Kuvayo 40 - Bibliya Yera 1951 1967 (Burundi)

Uhoraho abarira Mose gushinga iryo hema

¹ Uhoraho abarira Mose,

² ati Ku musi wa mbere w’ukwezi kwa mbere uz’ ushinge iryo hema, ari ryo hema ry’ibonaniro.

³ Uheze ushiremwo ya sandugu y’ Ibishinga intahe, uyikingirize ca gihuzu.

⁴ Maze winjizemwo ya meza, uyaterekekw ibintu vyayo, ubiroranye; winjize na ca gitereko c’amatara, ugishirekw amatara yaco;

⁵ na ca gicaniro c’izahabu co kwoserezakw imibavu uz’ ugitereke hino ya ya sandugu y’Ibishinga intahe, ukinge ca gihuzu ku muryango w’iryo hema.

⁶ Uheze ushire ca gicaniro co kwoserezakw ibimazi imbere y’ umuryango w’iryo hema, ari ryo hema ry’ibonaniro.

⁷ Maz’ utereke ca kigārigāri co gukaraba hagati y’ihema ry’ibonaniro n’ico gicaniro, ugisukemw’ amazi.

⁸ Uheze ushireh’ urugo rukikuza impande zose, umanike n’impuzu yo gukinga mw irembo ryarwo.

⁹ Uheze wābire ya mavuta yo kurobanuza abahabga ibango, uyarobanuze iryo hema n’ibirimwo vyose, uryezanye n’ibintu vyaryo vyose: nuko rizoba ribaye iryera.

¹⁰ Uyarobanuze n’igicaniro co kwoserezakw ibimazi, n’ibintu vyaco vyose, uceze: nuko kizoba kibaye icera cane.

¹¹ Uyarobanuze n’ikigārigāri bo n’intebe yaco, uceze.

¹² Uheze uzane Aroni n’abana biwe ku muryango w’iryo hema ry’ibonaniro, ubuhagire.

¹³ Wambike Aroni ya myambaro yejejwe, umurobanuze ayo mavuta, umweze, kugira ngw ankorere igikorwa c’ubuherezi.

¹⁴ Uheze uzane n’abana biwe, ubambike ya makanzo.

¹⁵ Ubarobanuze amavuta, nk’uk’ uyarobanuje se, kugira ngo bankorere igikorwa c’ubuherezi: ukwo kurobanurwa kwabo kuzoba kubahaye ubuherezi bg’intahava ukw ibihe vy’urunganwe rwabo bizogenda bikurikirana.

¹⁶ Nuko Mose abigenza artyo: uk’ Uhoraho yamubariye kwose, ni ko yabikoze.

Mose ashinga ihema, arobanura Aroni

¹⁷ Nuko mu kwezi kwa mbere kwo mu mwaka ugira kabiri, ku musi wakwo wa mbere, iryo hema ry’ imbere rirashingwa.

¹⁸ Mose ararishinga, ashirah’ ibitereko vyaryo, ashingamw’ imbaho zaryo, azisobekamw’ ibiti vyazo vy’ intumba, ashinga inkingi zaryo.

¹⁹ Araheza arirenzako rya hema ryo hejuru, iryo hema na ryo arirenzakw ikindi hejuru, nk’uk’ Uhoraho yari yaramubariye.

²⁰ Yābīra vya Bishinga intahe, abishira muri ya sandugu, ayisobekakw iminiho yayo, arumika wa mutemere wo guhongerako kur’ iyo sandugu hejuru:

²¹ yinjiza iyo sandugu mw ihema, amanika ca gihuzu co gukingīra Ahēra cane, gikingīra iyo sandugu y’Ibishinga intahe, nk’uk’ Uhoraho yari yaramubariye.

²² Ashira ya meza mur’ iryo hema ry’ibonaniro, ayaherereza ku ruhande rw’i burārūko rw’iryo hema, hino y’ico gihuzu.

²³ Ayaterekako ya mitsima imbere y’Uhoraho, nk’uk Uhoraho yari yaramubariye.

²⁴ Ashira na ca giterekwakw amatara mur’ iryo hema ry’ibonaniro, aharābana n’ ayo meza, ku ruhande rw’i bumanuko rw’iryo hema.

²⁵ Agishirakw amatara imbere y’ Uhoraho, nk’uk’ Uhoraho yari yaramubariye.

²⁶ Ashira na ca gicaniro c’izahabu mur’ iryo hema ry’ibonaniro, hino ya ca gihuzu,

²⁷ acoserezakw imibavu y’ibintu bimoga, nk’uk’ Uhoraho yari yaramubariye.

²⁸ Akinga ca gihuzu ku muryango w’iryo hema.

²⁹ Ashira ca gicaniro co kwoserezakw ibimazi imbere y’umuryango w’iryo hema, ari ryo hema ry’ibonaniro, agitangirakw ikimazi, aracosa, agitangirako n’ishikanwa ry’ ifu, nk’uk’ Uhoraho yari yaramubariye.

³⁰ Atereka ca kigārigāri hagati y’ihema ry’ibonaniro n’ico gicaniro, agisukamw’ amazi yo gukaraba,

³¹ Mose ubgiwe na Aroni n’abana biwe barayakaraba, bayoga n’ibirenge;

³² iyo bagiye kwinjira mw ihema ry’ ibonaniro, n’iyo bagiye kwēgēra ico gicaniro, bārakaraba, bakoga ibirenge, nk’uk’ Uhoraho yari yarabariye Mose.

³³ Araheza ashirah’ urugo rukīkūza iryo hema n’igicaniro impande zose, ashiraho n’impuzu yo gukinga mw irembo ryarwo. Uko ni ko Mose yarangije ico gikorwa.

Ubgiza bg’Uhoraho bguzura mur’ iryo hema

³⁴ Maze ca gicu gipfuka ihema ry’ibonaniro, ubgiza bg’Uhoraho bguzura mw ihema ry’imbere.

³⁵ Mose ntiyashobora kwinjira mur’ iryo hema ry’ibonaniro, kukw ico gicu cari kuri ryo, n’ubgiza bg’Uhoraho bguzuye mur’ iryo hema ry’imbere.

³⁶ Kandi mu rugendo rwabo rwose, iy’ ico gicu kivuye kur’ iryo hema kigasubira hejuru, Abisirayeli bāca bafata inzira;

³⁷ arikw iy’ ico gicu kidasubiye hejuru, ntibāgenda, gushitsa ku musi gisubiye hejuru.

³⁸ Kukw ico gicu c’Uhoraho ku murango caba kur’ iryo hema, mw ijoro kikākamw’ umuriro, imbere y’ab’ inzu ya Isirayeli bose, mu rugendo rwabo rwose.