Imigani 9 - Bibliya Yera 1951 1967 (Burundi)

Gutumira kwa Bgenge

¹ Bgenge yiyubakiye inzu, Yibāziye inkingi ndwi:

² Yabāze ingumba ziwe; yaturiranije vino yiwe; Yateguye ameza yiwe.

³ Yatumye incoreke ziwe; Asemererera ku gatwe hejuru ko mu gisagara,

⁴ At’ Umuntu wese w’imburabgenge n’aze yinjire hano: Kand’ abarira ibipfamutima,

⁵ Ati Ngwino murye ku mazimano yanje, Munywe kuri vino naturiranije.

⁶ Muve mu bupfu, mubone kubaho; Mugendere mu nzira yo kumenya ubgenge.

⁷ Ūhana umucokoranyi aba yikwegera kumāramāzwa, Kand’ uwihaniza umunyakibi aba yikwegera iceyi.

⁸ Ntiwihanize umucokoranyi, yohava akwanka: Wihanize umunyabgenge, azogukunda.

⁹ Wigishe umunyabgenge, azorushiriza kugira ubgenge: Wigishe umugororotsi, azokwunguka kumenya.

¹⁰ Ukwubaha Uhoraho ni kwo tanguriro ry’ubgenge, Kand’ ukumenya Uwera ni kwo kumenya ubgenge.

¹¹ Kukw imisi yawe izogwira kubganje, N’imyaka y’ukubaho kwawe izokwongerwa.

¹² Ni wagira ubgenge ni wewe uzoba ubgifitiye; Kandi ni wacokorana ni wewe ubgawe bizobako.

Gutumira kwa Gipfu

¹³ Gipfu n’umugore w’indegeteranyi, N’imburabgenge, kandi nta co azi.

¹⁴ Yicara ku muryango w’inzu yiwe, No ku ntebe ku gatwe hejuru ko mu gisagara,

¹⁵ Ngw ahamagare abahahita, Bagenda baramirije mu nzira zabo,

¹⁶ At’ Umuntu wese w’imburabgenge n’aze yinjire hano; Kand’ abarira igipfamutima,

¹⁷ At’ Amazi y’amībano araryoshe, N’indya zirīrwa mu mpisho ziranezereye.

¹⁸ Ariko wa wundi ntaba azi kw imizimu ari ho iri, Kandi kw abatumire biwe baba i bgina i kuzimu.