Filemoni 1 - Bibliya Yera 1951 1967 (Burundi)

Indamukanyo

¹ Paulo, imbohe ya Kristo Yesu, na Timoteyo mwene Data, turakwandikiye Filemoni uwo dukunda, dusangiye igikorwa,

² na Apiya mushiki wacu, na Arukipo turwanana, n’ishengero ryo mu nzu yawe:

³ ubuntu bube muri mwebge n’amahoro biva ku Mana, Data wa twese, no ku Mwami Yesu Kristo.

Paulo ashimira Imana urukundo rwa Filemoni n’ukwizera kwiwe

⁴ Nshima Imana yanje ubudasība, nguhoza mu kanwa uko nsenze,

⁵ kuko numvise urukundo rwawe n’ukwizera Umwami Yesu kwawe, ukwo wereka abera bose:

⁶ kugira ng’ ugufataniriza mu kwizera kwawe gushobore vyinshi kubga Kristo, mu kumenyekanisha ivyiza vyose vyo muri twebge.

⁷ Kuk’ urukundo rwawe rwanteye umunezero mwinshi rukandemesha, kand’ imitima y’abera warayiruhuye, mwene Data.

Asaba Filemoni kugirira imbabazi umugurano wiwe Onesimo

⁸ Kubg’ ivyo, naho mfise ubushizi bg’amanga bgose muri Kristo bgo kukugerakw ibikwiye,

⁹ mpisemwo kukwinginga kubg’ urukundo, uko ndi kose Paulo umutāma, kandi none nd’imbohe ya Kristo Yesu.

¹⁰ Ndakwitwayeko ku mwana wanje Onesimo uwo navyariye mu minyororo yanje,

¹¹ atākugirira ikimazi kera, ariko noneh’ atugirira ikimazi twempi.

¹² Ni we nyene nkurungikiye, ni we mutima wanje.

¹³ Mba ndamugumije kugira ngw ankorere mu gishingo cawe, mboshwe n’iminyororo y’ubutumwa bgiza.

¹⁴ Ariko nta co ngomba gukora ntakugishije inama, kugira ngw iciza ukora ntikibe ic’ ugōberewe, arik’ ugikore ubikunze.

¹⁵ Kumbure icatumye atandukanywa nawe igihe gito kwar’ ukugira ng’ uz’ umwamane imisi yose:

¹⁶ atakir’ umugurano wawe, arikw aruta umugurano, ari mwene So, akundwa: akundwa nanje cane, arikw arushiriza gukundwa nawe, mu vy’umubiri no mu Mwami wacu.

¹⁷ Nuko namb’ unyiyumvira ko dusangiye igikorwa, umwākīre nk’uko nanje wonyakiriye.

¹⁸ Arikw asangwa har’ ico yaguhemukiyeko, canke har’ umwenda agufitiye, ubimparūreko.

¹⁹ Ni jewe Paulo nandikishije ukwanje kuboko yuko nzovyishura: reka noye kukubgira yuk’ uri n’umwenda wanje, uwo mwenda ni wewe ubgawe.

²⁰ Ego, mwene Data, nkubonemw’ ikimazi mu Mwami wacu: unduhure umutima muri Kristo.

Amajambo yo guherezako

²¹ Nkwandikiye nizigiye k’uzonyumvira, nzi yuk’ uzokora n’ibiruta ivyo mvuze.

²² Kandi n’ikindi, untegurire indāro; kuko nizigiye yuko muzompabga kubg’ amasengesho yanyu.

²³ Epafura, mugenzanje tubohanywe muri Kristo, aragutasha,

²⁴ na Mariko, na Arisitariko, na Dema, na Luka, abo dusangiye igikorwa, baragutasha.

²⁵ Ubuntu bg’Umwami Yesu Kristo bubane n’imitima yanyu. Amen.