Guharūra 11 - Bibliya Yera 1951 1967 (Burundi)

Umuriro w’Uhoraho wica abidodomvye

¹ Abantu baridodomba kubg’ ibibagoye; bigwa mu matwi y’Uhoraho; avyumvise, uburake bgiwe buraziriringa: umuriro w’ Uhoraho wāduka muri bo, uyigiza igihimba co ku mpera y’aho bashagaje.

² Abantu batakambira Mose, na we abasabira k’Uhoraho, uwo muriro urazima.

³ Aho hantu bahita Tabera, kuk’ umuriro w’Uhoraho wādutse muri bo.

Abisirayeli banka manu, bifuza inyama

⁴ Abanyamahanga b’ikivange bari muri bo batangura kwifuza inyama; Abisirayeli na bo bongera kurira, bati Ni nde yoduha inyama zo kurya?

⁵ Twibutse ya mafi twarya tukiri muri Egiputa ata co dutanze, n’amakonkomburi n’amapapayi n’amapwaro n’ibitunguru vya betsalimu n’ivya sumimu.

⁶ Ariko non’ uburuma buratwishe: nta kindi na kimwe twezakw ijisho atar’ iyi manu gusa.

⁷ Kand’ iyo manu yasa n’utubuto tw’agati kitwa gadi, ishusho yayo yasa n’ivyitwa budola.

⁸ Abantu bāragendagenda, bakayegeranya, bakayisya canke bakayisekura, bakayibiriza mu nkono bakayicumbamw’ udutsima: yasōsa nk’udutsima turimw’ amavuta ya elayo.

⁹ Mw ijoro ikime catonda aho bashagaje, manu igatonda kuri co.

¹⁰ Nuko Mose yumva abantu barira, umuntu wese arirana n’ab’ inzu yiwe, baririra mu miryango y’amahema yabo: uburake bg’ Uhoraho buraziriringa, na Mose na we arababara.

¹¹ Mose abaza Uhoraho, ati N’iki gituma ungirira nabi, jewe umusavyi wawe? n’iki gitumye ntagirirwa akagongwe imbere yawe, ukandemēka umutwaro w’aba bantu bose?

¹² Mbega ni jewe nasamye inda y’aba bantu bose? ni jewe nabavyaye, k’umbarira ngo ni ndabakīkire mu gikiriza, nk’uk’ umugabo akīkira umwana yonka, ngo ndabajane mu gihugu warahiye ba sekuruza k’uzokibaha?

¹³ Nkūre hehe inyama zo kugaburira aba bantu bose, ko bandirira imbere ngo ni ndabahe inyama, barye?

¹⁴ Erega sinshobora guterura aba bantu bose jenyene, kuko bamvuna.

¹⁵ Hāk’ ungenza urtyo, enda n’upfume unyica, namba ngiriwe akagongwe imbere yawe, kugira ngo noye gupfa nibonye.

Uhoraho aha Mose abafasha mirongwirindwi

¹⁶ Uhoraho abarira Mose, ati Nkoraniriza abagabo mirongwirindwi bo mu bakuru b’Abisirayeli, abo uzi kw ar’ abakuru koko, baganza abantu, ubazane kw ihema ry’ibonaniro, bahagararaneho nawe.

¹⁷ Nanje mpava mmanuka, mbonanireyo nawe; nābīre ku mpwemu iri kuri wewe, ndayishire kuri bo; na bo bazofatanya nawe uwo mutwaro w’abantu, ureke kugenda uwuteruye wenyene.

¹⁸ Kand’ ubarire abantu, ut’ Umusi w’ejo uz’ ushike mwiyejeje, uti Kandi muzorya inyama: kuko muririye mu matwi yiwe, mukavuga, muti Ni nde yoduha inyama zo kurya? muti Ko twari tumerewe neza muri Egiputa. Uti Ni co gitumye azobaha inyama z’uko murya.

¹⁹ Uti Ntimuzozirya umusi umwe, cank’ ibiri, cank’ itanu, canke cumi, canke mirongwibiri;

²⁰ ut’ Ariko muzozirya ukwezi kwiramvuriye, gushitsa aho zizosigara zibaduhiye, zikabasesema; uti Kuko mumwanse, Uhoraho ari muri mwebge, uti Mukaririra imbere yiwe, muti Twaviriye iki muri Egiputa?

²¹ Mose aramwishura, at’ Aba bantu ndimwo, abagabo b’imbaka n’ibihumbi amajana atandatu: non’ uvuze ng’ Uzobaha inyama, bazirye ukwezi kwiramvuriye!

²² Mbega bazobāgirwa imikuku n’amasho bibakwire? canke bazokoranirizwa amafi yose yo mu kiyaga, abakwire?

²³ Uhoraho yishura Mose, ati Mbeg’ ukuboko kwanje Uhoraho kwabaye kugufi? None hinge urābe yukw ijambo ryanje nkubgiye rishika canke ko ridashika.

²⁴ Nuko Mose arasohoka, abarira abantu ayo majambo y’Uhoraho. Akoranya abagabo mirongwirindwi bo mu bakuru, abakīkiza rya hema irya n’ino.

²⁵ Uhoraho amanuka ari muri ca gicu, amubarira amajambo, araheza yābīra ku mpwemu iri kuri Mose, ayishira kur’ abo bakuru mirongwirindwi: maz’ iyo mpwemu ibahagazeko baca bavugishwa n’Imana, ariko bagarukirizaho.

²⁶ Arikw aho bashagaje hāri hasigaye abagabo babiri, umwe yitwa Elidadi, uwundi yitwa Medadi: iyo mpwemu ibahagararako na bo. Kandi bari mu gitigiri c’abanditswe, ariko ntibari bavuye aho bari ngo baje kuri rya hema; nuko bavugishirizwa n’Imana aho nyene aho bashagaje.

²⁷ Umuhungu w’umusore agenda yiruka, abarira Mose, ati Elidadi na Medadi bariko baravugishirizwa aho dushagaje.

²⁸ Yosuwa mwene Nuni, yabaye umufasha wa Mose uhereye mu busore bgiwe, aramubarira, ati N’ubabuze, mugenzi!

²⁹ Mose aramubaza, ati Ni jewe ufitiye ishaka? Icompa abantu bose b’Uhoraho bakaba abavugishwa na we, Uhoraho akabashirakw impwemu yiwe!

³⁰ Mose asubira aho bashagaje, bo na ba bakuru b’Abisirayeli.

³¹ Haza umuyaga uvuye k’Uhoraho, uzana inkware zivuye ku kiyaga, uzirekurira aho bashagaje n’impande zose, gushitsa ahogendwa umusi umwe, zagenda zārāra hejuru y’isi nk’intambge zibiri z’ukuboko uciriye mu nkokora.

³² Abantu bava hasi barenza uwo musi bazāndūra, bakesha n’ijoro, barenza n’uwundi musi: uwāndūye nkeya yāndūra ingero yitwa homeru cumi: bazanikira impande zose z’aho bashagaje.

³³ Izo nyama bakizishinzekw amenyo, batarazihekenya, uburake bg’Uhoraho buziriringira abantu, abarekuriramw’ ikīza gikomeye cane.

³⁴ Aho hantu bahita Kiburoti‐hatava, kukw ari ho bahamvye abifuje inyama.

³⁵ Abantu bava i Kiburoti‐hatava, baja i Haseroti, bagumaho.