Galatiya 3 - Bibliya Yera 1951 1967 (Burundi)

Ukwizera ni kwo gutuma twemerwa n’Imana

¹ Yemwe Bagalatiya b’ibijuju, ni nde yabaroze, kand’ ari mwebge mweretswe Yesu Kristo abambge, mu maso yanyu?

² Iki conyene ni co ngomba ko mumbgira: mbega Mpwemu mwamuronkeshejwe n’ibikorwa vy’ivyagezwe, canke n’ukwumva gufatanije n’ukwizera?

³ Mbega mwakabaye mur’ ibijuju murtyo? Mwatanguye mu vya Mpwemu, mbega none musozereye mu vy’umubiri?

⁴ Mbeg’ ayo yose mwayaboneye ubusa? Namba yar’ ay’ ubusa koko!

⁵ Ībaha Mpwemu, igakorera ibitangaza muri mwebge, mbeg’ ibikoreshwa n’uko mukora ibikorwa vy’ivyagezwe, canke n’uko mwumvise mukizera?

⁶ Nk’uko Aburahamu yizeye Imana, akabiharūrwako nk’ukugororoka.

⁷ Mumenye rero yukw abīshimiye ukwizera ari bo bana ba Aburahamu.

⁸ Kand’ ivyanditswe vyabimenye bitaraba yukw Imana izotsindanishiriza abanyamahanga kubg’ ukwizera, bibarira Aburahamu ubutumwa bgiza bg’ibitaraba, biti Muri wewe ni ho amahanga yose azohērwa umugisha.

⁹ Nukw abīshimira ukwizera bahabga umugisha hamwe na Aburahamu yizera.

¹⁰ Abishimira ibikorwa vy’ivyagezwe bose bari n’umuvumo: kuko handitswe ngw Azoba avumwe umuntu wese adashishikarira ivyanditswe vyose mu gitabo c’ivyagezwe, ngw avyitondere.

¹¹ Biraseruka yukw ata muntu atsindanishirizwa n’ivyagezwe imbere y’Imana, kuko handitswe ng’ Umugororotsi azobeshwaho n’ukwizera.

¹² Arikw ivyagezwe ntibiva ku kwizera, yamara ng’Ūzovyitondera ni vyo bizomubeshaho.

¹³ Kristo yaducunguye umuvumo w’ivyagezwe, yacitse ikivume kubgacu; kuko handitswe ngw Azoba avumwe umuntu wese amanitswe ku giti:

¹⁴ kugira ng’umugisha wa Aburahamu ushike ku banyamahanga, bawuheshejwe na Yesu Kristo, kugira ng’ukwizera kuturonkeshe Mpwemu twasezeraniwe.

¹⁵ Bene Data, ibi ndabivuga nk’imvugo y’abantu. Isezerano, naho ryoba iry’ umuntu gusa, iyo rishinzwe nta muntu arikūraho cank’ aryongerako.

¹⁶ Nuko Aburahamu ni we yasezeraniwe amasezerano, bo n’uruvyaro rwiwe. Ntiyavuze, it’ Imvyaro; nk’ūvuga benshi: yamara yavuze nk’ūvuga umwe, iti N’uruvyaro rwawe; ni rwo Kristo.

¹⁷ Arikw ico mvuze n’iki: isezerano ryabanje gushingwa n’Imana, ivyagezwe vyaje hashize imyaka amajana ane na mirongwitatu, ntivyorikūraho ngo bihindure ubusa iryo sezerano.

¹⁸ Kukw iy’ umwandu uzanwa n’ivyagezwe, woba utazanywe n’isezerano: arikw Imana yawuhaye Aburahamu, iwumusezeraniye.

Igituma Imana yashinze ivyagezwe

¹⁹ Nukw ivyagezwe n’ibiki? Vyageretsweko kubg’ ibicumuro, ngo bigumeho kugeza ah’ uruvyaro ruzozira rwasezeranywe ivy’ isezerano: kandi vyahawe abamarayika kubigera, na bo babiha umushikirwa w’amajambo.

²⁰ Arik’ umushikirwa ntaba uw’ umwe, yamar’ Imana n’imwe.

²¹ Mbeg’ ivyagezwe birwanya amasezerano y’Imana? Eka na mba! Iyo haba harih’ ivyagezwe vyashinzwe bishobora kubeshah’ abantu, n’ukuri ukugororoka kuba kwarazanywe n’ivyagezwe.

²² Arikw ivyanditswe bivuga yuko vyose vyugaranywe ngo biganzwe n’icaha, kugira ngw abizera bahabge ivyasezeranywe biheshwa no kwizera Yesu Kristo.

²³ Arik’ ukwizera kutaraza, twarindwa n’ivyagezwe, twugaranywe turindiriye ukwizera kwagira kuze guhishurwe.

²⁴ Uko ni kw ivyagezwe vyatubereye umurezi aturera akadushikiriza Kristo, ngo dutsindanishirizwe n’ukwizera.

Ibiva ku kwizera

²⁵ Arik’ ukwizera ko kwaje, ntitukirerwa n’umurezi.

²⁶ Mwese mur’ abana b’Imana kubgo kwizera Kristo Yesu:

²⁷ kuko mwese ababatirijwe kuba aba Kristo mwanbaye Kristo.

²⁸ Ntihashobora kuba Umuyuda cank’ Umugiriki, ntihashobora kuba umugurano cank’ uwidegemvya, ntihashobora kuba umugabo cank’ umugore; kuko mwese mur’ umwe muri Kristo Yesu.

²⁹ Ko mur’ aba Kristo, mur’ uruvyaro rwa Aburahamu, mur’ abaragwa nk’uko vyasezeranywe.