Abanyefeso 5 - Bibliya Yera 1951 1967 (Burundi)

¹ Nuko mwīgāne Imana, nk’abana ikunda.

² Kandi mugendere mu rukundo, nk’uko Kristo na we yabakunze, akatwigura, akatubera ishikanwa n’ikimazi bihabga Imana, umubabge umota neza.

³ Arik’ ubushakanyi n’ibihumanya vyose cank’ ukwifuza ntimukabishire no mu kanwa, mube nk’uko bibereye abera:

⁴ cank’ ibiteye isoni, cank’ amagambo y’ubupfu, cank’ ibitwenza bibi, kukw ivyo bitabereye; ikibereye n’ugushima Imana.

⁵ Kukw ibi mubizi neza, yukw ata mushakanyi, cank’ igihumane, cank’ uwifuza (ni we asenga ibigirwamana), azogira ico aragwa mu bgami bga Kristo n’Imana.

⁶ Ntihakagire umuntu abahendesha amagambo y’ubusa: kukw ivyo ari vyo bizanira uburake bg’Imana abantu b’intabarirwa.

⁷ Nuko ntimugafatanye na bo;

⁸ kuko kera mwar’ umwiza, none mukaba mur’ umuco mu Mwami wacu: mugende nk’abana b’umuco,

⁹ kukw imbuto y’umuco iboneka mu ngeso nziza zose no mu kugororoka no mu kuri.

¹⁰ Mumenye neza ibihimbara Umwami wacu,

¹¹ kandi ntimugafatanye n’ibikorwa birumvye vy’umwiza, ariko cane‐cane mubiserure,

¹² kukw ibikorwa na bo mu mpisho biteye isoni no kubivuga.

¹³ Ariko vyose, iyo bishizwe ahabona, bigaragazwa n’umuco, kukw ikigaragazwa cose ar’ umuco.

¹⁴ Ni co gituma bivugwa, ngw Ikangure, wewe usinziriye, uzuke uve mu bapfuye, Kristo arakumurikira.

¹⁵ Nuko mwirinde cane uburyo mugenda, mwoye kugenda nk’imburabgenge, ariko mugende nk’abanyabgenge,

¹⁶ mugura uburyo mubugwiza, kukw imisi ari mibi.

¹⁷ Nuko ntimube ibipfu, ariko mutahure ivy’ Umwami wacu agomba ivy’ari vyo.

¹⁸ Kandi ntimukaborerwe vino, irimw’ ubuhumbu; ariko mwuzure Mpwemu.

¹⁹ Mubgirane zaburi n’indirimbo n’amatazirano y’ivya Mpwemu, muririmba, mucurarangira Umwami wacu mu mitima yanyu;

²⁰ Imana, Data wa twese, muyishimire vyose imisi yose, mw izina ry’Umwami wacu Yesu Kristo.

²¹ Mugamburukanire, kuko mwubashe Kristo.

Umubano wo mu rugo rw’Abakristo

²² Bagore, mugamburukire abagabo banyu, nk’uko mugamburukira Umwami wacu.

²³ Kuk’ umugabo ari we mutwe w’umugore wiwe, nk’uko Kristo na we ar’ umutwe w’ishengero, akaba Umukiza waryo, ari wo mubiri wiwe.

²⁴ Ariko nk’ukw ishengero rigamburukira Kristo, abe ari kw abagore bagamburukira abagabo babo muri vyose.

²⁵ Bagabo, mukunde abagore banyu, nk’uko Kristo na we yakunze ishengero, akaryigura,

²⁶ ngw aryeze, aryogesheje amazi n’ijambo,

²⁷ ngw aryīshīre, ar’ ishengero rifise ubgiza, ridafise amarabaga cank’ injebejebe cank’ ikintu cose gisa girtyo, ariko ngo ribe iryera ridafise agasembga.

²⁸ Ni kw abagabo na bo bakwiye gukunda abagore babo nk’imibiri yabo bgite. Ūkunda umugore wiwe, aba yīkunda:

²⁹ kukw ata muntu yigeze kwanka umubiri wiwe, arikw arawugaburira, akawubungabunga, nk’uko Kristo na we agirira ishengero:

³⁰ kuko tur’ ingingo z’umubiri wiwe.

³¹ Ni co gituma umuntu azosiga se na nyina, akabana n’umugore wiwe akaramata, bompi bakaba umubiri umwe.

³² Iryo banga rirahambaye, ariko mbivuze kuri Kristo n’ishengero.

³³ Ariko namwe nyene, umuntu wese akunde umugore wiwe nk’uko yīkunda; umugore na we ni yubahe umugabo wiwe.