Galatiya 4 - Bibliya Yera 1951 1967 (Burundi)

Ikitugira abana b’Imana

¹ Ariko mvuga yuko samuragwa, iy’ akir’ umwana, ata co atandukanako n’umugurano, nah’ ari we nyen’ ibintu vyose.

² Arikw aganzwa n’abamuzigama n’ababgiriza kugeza mu kibariro cashinzwe na se.

³ Natwe n’uko: tukir’ abana twari tujakariye ivya mbere vyo mw isi.

⁴ Maz’ igihe gikwiye gishitse, Imana ituma Umwana wayo, yavyawe n’umugore, kandi yavutse aganzwa n’ivyagezwe,

⁵ ngw acungure abaganzwa n’ivyagezwe, biduheshe gucika abana bayo.

⁶ Kandi kuko mur’ abana bayo, Imana yatumye Mpwemu w’Umwana wayo mu mitima yacu, ataka, ati Abba, Data.

⁷ Ni co gituma utakir’ umugurano, arik’ ur’ umwana wayo; kandi k’ur’ umwana wayo, ur’ umuragwa, ubihawe n’Imana.

Paulo ahanūra ab’i Galatiya ngo ntibasubire inyuma

⁸ Arikw ico gihe, kuko mutāri muzi Imana, mwari mujakariye imana zitari zo uhereye mu kameremere kazo:

⁹ ariko none, ko mwamenye Imana, cane‐cane ko mwamenywe na yo, n’iki catumye musubira inyuma mugahindukirira ivya mbere vya goyi‐goyi, bitagira ikimazi, mukagomba kubijakarira ukundi gusha?

¹⁰ Muziririza imisi n’amezi n’ibihe n’imyaka.

¹¹ Munteye akōba, yuko kumbure ivyo nabakoreye natamijwe n’ubusa.

¹² Ndabinginze, bene Data, mumere nkanje, kuko nanje mmeze nkamwe. Nta nabi mwangiriye,

¹³ ariko murazi yukw amagara make y’umubiri ari yo yatumye mbabarira ubutumwa bgiza ubga mbere:

¹⁴ kand’ ivyābagerageza kubg’ umubiri wanje ntimwabitītūye, ntimwāciriye inyeri, ariko mwānyakiriye nk’umumarayika w’Imana, canke nka Kristo Yesu.

¹⁵ None kwa kwishima kwanyu kuri hehe? Nd’ icabona canyu yukw iyo biba vyarashobotse, muba mwaremeye kwinogora amaso, mukayampa.

¹⁶ Mbega mpinduwe umwansi wanyu no kubabgira ukuri?

¹⁷ Ba bandi babagirira ishaka mu buryo butari bgiza; arikw ico bagomba n’ukubazigira hanze, kugira ngo namwe mubagirire ishaka.

¹⁸ Mugabo, ni vyiza kugirira ivyiza ishaka ibihe vyose, atar’ igihe turi kumwe gusa,

¹⁹ bana banje bato, abo nongera kuramukwa, gushitsa ah’ ishusho ya Kristo izoremerwa muri mwebge.

²⁰ Kandi nagomba gushikīrana namwe aka kanya, no kworosha ijwi, kukw ivyanyu binzazaniye.

Ivy’ abahungu babiri

²¹ Mwebge abagomba kuganzwa n’ivyagezwe, ni mumbarire: mbega ntimwumva ivyagezwe?

²² Kuko vyanditswe yuko Aburahamu yar’ afise abahungu babiri, umwe ar’ uwo ku ncoreke, uwundi ar’ uwo ku mugore bgite.

²³ Uwo ku ncoreke yavyawe mu buryo bg’umubiri; uwo ku mugore bgite yavyawe kubg’ isezerano.

²⁴ Ivyo ni nk’umugani. Kukw abo bagore ari nk’amasezerano abiri, rimwe ryavuye ku musozi Sinayi, rivyara abo kuguma mu buja, iryo ni Hagari.

²⁵ Nuko Hagari n’umusozi Sinayi wo muri Arabiya, usobanurwa ngo Yerusalemu wa none, kuk’ usangiye ubuja n’abana bawo.

²⁶ Ariko Yerusalemu wo hejuru ni wo mugore bgite, ni wo mama wa twese.

²⁷ Kuko handitswe, ngo Nezerwa, yewe mugore w’ingumba utavyara, Turika, usemerere, wewe utaramukwa, Kukw abana b’intābga ari benshi, baruta ab’ ūfise umugabo.

²⁸ Namwe bene Data, mur’ abana b’isezerano, nk’uko Isaka yar’ ari.

²⁹ Ariko nk’ukw ico gihe uwavyawe mu buryo bg’umubiri yahama uwavyawe mu buryo bga Mpwemu, na none ni ko biri.

³⁰ Ivyanditswe bivuga iki? Bit’ Irukana incoreke n’umwana wayo, kuk’ umwana w’incoreke atazoraganwa n’umwana w’umugore bgite.

³¹ Nuko bene Data, ntitur’ abana b’incoreke, tur’ aba wa mugore bgite.