Galatiya 5 - Bibliya Yera 1951 1967 (Burundi)

¹ Kristo yatugobotoye ngo tube mu mwidegemvyo: nuko muhagarare mushikamye, ntimukongere kuzīngīrwa n’ugutwazwa ituntu n’ubuja.

Guhitamwo Kristo cank’ ivyagezwe

² Umve, jewe Paulo ndababgira yuko ni mwakebga, Kristo ata co azobamarira.

³ Kandi ndabarira umuntu wese akebga, mbishingiye intahe, yukw ari n’umwenda wo kwitondera ivyagezwe vyose.

⁴ Yemwe abagomba gutsindanishirizwa n’ivyagezwe, erega muhinduye ubusa gufatana na Kristo kwanyu, muratemvye muretse ubuntu bg’Imana.

⁵ Kuko twebge, mu buryo bga Mpwemu, twiteze ivyizigiro vy’ukugororoka, kubg’ ukwizera.

⁶ Kuko muri Kristo Yesu, ar’ ugukebga, ar’ ukudakebga, bitagira ikimazi; ikigira ikimazi n’ukwizera gukoreshwa n’urukundo.

⁷ Ko mwagenda neza; ni nde yabateye gutenzekanya ngo ntimwumvire ukuri?

⁸ Iyo nyosha ntiyavuye kur’ uwo abahamagara.

⁹ Umwambiro muke ututumbisha irobe ryose.

¹⁰ Ndabizigiye kubg’ Umwami wacu yuko mutazogira uwundi mutima; arik’ ūbahagarika imitima, uw’ ari we wese, urubanza ruzomusubirako.

¹¹ Ariko jewe, bene Data, namba nkibarira abantu gukebga, n’iki gituma ngihamwa? Igitsitaza c’umusaraba kiba carahindutse ubusa.

¹² Icompa ababavurunga bakīkona rwose.

Umwidegemvyo wacu ukwiye kuganzwa n’urukundo

¹³ Bene Data, mwahamagariwe umwidegemvyo; mugabo rero, uwo mwidegemvyo ntimuwugire urwitwazo rw’akameremere kanyu, arik’ urukundo rubatere gukorerana.

¹⁴ Kukw ivyagezwe vyose bihūrira mur’ iri jambo, ngo Mukunde bagenzi banyu nk’uko mwikunda.

¹⁵ Ariko ni mwashikurana, mugatsontsomerana, mwirinde ntimuhezanye.

Ubugingo bgo muri Mpwemu

¹⁶ Ndavuga nti Mugendeshwe na Mpwemu, ni ho mutazoshitsa ivy’ akameremere kanyu kifuza.

¹⁷ Kukw akameremere kifuza ivyo Mpwemu yanka, kandi Mpwemu yifuza ivy’ akameremere kanka: kukw ivyo bihiganwa, ngo ntimukore ivyo mugomba.

¹⁸ Ariko namba murōngōrwa na Mpwemu, ntimuganzwa n’ivyagezwe.

¹⁹ Kand’ ibikorwa vy’akameremere kacu biramenyekana, n’ibi: ubushakanyi, ibihumanya, ivy’ isoni nke,

²⁰ gusenga ibigirwamana, uburozi, ubgansi, intonganya, ishari, uburake, ikēba, kwitandukanya, ibice,

²¹ igono, kuborerwa, kudandahirwa, n’ibindi ben’ ivyo. Ivyo ndabibabūriye, nk’uko nabibabūriye kera, yukw abakora ibisa birtyo batazoragwa ubgami bg’Imana.

²² Arikw ivyo Mpwemu yama n’urukundo, umunezero, amahoro, ukwihangana, kugira neza, ingeso nziza, kuba umwizigirwa,

²³ ubugwaneza, ukwirinda: ibimeze birtyo nta vyagezwe bibibuza.

²⁴ Kand’ aba Kristo Yesu bābambanye akameremere kabo n’ivyo gahahamiye n’ivyo kifuza.

²⁵ Namba tubeshwaho na Mpwemu, tuyoborwe na Mpwemu.

²⁶ Ntitwifate uko tutari, ngo twandurutsanye, tugiriranire ishari.