Galatiya 6 - Bibliya Yera 1951 1967 (Burundi)

Twame dukora ivyiza, ntiducobogore

¹ Bene Data, umuntu n’iyo yobonekakw icaha, mwebge ab’ impwemu mutunganye ūmeze artyo, mumuhanūrishe umutima w’ubugwaneza; kandi wiyubare ubgawe, nawe nyene woye kwoshwa nabi.

² Mwākīrane imitwaro, mushikane murtyo ivyagezwe na Kristo.

³ Umuntu ni yiyumvira kw ar’ agakomeye, kand’ ata co amaze, arībesha.

⁴ Arik’ umuntu wese asuzume igikorwa ciwe, ni ho azobona ico yirata ku mutumba wiwe bgite, atari kubga mugenzi we.

⁵ Kuk’ umuntu wese azokwiyikorerera uwiwe mutwaro.

⁶ Arik’ uwigishwa ijambo ry’Imana ahe umwigisha mu vyiza vyose.

⁷ Ntimuzimire: Imana yo nticokorwa; kukw ic’ umuntu abiba cose ari co azokwimbura.

⁸ Ūbiba mu buryo bg’umubiri azokwimbura ukubora mu mubiri; arik’ ūbiba muri Mpwemu azokwimbura muri Mpwemu ubugingo budashira.

⁹ Twame dukora ivyiza, ntiducobogore, kukw igihe ni cashika tuzokwimbura, ni tutarambirwa.

¹⁰ Nuko rero, iyo turonse uburyo, tugirire bose neza, cane‐cane ab’ inzu y’abizera.

Amajambo yo guherezako

¹¹ Murābe ingene mbandikishirije ukwanje kuboko inyuguti nini‐nini.

¹² Abagomba bose kwiha igikundiro ku vy’ umubiri ni bo babagōbēra gukebga; nta yindi nyanduruko, n’ukugira ngo ntibahamwe bahōrwa umusaraba wa Kristo.

¹³ Kukw abākebge na bo nyene batitondera ivyagezwe, ariko bashaka ko mukebga, ngo birate imibiri yanyu.

¹⁴ Ariko jeho sinkirate ikindi, atar’ umusaraba w’Umwami wacu Yesu Kristo, watumye isi imbera ikibambge, nanje isi nkayibera ikibambge.

¹⁵ Kuko gukebga ata kimazi, no kudakebga nta kimazi, ikigira ikimazi n’icaremwe gisha.

¹⁶ Abazogendera kur’ urwo rugezo, amahoro abe muri bo n’ikigongwe, no mu Bisirayeli b’Imana.

¹⁷ Uhereye none ntihakagire umuntu angora, kuko mfise ku mubiri inkovu za Yesu.

¹⁸ Bene Data, ubuntu bg’Umwami wacu Yesu Kristo bubane n’imitima yanyu. Amen.