni na Uziyeli: imyaka Kohati yamaze n’ijana na mirongwitatu n’itatu.

¹⁹ Bene Merari ni Mahili na Mushi; abo ni bo mazu y’Abalewi, nk’uko bagiye bavyarana.

²⁰ Amuramu arongora Yokebedi inasenge: bavyarana Aroni na Mose; imyaka Amuramu yamaze n’ijana na mirongwitatu n’indwi.

²¹ Bene Isihari ni Kora na Nefegi na Zikiri.

²² Bene Uziyeli ni Mishayeli na Elisafani na Sitiri.

²³ Aroni arongora Elisheba, umukobga wa Aminadabu, mushiki wa Nahashoni; bavyarana Nadabu na Abihu na Eleyazari na Itamari.

²⁴ Bene Kora ni Asiri na Elikana na Abiyasafu; abo ni bo mazu y’ Abakora.

²⁵ Eleyazari mwene Aroni arongora umwe mu bakobga ba Putiyeli; bavyarana Finehasi. Abo ni bo bakuru b’amazu ya ba sekuruza b’Abalewi, nk’ukw inzu zabo ziri.

²⁶ Abo ni bo ba bandi Aroni na Mose, Uhoraho yabariye, ati Ni mukūre Abisirayeli mu gihugu ca Egiputa, mubakurikiranye mu mice yabo.

²⁷ Mose na Aroni abo, ni bo bavuganye na Farawo umwami wa Egiputa ivy’ ugukūra Abisirayeli muri Egiputa.

²⁸ Ku musi Uhoraho yabaririye Mose mu gihugu ca Egiputa,

²⁹ yaramubariye, ati Nd’ Uhoraho: bgira Farawo umwami wa Egiputa ico nkubarira cose.

³⁰ Ariko Mose yishura ar’ imbere y’Uhoraho, ati Rāba, iminwa yanje imeze nk’umubiri utākebge: none Farawo yonyumvira ate?