Imigani 3 - Bibliya Yera 1951 1967 (Burundi)

Umubano w’abantu n’Imana uk’ ukwiye kumera

¹ Mwana wanje, ntuze wibagire ukwigisha kwanje, Arik’ umutima wawe witondere amabgirizwa yanje:

² Kuko bizokwongerakw imisi myinshi, N’imyaka yo kuramvya ubugingo, n’amahoro.

³ Ubuntu n’ukuri ntibikuveko, Ubipfundike mw izosi ryawe, uvyandike ku gisate, ni co mutima wawe:

⁴ Ni ho uzobona gushimwa, bo n’ubgenge bushitse, Mu maso y’Imana n’abantu.

⁵ Wizigize Uhoraho umutima wawe wose, Kandi ntiwishimikize ubgenge bg’iwawe:

⁶ Umumenye mu ngendo zawe zose, Na we azogorora inzira zawe.

⁷ Ntukiyite umunyabgenge wewe ubgawe; Utinye Uhoraho, uve mu bibi:

⁸ Ivyo bizogutera kunonoka mu mubiri, No kugira umusokōro mu magufa yawe.

⁹ Wubahishe Uhoraho ibintu vyawe, Bo n’umushuzo w’ivyeze vyawe vyose.

¹⁰ Ni ho ibigega vyawe bizokwuzura vyongerekane, Kandi n’amato yawe azosēsekara imitobe.

¹¹ Mwana wanje, ntugaye igikāngīro c’Uhoraho, Kandi nturambirwe n’uguhana kwiwe:

¹² Kuk’ uwo Uhoraho akunda ari we ahana, Nk’uko se w’umwana nyene ahana umwana wiwe anezererwa.

¹³ Hahirwa umuntu yironkera ubgenge, N’umuntu aronse ugutahura.

¹⁴ Kukw inyungu zabgo ziruta iz’ ifeza, Kand’ ivyo bgunguka biruta izahabu zitarimw’ inkamba.

¹⁵ Burusha igiciro utubuyenge twitwa marijani: Kandi mu bihimbara vyose nta kintu gihwanye na bgo.

¹⁶ Ukuramba kuri mu kuboko kwabgo kw’i buryo, Mu kubamfu kwabgo harimw’ ubutunzi n’icubahiro.

¹⁷ Amayira yabgo n’amayira y’ igikundiro, Kand’ inzira zabgo zose n’iz’ amahoro.

¹⁸ Bubera igiti c’ubugingo ababucakira: Hahirwa umuntu wese abgumirako.

¹⁹ Uhoraho yashirishijeho isi ubgenge; Ugutahura ni kwo yagumishije ijuru.

²⁰ Ukumenya kwiwe ni kwo kwatumye amasōko y’i kuzimu atoboka, N’ibipfungu bigatonyanga ikime.

²¹ Mwana wanje, ivyo ntibikave imbere y’amaso yawe: Ugumye ubgenge buroranye n’amakenga;

²² Ni ho bizobera umutima wawe ubugingo, N’izosi ryawe ugushaza.

²³ Ni ho uzogenda mu nzira yawe ata nkomanzi, Kandi ntuzotsitara ikirenge cawe.

²⁴ Ni waryama ntuzogira ubgoba, Mber’ uzoryama, ugire itiro riryoshe.

²⁵ Ntuzotinya ubgoba bga giturumbuka, Cank’ ukuzingazingwa kw’ abanyavyaha ni kwashika:

²⁶ Kuk’ Uhoraho azokubera ivyizigiro, Kand’ azorinda ikirenge cawe ngo ntigifatwe.

Umubano w’abantu n’abandi uk’ukwiye kumera

²⁷ Ntukanke kugirira ivyiza ababibereye, Ugifise uburyo bgo kubikora.

²⁸ Ntukabgire mugenzawe, uti Genda, uz’ugaruke, Ejo nzoguha; Kand’ ubifise ngaho.

²⁹ Ntukīgīre imigabo yo kugirira nabi mugenzawe, Kand’ abana nawe amahoro.

³⁰ Ntukarwane n’umuntu ata nyanduruko, Iy’ ata kibi yakugiriye.

³¹ Ntukagirire ishari umuntu w’ikirara, Ntugatore inzira yiwe n’imwe.

³² Kukw ikidambidambi n’igisesema k’Uhoraho, Arikw abagororotsi bo, asangiye ibanga na bo.

³³ Umuvumo w’Uhoraho uri mu nzu y’abanyavyaha, Arikw ahezagira ingo z’abagororotsi.

³⁴ N’ukuri yitamba ku muvyimba abacokoranyi, Arikw agirira ubuntu abicisha bugufi.

³⁵ Abanyabgenge bazoragwa icubahiro, Arikw isoni ni zo zizoba umugabane w’ibipfu.