Itanguriro 8 - Bibliya Yera 1951 1967 (Burundi)

Ingen’ umwuzure wakamye

¹ Imana yibuka Nowa n’ibifise ubugingo vyose, n’ibitungano vyose vyari kumwe na we mu bgato: Imana ihūhīsha umuyaga kw isi, amazi atangura kugabanuka.

² Amasōko y’i kuzimu arazibirwa, n’ingomero zo mw ijuru ziragomerwa, imvura iva mw ijuru irabogozwa;

³ amazi agenda ahōka kw isi ubudasiba: ya misi ijana na mirongwitanu ishize, amazi atangura kugeruka.

⁴ Mu kwezi kw’ indwi, ku musi wakwo w’icumi n’ indwi, bga bgato buhagarara ku misozi yo muri Ararati.

⁵ Amazi agenda arageruka ubudasiba, gushitsa mu kwezi kw’icumi: mu kwezi kw’icumi, ku musi wakwo wa mbere, udutwe tw’ imisozi turaboneka.

⁶ Imisi mirongwine ishize, Nowa yugurura idirisha ry’ubgato yabāje;

⁷ arekura igikōna, kiragenda kirajarajara gushitsa aho amazi yakamiye kw isi.

⁸ Maz’ arekura inuma kugira ngw amenye kw amazi yoba agabanutse kw isi.

⁹ Maze ntiyabona aho ishinga ikirenge, imugarukako mu bgato, kukw amazi yar’agikwiye kw isi yose: atuma ukuboko arayifata, ayizana mu bgato.

¹⁰ Asiba iyindi misi ndwi, yongera kurekura iyo numa ngw ive mu bgato;

¹¹ igaruka kuri we ku mugoroba, ifise akababi kabisi k’umwelayo mu kanwa. Nuko Nowa aca amenya kw amazi agabanutse kw isi.

¹² Asība iyindi misi ndwi, arekura iyo numa, ntiyasubira kumugarukak’ ukundi.

¹³ Maze mu mwaka w’amajana atandatu na rimwe, mu kwezi kwa mbere, ku musi wakwo wa mbere, amazi akama kw isi. Nowa akūrah’ igisakaye ubgo bgato, aritegereza, abona isi yūmūtse.

¹⁴ Mu kwezi kwa kabiri, ku musi wakwo wa mirongwibiri n’ indwi, isi irūma.

Nowa ava mu bgato

¹⁵ Imana ibarira Nowa,

¹⁶ iti Sohoka mu bgato, mwe n’umugore wawe n’abana bawe n’abakazana bawe.

¹⁷ Kand’ usohokane ibiri n’ubugingo vyose bifise umubiri, biri kumwe nawe, ibiguruka n’ibitungano n’ivyikwega hasi vyose, kugira ngo bisegenyukire cane mw isi, birondoke, bigwirire mw isi.

¹⁸ Nuko Nowa arasohoka, bo n’ abana biwe n’umugore wiwe n’ abakazana biwe,

¹⁹ n’ibitungano n’ibikōko vyose n’ivyikwega hasi n’ibiguruka vyose, mbere n’ibigenda kw isi vyose, nk’ukw amoko yavyo ari, birasohoka biva mur’ ubgo bgato.

²⁰ Maze Nowa yubakira Uhoraho igicaniro, yābīra mu bitungano vyose no mu bikōko vyose bitazira, no mu biguruka vyose bitazira, abitangira kur’ ico gicaniro kw ibimazi vyo kwoswa.

²¹ Uhoraho amoterwa n’umubabge mwiza wavyo, maz’ Uhoraho yiyumvira mu mutima wiwe, ati Sinzokwongera kuvuma isi ukundi kubg’ abantu, kukw imitima y’abantu yamogoreye gukora ibibi uhereye mu bgana bgabo: kandi sinzokwongera kwica ukundi ibifise ubugingo vyose, nk’uko nakoze.

²² Isi ikiriho, ibiba n’iyimbura, n’imbeho n’ubushuhe, n’ici n’agatāsi, n’umurango n’ijoro ntibizovaho.