Guharūra 14 - Bibliya Yera 1951 1967 (Burundi)

Abantu barizwa n’inkuru z’abatasi

¹ Ishengero ryose riraturikisha, riraboroga; iryo joro abantu barāra bararira.

² Abisirayeli bose bidodombera Mose na Aroni, ikoraniro ryose rirababarira, rit’ Es’ iyo tuba twaraguye mu gihugu ca Egiputa! Canke tukagwa mur’ ubu bugaragwa!

³ Mbeg’ Uhoraho atujanira iki mur’ ico gihugu, kwicirwayo n’ inkota? Abagore bacu n’ibibondo vyacu bakazoba abanyagano: non’ iciza s’uko twosubira muri Egiputa?

⁴ Baravugana, bat’ Enda twitoranirize uwo kutugaba, twisubirire muri Egiputa.

⁵ Maze Mose na Aroni bikubitira hasi imbere y’ishengero ryose ry’Abisirayeli ryari rihakoraniye.

⁶ Yosuwa mwene Nuni na Kalebu mwene Yefune bāri mu gitigiri c’abagiye gutata ico gihugu, bitantamurirakw impuzu zabo;

⁷ babarira ishengero ryose ry’ Abisirayeli, bat’ Igihugu twanyuragiyemwo tugitata, n’igihugu ciza c’agahebuza.

⁸ Uhoraho namba tumuhimbaye, azotujana mur’ ico gihugu, akiduhe; kandi n’igihugu gitemba amata n’ubūki.

⁹ Mugabo ntimugararize Uhoraho, kandi ntimutinye ben’ ico gihugu: tuzobarya bga mutsima; icābakingira cabavuyeko, ariko tweho Uhoraho ari mu ruhande rwacu: nta co mubatinya!

¹⁰ Ishengero ryose riraheza rivuga ko babicisha amabuye; maz’ ubgiza bg’Uhoraho bubonekera Abisirayeli bose buri mw ihema ry’ibonaniro.

¹¹ Uhoraho abarira Mose, at’ Aba bantu bazogeza hehe kunkēngēra? Bazogeza hehe kutanyizera, naho nakoreye ibitangaza bingaho hagati muri bo?

¹² Hinge mbarekuriremw’ ikīza, ndabarandure, nawe ndaguhindure ihanga rizobarusha ubginshi n’inkomezi.

¹³ Mose yishura Uhoraho, at’ Ereg’ Abanyegiputa bazovyumva, kuko wakūye aba bantu muri bo, ubakūjey’ ububasha bgawe,

¹⁴ na bo bazobibgira ben’ ico gihugu: barumvise yuko wewe, Uhoraho, uri hagati mur’ aba bantu; kuko wewe, Uhoraho, uboneka imbonankubone, n’igicu cawe kigahagarara hejuru yabo, kand’ ukaja imbere yabo uri mu nkingi y’igicu ku murango, no mu nkingi y’umuriro mw ijoro.

¹⁵ None ni wica aba bantu nk’umuntu umwe, amahanga yumvise inkuru zawe azovuga,

¹⁶ at’ Uhoraho ko yananiwe kujana abo bantu mu gihugu yarahiye kw azobaha, ni co catumye abatsinda mu bugaragwa.

¹⁷ Enda se, ububasha bg’Umwami wanje ni bgiyerekane kw ari bginshi, nk’uko wivuzeko,

¹⁸ ut’ Uhoraho nteba kuraka, ngira ikigongwe cinshi, mparira ibigabitanyo n’ibicumuro, ariko simperereza urubanza k’ūtarugira; mpōra abana ibigabitanyo vya ba se, nkageza ku runganwe rwabo rugira gatatu no ku rugira kane.

¹⁹ Ndakwinginze, n’uharire ibigabitanyo vy’aba bantu, nk’ukw imbabazi zawe nyinshi ziri, nk’uko wagenda ubaharira uhereye bakiva muri Egiputa ugashitsa n’ubu.

²⁰ Uhoraho aramwishura, ati Ndabahariye nk’uk’ unsavye;

²¹ ariko n’ukuri, ndahiye uguhoraho kwanje, ndahiye n’isi yose izokwuzura icubahiro canje, jewe Uhoraho,

²² kw abo bantu bose babonye icubahiro canje n’ibitangaza vyanje nakoreye muri Egiputa no mu bugaragwa, bakangerageza ibihetangabo cumi vyose, ntibanyumvire;

²³ n’ukuri nta n’umwe azobona igihugu nari nararahiye ba sekuruza ko nzokibaha, nta n’umwe mur’ abo bankengereye azokibona;

²⁴ shit’ umusavyi wanje Kalebu, kuko yari n’uwundi mutima utari nk’uwabo, akankurikira muri vyose, uyo we nzomujana mu gihugu yagiyemwo, kand’ uruvyaro rwiwe ruzocegukira.

²⁵ Eh’ Abamaleki n’Abanyakanani baba muri kiriya kiyaya: nukw ejo muze muhindukire musubire mu bugaragwa mwerekeye ku Kiyaga Gitukura.

²⁶ Uhoraho abarira Mose na Aroni,

²⁷ ati Nzogeza hehe kwihanganira iri shengero rimeze nabi, rihora riranyidodombera? Numvise imyidodombo y’Abisirayeli banyidodombera.

²⁸ Babarire, ut’ Uku ni k’Uhoraho agize: ut’ Arahiye uguhoraho kwiwe, ut’ Ivyo yumvise mwivugiye ni vyo nyene azobagirira:

²⁹ ut’ Imivyimba yanyu izogenda ihindikirana mur’ ubu bugaragwa: ut’ Abāharūwe mwese uko mungana, uhereye ku bamaze imyaka mirongwibiri no kuja hejuru, uko mwakamwidodombeye,

³⁰ uti N’ukuri mukazogera mu gihugu yarahiye amanitse ukuboko kw azokibaha ngo mukibemwo, shiti Kalebu mwene Yefune na Yosuwa mwene Nuni.

³¹ Ut’ Arikw abana banyu b’ibibondo, abo muvuze ko bazoba abanyagano, ni bo azocinjiza, bībonere igihugu mwanse.

³² Ut’ Ariko mweho, imivyimba yanyu izogenda ihindikirana mur’ ubu bugaragwa.

³³ Uti Kand’ abana banyu bazomara imyaka mirongwine baragira mu bugaragwa, bagībgeko n’ubuhemu bganyu bgo kumureka; uti Gushitsa ah’ imivyimba yanyu izoba ikunkumukiye mu bugaragwa.

³⁴ Uti Nk’ ukw imisi ingana mwamaze mutata ico gihugu, ukw ari mirongwine, umusi uzohwana n’umwaka; uti Muzoyimara mugiweko n’ibigabitanyo vyanyu, ukw iyo myaka ari mirongwine; uti Kandi muzomenya kugirirwa umwikomo na we ic’ ari co.

³⁵ Jewe Uhoraho ndabivuze: sinzobura kugenza ntyo iri shengero ryose rimeze nabi, rikoraniye kungarariza. Bazokunkumukira mur’ ubu bugaragwa, ni ho bazogwa.

³⁶ Maze ba bagabo Mose yatuma gutata ico gihugu, bagarutse bakadonda inkuru z’agacavutu z’ico gihugu, bigatuma ishengero ryose rimwidodombera,

³⁷ abo bagabo nyene bādonze izo nkuru z’agacavutu z’ico gihugu, bicirwa n’ikīza imbere y’Uhoraho.

³⁸ Ariko Yosuwa mwene Nuni na Kalebu mwene Yefune baba ari bo bakira muri ba bagabo bagiye gutata ico gihugu.

³⁹ Mose araheza ashikiriza Abisirayeli bose ayo majambo; abantu bagira umubabaro mwinshi.

⁴⁰ Bakoroka kare mu gatondo, badūga imisozi yo mur’ uwo mugamba, bavuze, bat’ Ehe turaje, turadūze tugiye ah’Uhoraho yadusezeraniye: koko twakoze icaha.

⁴¹ Mose arababaza, ati None n’iki kibatera gucumura ku cagezwe c’Uhoraho? Ereg’ ico mukora ntikija kugenda neza.

⁴² Sigaho kudūga, kuk’ Uhoraho atari muri mwebge, ntimuhave mutsindwa n’abansi banyu.

⁴³ Kukw iyo imbere yanyu har’ Abamaleki n’Abanyakanani, kandi mwohava mwicwa n’inkota. Ko mwasubiye inyuma, mukareka gukurikira Uhoraho, ni co gituma Uhoraho ataribube kumwe namwe.

⁴⁴ Ariko bo bapfa guhangāra, badūga iyo misozi yo mur’ uwo mugamba; mugabo ya sandugu y’isezerano ry’Uhoraho, bo na Mose, ntivyava aho bāri bashagaje.

⁴⁵ Maz’ Abamaleki bamanukana n’Abanyakanani baba mur’ iyo misozi, barabanesha, barabirukana, babashitsa i Horuma.