Kolosayi 3 - Bibliya Yera 1951 1967 (Burundi)

Kuzuranwa na Kristo

¹ None rer’ asangwa mwarazuranywe na Kristo, murondere ibiri hejuru, iyo Kristo ari, avyagiye i buryo bg’Imana.

² Mushire imitima ku biri hejuru, ntimuyishire ku biri mw isi.

³ Kuko mwapfuye, kand’ ubugingo bganyu bukaba buhishanijwe na Kristo mu Mana.

⁴ Kristo, ni we bugingo bgacu, ni yerekanwa, namwe muzoca mwerekananwa na we muri mu bgiza.

⁵ Nuko mwice ingingo zanyu ziri mw isi, ubushakanyi, ibihumanya, ukwifuza kw’umubiri, ukwifuza kubi kwose, no kwifuza ivy’ abandi, ni kwo gusenga ibigirwamana;

⁶ ivyo ni vyo bizanira uburake bg’Imana abantu b’intabarirwa.

⁷ Namwe mwabigenderamwo kera, hamwe mwāba muri vyo.

⁸ Ariko noneho mwiyambure n’ibi vyose: uburake, kujingitwa, urwanko rw’ubusa, gucokorana, kandi ntihakagire amagambo ateye isoni ava mu kanwa kanyu.

⁹ Ntimukabeshane, kuko mwiyambuye umuntu wa kera n’ibikorwa vyiwe,

¹⁰ mukambara umuntu musha, ahindurwa musha ngw agire ubgenge, amere nk’ishusho y’Iyamuremye:

¹¹ aho ntihaba Umugiriki cank’ Umuyuda, uwakebge cank’ ūtākebge, ūdebagura cank’ Umusikiti, umugurano cank’ uwidegemvya; ariko Kristo ni vyose, kand’ ari muri bose.

¹² Nuko rero, nk’uko bibereye abātoranijwe n’Imana bera bakundwa na yo, mwambare umutima w’ikigongwe, n’ineza, n’ukwicisha bugufi, n’ugutekereza, n’ukwihangana,

¹³ mwihanganirana, muharirana, iy’ umuntu agize ico apfa n’uwundi. Nk’uk’ Umwami wacu yabahariye, namwe abe ari ko muharirana.

¹⁴ Ikigeretse kur’ ivyo vyose mwambare urukundo, ni rwo mugozi uzana gutungana.

¹⁵ Kand’ amahoro ya Kristo aganze mu mitima yanyu, ayo mwahamagariwe ngo mube umubiri umwe: kandi mube abama bakenguruka.

¹⁶ Ijambo rya Kristo ribe muri mwebge rigwiriye, ririmw’ ubgenge bgose: mwigishanye, muhanūrane, muririmba zaburi n’indirimbo n’amatazirano y’ivya Mpwemu, muririmbire Imana mu mitima yanyu mubiheshwa n’ubuntu bgayo.

¹⁷ Kand’ ivyo muzokora vyose, mu majambo no mu bikorwa, muhore mubikora vyose mw izina ry’Umwami Yesu, mushima Imana Data wa twese kubg’ uwo.

Umubano wo mu rugo rw’Abakristo

¹⁸ Bagore, mugamburukire abagabo banyu, nk’uko bibereye abari mu Mwami wacu.

¹⁹ Bagabo, mukunde abagore banyu, ntimubabere umururazi.

²⁰ Bana, mwumvire abavyeyi banyu muri vyose, kukw ivyo ari vyo bishimwa mu Mwami wacu.

²¹ Ba se, ntimukaratse abana banyu, ngo ntibaranduke imitima.

²² Bagurano, mwumvire ba shobuja bo ku mubiri muri vyose, atar’ iyo babahagarikiye gusa, nk’abanezereza abantu, ariko mubakorere mutagira ubupfunya mu mitima yanyu, mwubaha Shobuja mukuru.

²³ Ivyo mukora vyose, mubikore bivuye mu mutima, nk’abakorera Shobuja mukuru, ntimube nk’abakorera abantu,

²⁴ muzi yuko muzohabga impēra na Shobuja mukuru, ni yo wa mwandu. Shobuja uwo Kristo ni we mukorera.

²⁵ Kuk’ ūgabitanya azokwihōrwa nk’uko yagabitanije: kandi nta kurobanura ku butoni.