Daniyeli 1 - Bibliya Yera 1951 1967 (Burundi)

Imigabo ya Daniyeli na bagenzi biwe

¹ Mu mwaka ugira gatatu Yehoyakimu umwami w’Abayuda ari ku ngoma, Nebukadineza umwami w’i Babuloni yaje gutera i Yerusalemu, arahakikiza.

² Umwami Imana agabura Yehoyakimu umwami w’Abayuda mu maboko yiwe, bo n’ibintu vy’imbombovu bimwe vyo mu ngoro y’Imana, abijana mu gihugu c’i Shinari mu nzu y’imana yiwe; ashira ivyo bintu mu nzu y’ ububiko bg’iyo mana.

³ Nuk’ umwami abarira Ashipenazi, umukuru w’inkone ziwe, kuzana bamwe bo mu Bisirayeli bo mu nda y’ingoma, n’abo mu bapfasoni,

⁴ b’imisore batagira agasembga, ariko b’indanga, bar’ uburyo mu vy’ubgenge bgose, b’abahanga mu vyo kumenya, b’insorongozi mu vy’ubgenge, kandi babereye gukora i bgami; kugira ngw abigishe inyandiko y’Abakaludaya n’ururimi rwabo.

⁵ Nuk’ umwami agera ingaburo bahabga imisi yose ivuye ku vy’ umwami afūngura, no ku giturire yuhira, kandi ko bagaburirwa imyaka itatu; ngo ni yashira babone gukorera umwami.

⁶ Nuko muri bo, mu bo mu muryango wa Yuda, hāri Daniyeli na Hananiya na Mishayeli na Azariya.

⁷ Nuk’ uwo mukuru w’inkone abīta ayandi mazina: Daniyeli amwita Beluteshaza, Hananiya amwita Shaduraka, Mishayeli amwita Meshaki, Azariya amwita Abedunego.

⁸ Maze Daniyeli agira imigabo mu mutima kutazokwihumanisha ivyo kurya vy’umwami, cank’ igiturire yuhira: ni co catumye yinginga uwo mukuru w’inkone, kugira ngo ntiyihumanye.

⁹ Nukw Imana ituma Daniyeli akundwa n’umukuru w’inkone, amutera imbabazi.

¹⁰ Maz’ uwo mukuru w’inkone abgira Daniyeli, ati Ndatinya umwami segaba, yabagereye ingaburo z’ivyo murya n’ivyo munywa; vyomera bite ababonye mwonze mu maso mudasa n’abandi basore b’urunganwe rwanyu? Muzoba muncishije umutwe ku mwami.

¹¹ Nuko Daniyeli aca yinginga umubgiriza, uwo wa mukuru w’inkone yashizeho kurāba ivya Daniyeli na Hananiya na Mishayeli na Azariya,

¹² ati Ndakwinginze utugerageze twebge abasavyi bawe imisi cumi, baduhe indya z’insoromano, abe ari zo turya, n’amazi yo kunywa;

¹³ uheze uze witegereze mu maso hacu no mu maso h’abasore barya ku vyo kurya vy’umwami; maz’ uk’ uzobona bimeze, abe ari k’uzotugenza, twebge abasavyi bawe.

¹⁴ Nukw abemerera iryo jambo, abagerageza imisi cumi.

¹⁵ Iyo misi cumi ishize, asanga mu maso habo ari heza kandi bayagayaga ku mubiri kurusha abandi basore bose bārya ku vyo kurya vy’umwami.

¹⁶ Nuk’ uwo mubgiriza aca abakūra kuri vya vyo kurya bāshingiwe, no ku giturire bāri bakwiye kunywa, abaha indya z’insoromano.

¹⁷ Maz’ abo basore ukw ari bane Imana ibaha gukerebuka no kuba uburyo mu vyo bigishwa vyose no mu bgenge; kandi Daniyeli yari n’ubgenge bgo gutahura ivyerekanwa vyose bo n’inzozi.

¹⁸ Nukw iyo misi igeze umwami yari yarashinze ko babazana, umukuru w’inkone abashikana imbere ya Nebukadineza.

¹⁹ Nuk’ umwami aganira na bo, ariko muri bose ntihābonetse ūhwanye na Daniyeli na Hananiya na Mishayeli na Azariya: ni co catumye bagirwa abo gukorera umwami.

²⁰ Mw ijambo ryose ry’ubgenge no kumenya, ico umwami yababaza, yasanga barusha abanyamarēba n’abapfumu bose bo mu gihugu ciwe cose ibihetangabo cumi.

²¹ Nuko Daniyeli aguma ngaho, gushitsa ku mwaka wa mbere umwami Kuro ari ku ngoma.