Abalewi 25 - Bibliya Yera 1951 1967 (Burundi)

Ivyo kurāza indimiro mu mwaka ugira indwi

¹ Uhoraho abaririra Mose ku musozi Sinayi,

² ati Barira Abisirayeli, yuko ni bashika mu gihugu nzobaha, ico gihugu kize kigire ikiruhuko nk’isabato co kunyubaha jewe Uhoraho.

³ Muze murime mu ndimiro zanyu imyaka itandatu, kandi mur’ iyo myaka itandatu abe ari yo mutūtūriramw’ imizabibu yanyu, mwamure inzabibu zayo.

⁴ Arik’ umwaka ugira indwi uz’ ubere igihugu nk’isabato yo kuruhuka bihebuje, nk’isabato yo kunyubaha jewe Uhoraho: ntimuze muwurimemwo mu ndimiro zanyu, ntimuze muwutūtūriremw’ imizabibu yanyu.

⁵ Ivyimeza bikurikiye ivyo mwimbuye ntimuze muvyimburire mu bigega, canke ngo mwimbure inzabibu zo ku mizabibu yanyu idatūtūriye: uwo mwaka uz’ ubere igihugu uwo kuruhuka bihebuje.

⁶ Mugabo, ivyo mu gihugu vyapfuye kwimeza mur’ ico gihe c’isabato yaco ni vyo bizoba ivyo kurya vyanyu, mwe n’abagurano banyu, n’abaguranokazi banyu, n’ abakozi banyu b’abacangero, n’ abanyamahanga baba muri mwebge;

⁷ kandi n’ibiragirano vyanyu n’ibikōko vyo mu gihugu canyu, ivyimeza vyaco vyose bizobibera ivyo kurya.

Ivy’ umwaka ugira mirongwitanu wa yubile

⁸ Iyo myaka yabaye nk’isabato, muharūre ayo masabato murumye ndwi, muyirumye imyaka ndwi ibihetangabo ndwi; ico gihe muzosanga harimw’ amasabato ndwi y’imyaka, ni yo myaka mirongwine n’icenda.

⁹ Maze ku musi ugira icumi w’ukwezi kw’indwi muze muvugishe inzamba y’ijwi rirenga; ku musi w’impongano az’ abe ari ho muvugisha inzamba mu gihugu canyu cose.

¹⁰ Muze murobanure uwo mwaka ugira mirongwitanu, mutāngāze mu gihugu cose ko habaye umwidegemvyo w’ abantu bose bo muri co: uwo mwaka uz’ ubabere uwa yubile; umuntu wese muri mwebge aheze agaruke mw itongo ryiwe, kand’ umuntu wese agaruke mu b’i wabo.

¹¹ Uwo mwaka ugira mirongwitanu uze wame ubabera uwa yubile; ntimuze muwurimemwo, canke ngo mwimburire mu bigega ivyimejeje muri wo, canke ngo mwimbure inzabibu zo ku mizabibu itātūtūriye.

¹² Kukw ar’ umwaka wa yubile; uze wame ubabera uwejejwe; muzotungwa n’ivyimeza vyo muri wo, vyimejeje mu ndimiro.

¹³ Mur’ uwo mwaka wa yubile umuntu wese muri mwebge az’ agaruke mw itongo ryiwe.

¹⁴ Kandi ni hagira ūgurira ikintu mugenzi we, cank’ akagira ico amuguzeko na we, ntimuze mugungane.

¹⁵ Ukw imyaka ingana, ikurikiye uwa yubile, az’ abe ari k’ūje kugura na mugenzi we atanga ibiguzi; na we az’ amucire nk’ukw imyaka y’ivyimburo ingana.

¹⁶ Uk’ umuntu azobona imyaka igisigaye ari myinshi, az’ abe ari kw adūza igiciro, kand’ ukw azobona ari mike, az’ abe ari kw akimanura; kukw agura arīmbūye igitigiri c’ivyimburo kigisigaye.

¹⁷ Nuko ntimuze mugungane, ariko muntinye, jewe Imana yanyu, kuko nd’ Uhoraho Imana yanyu.

¹⁸ Ni co gituma mukwiye kwumvira amabgirizwa yanje, no kwitondera ivyagezwe vyanje, mukavyumvira; ni ho muzoba mu gihugu amahoro.

¹⁹ Kand’ ico gihugu kizokwimbuka, muzokwama mu gahimbo, mube muri co amahoro.

²⁰ Ariko ni mwavuga, muti Tuzotungwa n’iki mur’ uwo mwaka ugira indwi, ko tutazorima, ntitwimbure?

²¹ Mu mwaka ugira gatandatu nzobarungikira umugisha utuma haba uburumbuke bg’indya zizobatunga imyaka itatu.

²² Mu mwaka ugira umunani ni ho muzorima, kandi muzoba murya ibigugu vyahitikiranijwe; mbere muzoba murya ivyahitikiranijwe gushitsa mu mwaka ugira icenda, mu gihe c’iyimbura.

²³ Amatongo ntaz’ agurwe herandaheze, kukw igihugu ar’ icanje, namwe kuri jewe mukaba akavantara n’ abatsi b’indāro.

²⁴ Kandi mu gihugu cose c’ishamvu yanyu, uwahoze ari nyen’ itongo muze mwemere aricungure.

²⁵ Uw’i wanyu ni yahinduka umugorwa, akagura kw itongo ryiwe, mwene wabo azoba ar’ uwo hafi az’ aze, acungure iryo tongo mwene wabo yaguze.

²⁶ Arik’ umuntu ni yabura uwo kuricungura, akaba yarasubiye gutunga, akabona ibikwiranye na ryo vyo kuricungura,

²⁷ az’ aharūre imyaka ryaguriwemwo, asubize uwariguze ibigisigaye ku giciro caryo, abone ukw asubira gushikīra itongo ryiwe.

²⁸ Ariko n’atashobora kuricungura ubgiwe, iryo ryaguzwe rigumane uwariguze gushitsa ku mwaka wa yubile; maze rizokomōrwa n’uwo mwaka wa yubile, abone ukw asubira gushikīra itongo ryiwe.

²⁹ Umuntu ni yagura inzu yiwe iri mu gisagara gikikijwe n’uruzitiro rw’amabuye, biremerwa kw ayicungura ata mwaka wose urashira; afise uburyo bgo kuyicungura ata mwaka wose urashira.

³⁰ Ariko n’atayicungura uwo mwaka wose utarashira, iyo nzu iri mu gisagara gikikijwe n’uruzitiro izoba yegukiwe n’uwayiguze herandaheze, ukw ibihe vy’urunganwe rwabo bizogenda bikurikirana: ntizokomōrwa n’umwaka wa yubile.

³¹ Arikw inzu zo mu mihana idakikijwe n’uruzitiro rw’ amabuye, zize zibe kimwe n’ amatongo yo mu misozi, biremerwa ko zicungurwa: zizokomōrwa n’umwaka wa yubile.

³² Arikw ibisagara vy’Abalewi vyo si ko bimeze: inzu zo mu bisagara vy’amashamvu yabo, Abalewi biremerwa ko bazicungura aho baboneye uburyo.

³³ Umwe mu Balewi n’adacungura inzu, iyo nzu yaguzwe yo mu gisagara c’ishamvu yabo iz’ ikomōrwe n’umwaka wa yubile: kukw amazu yo mu bisagara vy’Abalewi ar’ ishamvu yabo mu Bisirayeli.

³⁴ Arikw ah’Abalewi baragira inyuma y’ ibisagara vyabo ntihaze hagurwe, kukw ar’ ishamvu yabo y’intahava.

³⁵ Kand’ uw’i wanyu ni yahinduka umugorwa, mukabona afūtānye, mukwiye kumusanasana; mumufashe nk’uko mwofasha akavantara n’umugerērwa.

³⁶ Ntihaze hagire ūmwaka inyungu cank’ ibirenze ku vyo yatwaye, arikw agende antinya jewe Imana yiwe; kugira ng’ uw’i wanyu abone ingen’ abana namwe.

³⁷ Ntaz’ amuguranire amahera kuzohabga ay’inyungu, canke ngw amugurane ivyo kurya kugira ngw aguranurwe ibirenze.

³⁸ Nd’ Uhoraho Imana yanyu, nabakūye mu gihugu ca Egiputa ngo mbahe igihugu c’i Kanani, mbe Imana yanyu.

³⁹ Kand’ uw’i wanyu ni yagorerwa mu maso yanyu, akagira uwo yibunzako ngw amugure, uwo ntaz’ amukoreshe nk’umugurano:

⁴⁰ az’ abane na we nk’umukozi aca ingero canke nk’ umugerērwa; az’ amukorere gushitsa ku mwaka wa yubile.

⁴¹ Ni ho azobona kumuvako, bo n’abana biwe, asubire mu b’i wabo bgite, mw ishamvu ya ba sekuruza;

⁴² kukw ar’ abagurano banje nakūye mu gihugu ca Egiputa: ntibaze bagurwe ngo babe abagurano b’abandi.

⁴³ Ntimuze mubatwaze igitugu, ariko mugende muntinya, jewe Imana yanyu.

⁴⁴ Arikw abagurano banyu n’abaguranokazi muzogira, muze mubakūre mu mahanga abakikije, abe ari ho mubagura.

⁴⁵ Kandi mu bagerērwa bababamwo, bo muremererwa kubaguramwo, bo no mu ruvyaro rwabo bavyariye mu gihugu canyu, abo bakazoba inyegu mwegukiye,

⁴⁶ mukazobaraga n’abana banyu muzosiga, bakabegukira; mur’ abo ni ho mwemererwa gukūramw’ abagurano b’intahava; ariko muri bene wanyu b’Abisirayeli ntihaze habe gutwazanya igitugu.

⁴⁷ Kand’ umunyamahanga cank’ umugerērwa ari muri mwebge ni yahinduka umutunzi, uw’i wanyu agahinduka umugorwa i ruhande yiwe, akibunza kur’ uwo munyamahanga canke kur’ uwo mugerērwa ari muri mwebge, canke ku wo mu b’i wabo wa ben’ uwo, ngw amugure,

⁴⁸ amaze kugurwa ashobora gucungurwa: umwe muri bene wabo yomucungura,

⁴⁹ canke se wabo, canke mwene se wabo, canke mwene wabo wo hafi uw’ ari we wese yomucungura; canke na we ubgiwe ahindutse umutunzi yokwicungura.

⁵⁰ Aharūre imyaka hamwe n’uwo yamuguze, uhereye ku mwaka yamuguriyemwo gushitsa ku mwaka wa yubile: igiciro co kwicungura kize gihwane n’igitigiri c’iyo myaka; igihe yamaranye na we amukorera kize kirīmbūrwe nk’igihe umucangero agererwa yokoze.

⁵¹ Ni yaba imyaka izoba igisigaye ari myinshi, ukw izoba ingana abe ari kw ariha igiciro c’ivyo yaguzwe co kwicungura.

⁵² Ni yaba imyaka yo gushitsa kuri yubile izoba isigaye ari mike, ayirīmbūre hamwe na we ico imaze: ukw iyo myaka izoba ingana abe ari kw ariha igiciro co kwicungura.

⁵³ Az’ abane na we nk’umucangero akorera ingero uk’ umwaka utashe; ntaz’ amutwaze igitugu mu maso yanyu.

⁵⁴ Kandi ni hatagira ikimucungura mur’ ivyo, azomuvako mu mwaka wa yubile, bo n’abana biwe.

⁵⁵ Kukw Abisirayeli ar’ abagurano banje niharije; n’abagurano banje nakūye mu gihugu ca Egiputa: ni jewe Uhoraho Imana yanyu.