Kuvayo 30 - Bibliya Yera 1951 1967 (Burundi)

Ivy’ igicaniro co kwoserezakw imibavu

¹ Kand’ uz’ ubāze igicaniro co kwoserezakw imibavu: ukibāze mu giti citwa umushita.

² Uburebure bgaco bube itambge rimwe ry’ukuboko uciriye mu nkokora, ubgaguke bube itambge rimwe nyene; kize kingane impande zose; uburebure bgaco bg’ igihagararo buze bube amatambge abiri; amahembe yaco az’ abāzirwe kuri co, abe kimwe na co.

³ Kand’ uz’ ucomekekw izahabu iramuye, hejuru kuri co, no mu mbavu zaco impande zose, no ku mahembe yaco; kand’ uz’ ugikīkūzek’ umuguno w’izahabu impande zose.

⁴ Musi y’uwo muguno waco, ahahera mu mbavu zaco zompi, uz’ ugicurire ibigombo bibiri‐bibiri vy’ izahabu; mu mpande zaco zompi abe ari ho ubitera, bibe ivyo kwinjizamw’ iminiho yo kukirerura.

⁵ Kand’ iyo miniho uz’ uyibāze mu giti c’ umushita, uyomekekw izahabu.

⁶ Kand’ uz’ ugishire hino ya ca gihuzu kir’ ahahera kw isandugu y’Ibishinga intahe, hino ya wa mutemere wo guhongerako, upfutse ivyo Bishinga intahe, aho nzohora mbonanira nawe.

⁷ Aroni az’ ahore acoserezakw imibavu y’ibintu bimoga: az’ ayose uko bukeye mu gitondo, agiye gutunganya ya matara.

⁸ No ku mugoroba, Aroni ukw agiye kudomeka ayo matara, az’ ayose: ibe imibavu yo kwoswa y’intahava imbere yanje, ukw ibihe vy’urunganwe rwanyu bizogenda bikurikirana.

⁹ Ntimuze mucoserezekw imibavu itemewe, canke ngo mucoserezekw ikimazi, canke ngo mugishirekw ishikanwa ry’ifu, canke ngo mukivyagizekw ishikanwa ry’ibiturire.

¹⁰ Aroni az’ ahongere ico gicaniro rimwe gusa mu mwaka; amaraso y’ikimazi c’impongano gitangirwa ivyaha az’ ayakoze ku mahembe yaco, abe ari yo akibera impongano rimwe gusa mu mwaka, ukw ibihe vy’urunganwe rwanyu bizogenda bikurikirana: ico gicaniro kizoba icera cane, cerejwe jewe Uhoraho.

Ivy’ ukwicungura kw’abaharūwe

¹¹ Uhoraho abarira Mose,

¹² ati Ni waharūra igitigiri c’Abisirayeli, abaharūwe uko bangana, umuntu wese muri bo az’ ampe incungu y’ubugingo bgiwe mu gihe ubaharūra, kugira ngw ikīza ntikibatēre igihe ubaharūra.

¹³ Iyi abe ari yo ncungu batanga, umuntu wese ukw arēngāna ashirwa mu gitigiri c’abaharūwe, atange ikigabane ca shekeli yagezwe kuri shekeli ir’ Ahēra: shekeli imwe irimwo gera mirongwibiri; ikigabane ca shekeli kize kibe ari co banshikanira.

¹⁴ Umuntu wese arēngāna agashirwa mu gitigiri c’abaharūwe, amaze imyaka mirongwibiri cank’ isāga, az’ anshikanire iryo shikanwa.

¹⁵ Abatunzi ntibarenze aho, n’aboro ntibagabanye, kur’ ico kigabane ca shekeli, ni banshikanira iryo shikanwa ryo kuba impongano y’ ubugingo bgabo.

¹⁶ Nuk’ uze wake Abisirayeli ayo mahera y’ impongano, uyakoreshe ibikorwa vy’ihema ry’ibonaniro, abere Abisirayeli icibutso kizotuma mpora mbibuka, abe impongano y’ubugingo bgabo.

Ivy’ ikigārigāri c’umuringa

¹⁷ Uhoraho abarira Mose,

¹⁸ at’ Uz’ ucure ikigārigāri mu miringa co gukaraba, kigire n’intebe y’ umuringa nyene; uz’ ugishire hagati y’ihema ry’ibonaniro n’ igicaniro, ugisukemw’ amazi.

¹⁹ Aroni n’abana biwe az’ abe ari ho bahora bakaraba, boge ibirenge.

²⁰ Iyo bagiye kwinjira mw ihema ry’ibonaniro, baze bakarabe, boge, kugira ngo ntibapfe, n’iyo bagiye kwegera igicaniro guhereza, ngo banyosereze ibimazi bitōngōrwa n’umuriro.

²¹ Nuko baze bakarabe, boge ibirenge, kugira ngo ntibapfe: bize bibere Aroni n’uruvyaro rwiwe icagezwe c’intahava ukw ibihe vy’ urunganwe rwabo bizogenda bikurikirana.

Ivy’ amavuta yo kurobanura

²² Kand’ Uhoraho abarira Mose,

²³ at’ Uze wābīre imibavu iruta iyindi, ni yo iyi: isenga ishongerana igezwe kuri shekeli amajana atanu, bo n’ikigabane c’urwo rugero, ari zo shekeli amajana abiri na mirongwitanu, ca mudarasini imota neza; wābīre na kanehe imota neza igezwe kuri shekeli amajana abiri na mirongwitanu nyene,

²⁴ na kesiya ya shekeli amajana atanu, zigezwe kuri shekeli ir’ Ahēra, bo n’ingero imwe yitwa hini y’ amavuta ya elayo.

²⁵ Ivyo ubitunganye, bihinduke amavuta yera yo kurobanuza abahabga ibango, abe amavuta atāmirana, nk’ayinjijwe n’abahinga babimogoreye: az’ abe amavuta yera yo kurobanura.

²⁶ Uyasuke kw ihema ry’ibonaniro no kuri ya sandugu y’Ibishinga intahe,

²⁷ no kuri ya meza no ku bintu vyayo vyose, no kuri ca giterekwakw amatara no ku bintu vyaco, no kuri ca gicaniro co kwoserezakw imibavu,

²⁸ no kuri ca gicaniro co kwoserezakw ibimazi no ku bintu vyaco vyose, no kuri ca kigārigāri co gukaraba no ku ntebe yaco.

²⁹ Ubirobanure, kugira ngo bize bibe ivyera cane: ikizobikorako cose kizoba kibaye icera, kibe inyegu yavyo.

³⁰ Kand’ uz’ uyasuke no kuri Aroni no ku bana biwe, ubarobanure, kugira ngo bankorere igikorwa c’ubuherezi.

³¹ Uz’ ubarire Abisirayeli, ut’ Ayo azoba amavuta yiwe yera yo kurobanuza abahabga ibango, ukw ibihe vy’ urunganwe rwanyu bizogenda bikurikirana.

³² Ntaz’ asukwe ku mubiri w’ūtar’ umuherezi, kandi ntimuze mukore ayandi ahwanye na yo, uko yavanzwe: azoba ar’ ayera, namwe az’ ababere ayera.

³³ Umuntu wese azovanga āhwanye na yo, canke ngw ayasuke k’ūtar’ umuherezi, az’ arandurwe mu bgoko bgabo.

Ivy’ imibavu yo kwosa

³⁴ Uhoraho abarira Mose, at’ Uze wābīre ibintu bimoga, ni vy’ibi: natalu, na sheheleti, na helebena: ivyo bintu bimoga ubivange na lebona itagira indobeke; vyose binganye uburemerezi;

³⁵ ubitunganye bihinduke imibavu nk’ iyakozwe n’abahinga babimogoreye, irunzwe umunyu, itarobetse ikindi, yejejwe.

³⁶ Uze wābīre kuri yo, uyisye, uyigogōre, uyishire imbere ya vya Bishinga intahe mw ihema ry’ibonaniro, aho nzohora mbonanira nawe; iz’ ibabere iyera cane.

³⁷ Kand’ iyo mibavu uzotunganya, ntimuze mwironderere iyindi ihwanye n’iyo uko yavanzwe; iz’ ibabere iyerejwe jewe Uhoraho.

³⁸ Umuntu wese azokera īhwanye na yo, ngw az’ ayīmotereze, az’ arandurwe mu bgoko bgabo.