Kuvayo 35 - Bibliya Yera 1951 1967 (Burundi)

Amashikanwa y’ivyo gukoresha Ihema ry’Imana

¹ Mose akoranya ikoraniro ryose ry’Abisirayeli, arababgira, at’ Ibi ni vyo Uhoraho yageze ko mukora:

² mu misi itandatu abe ari ho ibikorwa bikorerwa, arik’ ūgira indwi uz’ ubabere uwera, ube isabato yo kuruhūka bihebuje yerejwe Uhoraho; ūzogira igikorwa na kimwe awukorako, aze yicwe.

³ Ntimuze mugeze umuriro mu mazu yanyu yose ku musi w’isabato.

⁴ Mose abarira ikoraniro ryose ry’Abisirayeli, at’ Ibi ni vyo Uhoraho yageze,

⁵ ngo Mukoranye amashikanwa yo kumushikanira, mukūye ku vyanyu: umuntu wese yumva bivuye ku mutima, abe ari we azana ishikanwa ryo gushikanira Uhoraho; ayo mashikanwa n’aya: amazahabu n’ amafeza n’imiringa,

⁶ n’inyuzi z’ amasufe n’iz’ amashigisha n’izisa n’agahama n’izera derere, n’ubushenza bg’impene;

⁷ n’insāto z’ impfizi z’intama zazizwe mu gahama, n’insāto z’ibikōko vyitwa tahashi, n’imbaho z’ibiti vyitwa imishita;

⁸ n’amavuta y’amatara, n’ibintu bimoga vyo kuvanga n’ amavuta yo kurobanuza abahabga ibango, n’ibindi vyo kwosa bitāmirana;

⁹ n’utubuyenge twitwa shohamu, n’utundi tubuyenge two gutēra ku mwambaro witwa efodi no ku mwambaro wo mu gikiriza.

¹⁰ Kand’ umuntu wese w’umuhinga wo muri mwebge n’aze, akore ivyo Uhoraho yageze vyose, ni vyo ibi:

¹¹ iryo hema ry’ imbere, n’ihema ryo hejuru yaryo, n’ivyo kurenza hejuru y’iryo hema; n’uturinda twaryo, n’imbaho zaryo, n’ibiti vyaryo vy’intumba, n’inkingi zaryo, n’ibitereko vyo kurokezamw’ imbaho n’inkingi;

¹² na ya sandugu n’iminiho yayo, na wa mutemere wo guhongerako, n’igihuzu co gukīngīra Ahēra cane;

¹³ n’ ameza n’iminiho yayo n’ibintu vyayo vyose, n’imitsima y’ibiterekerwa;

¹⁴ n’igitereko c’amatara yo kubonesha, n’ibintu vyaco, n’ amatara yaco, n’amavuta yo gutuma yaka;

¹⁵ n’igicaniro co kwoserezakw imibavu, n’iminiho yaco; n’amavuta yo kurobanuza abahabga ibango, n’imibavu itāmirana; n’igihuzu co gukinga mu rwinjiriro rw’umuryango w’iryo hema:

¹⁶ n’igicaniro co kwoserezakw ibimazi, n’ikintu caco c’ insobane gicuzwe mu miringa, n’iminiho yaco, n’ibintu vyaco vyose; n’ikigārigāri n’intebe yaco;

¹⁷ n’impuzu zo kubamba ngo zibe urugo, n’ibirimbi vyo kuzimanikako, n’ibitereko vyavyo vyo kubinegamwo, n’impuzu yo gukinga mw irembo ry’urwo rugo;

¹⁸ n’imambo z’iryo hema, n’iz’ urugo, n’imigozi yazo;

¹⁹ n’ imyambaro ijishitse yo kwambara mu gukora Ahēra, ni yo myambaro yejejwe yo kwambara Aroni umuherezi, n’iy’ abana biwe, yo gukoramw’ igikorwa c’ubuherezi.

²⁰ Nukw ikoraniro ryose ry’ Abisirayeli baragenda, bava imbere ya Mose.

²¹ Maze baraza, umuntu wese asunitswe n’umutima wiwe, n’umuntu wese atanze bivuye ku mutima, bazana amashikanwa bashikanira Uhoraho, yo gukoresha rya hema ry’ibonaniro, n’ ayo gukoresha ibikorwa vyaryo vyose n’ayo gukoramwo ya myambaro yejejwe.

²² Haza abemeye gutanga bose bivuye ku mutima, abagabo n’abagore, bazana impeta zo mu mazuru n’izo mu matwi, n’izo bādomesha ibimenyetso, n’inyerere, vyose ar’ utugenegene dukozwe mw izahabu; umuntu wese yar’ afise icitwa izahabu yakizana kugishikanira Uhoraho.

²³ Kandi bose abari bafise inyuzi z’amasufe n’iz’ amashigisha n’izisa n’agahama, n’ izera derere, n’ubushenza bg’ impene, n’insāto z’impfizi z’intama zazizwe mu gahama, n’insāto z’ibikōko vyitwa tahashi, umuntu wese arabizana.

²⁴ Umuntu wese yar’ afise ico ashikana c’ifeza cank’ ic’ umuringa, arakizana agishikanira Uhoraho; kand’ umuntu wese yar’ afise imbaho z’igiti c’ umushita zogira ico zimara kur’ ico gikorwa, arazizana.

²⁵ Abagore bose b’abahinga na bo bahingiranya inyuzi, bazana izo bahinze, iz’ amasufe n’iz’ amashigisha n’izisa n’agahama n’izera derere.

²⁶ Kand’ abagore bose bāsunitswe n’imitima gukoresha ubuhinga bgabo, bāhingiranya ubushenza bg’impene.

²⁷ Abakuru na bo bazana utubuyenge twitwa shohamu, n’utundi tubuyenge two gutēra ku mwambaro witwa efodi no ku mwambaro wo mu gikiriza;

²⁸ bazana n’ibintu bimoga n’amavuta vyo gukoreshwa mu matara no mu vyo kurobanuza abahabga ibango, no mu vyo kwosa bitāmirana.

²⁹ Nukw abagabo n’abagore bose b’Abisirayeli bemejwe n’imitima yabo kugira ico bazana cose co gukoresha igikorwa Uhoraho yabariye Mose gukora, babizanakw amashikanwa avuye ku mitima ikunze, babishikanira Uhoraho.

³⁰ Mose abarira Abisirayeli, at’ Ehe rāba, Uhoraho yahamagaye mw izina Besaleli mwene Uri, Uri mwene Huri, wo mu muryango wa Yuda;

³¹ kandi yamwujuje impwemu y’Imana, kugira ngw agire ubgenge no gutahura no kumenya n’ubuhinga bg’uburyo bgose,

³² mu vyo kwigenera ibikorwa vy’ubuhanga, no mu vyo gucura izahabu n’ifeza n’imiringa,

³³ no mu vyo gukeba utubuyenge two kurumikwa mw izahabu, no mu bubāji, no mu vy’ ubuhinga bg’uburyo bgose bg’ ubgenge.

³⁴ Kandi yashize mu mutima wiwe kwigisha abandi, bo na Oholiyabu mwene Ahisamaki, wo mu muryango wa Dani.

³⁵ Abo yabujuje ubgenge mu mitima yabo, bgo gukora ibikorwa vy’ ubuhinga vy’uburyo bgose, bg’ umuntu azi guca amagarwe ku tubuyenge n’ubg’ ubuhinga bgo kujisha, n’ubg’ ubuhinga bgo kujererenga amabara y’inyuzi z’ amasufe n’iz’ amashigisha n’izisa n’agahama n’izera derere, n’ubgo kujisha impuzu, mbere n’ubg’ abakora ibikorwa vyose vy’ubuhinga, n’ubg’ abigenera ibikorwa vy’ubuhanga.