Amosi 2 - Bibliya Yera 1951 1967 (Burundi)

¹ Uku ni k’Uhoraho agize, ati Kubg’ ibicumuro bitatu vy’i Mowabu, mbere ni bine, sinzovyirengagiza; kuko baturiye amagufa y’umwami w’Abanyedomu, bayahindura nk’ishwagara.

² Nuko nzokwanda umuriro i Mowabu, utongore ingoro z’i Keriyoti; kandi Mowabu hazopfa har’ amaruru n’urwamo n’inzamba zivuga.

³ Kandi nzohahenebereza ūhaganza, ndamwicane n’abaganwa baho bose, ni k’Uhoraho agize.

⁴ Uku ni k’Uhoraho agize, ati Kubg’ ibicumuro bitatu vy’Abayuda, mbere ni bine, sinzovyirengagiza; kuko bātītūye ivyagezwe vyanje, jewe Uhoraho, ntibitondere amabgirizwa yanje, kand’ ibigirwamana vyabo vy’ibinyoma vyarabajimije, ari vyo ba sekuruza babo nyene bākurikira.

⁵ Nuko nzokwanda umuriro i Buyuda, utongore ingoro z’i Yerusalemu.

Imbūri yo ku Bisirayeli

⁶ Uku ni k’Uhoraho agize, ati Kubg’ ibicumuro bitatu vy’Abisirayeli, mbere ni bine, sinzovyirengagiza; kuko bāguze umugororotsi amahera, n’umukene bakamugura inkweto.

⁷ Basiribangira imitwe ya ba nyarucari mu mukungugu wo hasi, bakagoreka inzira z’abicisha bugufi; umwana na se binjirana umwigeme umwe, bagatukisha izina ryanje ryera.

⁸ Bīryāmira i ruhande y’igicaniro cose ku mpuzu z’inkizurano, kandi mu ngoro y’Imana yabo bakahanywera vino baciriye abantu kw iciru.

⁹ Yamar’ ari jewe naranduye Abamori imbere yabo, uburebure bgabo bgari bumeze nk’ubg’ amasederi, kandi bari bakomeye nk’ibiti vy’imyeloni; ariko nahenebereje ivyo bamye mpereye hejuru, n’imizi yabo, mpereye hasi.

¹⁰ Yamara mweho nabadūganye mbakuye mu gihugu ca Egiputa, mbarōngōra mu bugaragwa imyaka mirongwine, kugira ngo mwegukire igihugu c’Abamori nyene.

¹¹ Kandi mu bana banyu natoyemw’ abo nzovugisha, no mu misore yanyu abo kuba Abanaziri. Mbega si ko vyābaye, ga yemwe Bisirayeli? ni k’Uhoraho abaza.

¹² Ariko mwebge mwāhaye Abanaziri vino ngo bayinywe, mutako mubuza abo mvugisha, muti Ntimukavugishwe.

¹³ Umve, ngira mbashikamire aho muri, nk’uk’ umukogote wuzuye ibinyankinda ushikamira hasi.

¹⁴ Ūbangutse azobura ukw ahunga, n’umuhizi nta co ubuhizi bgiwe buzomumarira, n’intōre ntizoruha yikiza;

¹⁵ uw’ umuheto ntazoshobora guhagarara, n’impayamaguru ntizoshobora kwikiza, cank’ ūgendera kw ifarasi:

¹⁶ kandi n’uwar’ inshirabinya mu bahizi kur’ uwo musi azohunga yambaye ubusa, ni k’ Uhoraho agize.