Abaheburayo 7 - Bibliya Yera 1951 1967 (Burundi)

Yesu n’umuherezi mukuru mu buryo bga Melekisedeki

¹ Melekisedeki uyo, umwami w’i Salemu, umuherezi w’Imana isumba vyose, ni we yasanganiye Aburahamu, aramuhezagira, hamwe Aburahamu yatabaruka, avuye kunesha abami,

² kandi ni we Aburahamu yagabanirije ikigiracumi muri vyose, irya mbere asobanurwa, ng’ Umwami agororoka, kand’ irya kabiri yitwa Umwami w’i Salemu, risobanurwa, ng’ Umwami w’amahoro.

³ Nta se, nta nyina, nta karonda, nta tanguriro ry’imisi cank’ iherezo ry’ubugingo, arikw agereranywa n’Umwana w’Imana, kandi na ntaryo ahora ar’ umuherezi.

⁴ Nuko mwiyumvire uwo muntu ingen’ ahambaye, uwo Aburahamu sogokuruza mukuru yahaye ikigiracumi co mu minyago iruta iyindi.

⁵ Kandi mu bana ba Lewi, ivyagezwe bigera yukw abahawe ubuherezi batangisha abantu ikigiracumi, ni bo bene wabo, nah’ abo bandurutse mu rura rwa Aburahamu.

⁶ Ariko wa wundi adaharūrwa mu muryango wabo yatangishije Aburahamu ikigiracumi, kand’ ahezagira nyene gusezeranywa.

⁷ Ariko nta wohakana k’uworoshe adahezagirwa n’ūmurengeye.

⁸ Kandi muri twebge, abantu bapfa ni bo bahabga ikigiracumi, ariko muri ya majambo yandi cahawe ūshingirwa intahe kw ariho.

⁹ Kandi twoshobora kuvuga yuko Lewi, umwe ahabga ikigiracumi, na we yari yaragitanze muri Aburahamu,

¹⁰ kuko yar’ akiri mu rura rwa sekuruza, hamwe Melekisedeki yamusanganira.

Ubuherezi bga Yesu buruta ubg’ Abayuda

¹¹ Non’ iyaba gutunganywa rwose kwāzanywe n’ubuherezi bg’Abalewi — kuko ku ngoma yabgo ari ho ubgo bgoko bgāhawe ivyagezwe — n’iki catumye bigikwiye ko haboneka uwundi muherezi wo mu buryo bga Melekisedeki, atavugwa mu buryo bga Aroni?

¹² Iy’ ubuherezi buhindutse, ivyagezwe ntibibura guhinduka na vyo.

¹³ Kuk’ uwavuzwekw ivyo, ar’ uwo mu wundi muryango, utigeze kuvamw’ uwakoze igikorwa co ku gicaniro.

¹⁴ Birazwi yuk’ Umwami wacu yakomotse kuri Yuda, kand’ uwo muryango Mose nta co yawuvuzeko c’ubuherezi.

¹⁵ Ivyo birushiriza guseruka rwose, ko haboneka uwundi muherezi, ahwanye na Melekisedeki,

¹⁶ atāhawe ubuherezi n’uko vyashinzweho n’ivyagezwe vyo mu buryo bg’abantu, ariko yahawe ubushinzwe n’ubushobozi bg’ubugingo budashobora gukūrwaho.

¹⁷ Kukw ashingirwa intahe, ng’ Ur’ umuherezi ibihe bidashira, Mu buryo bga Melekisedeki.

¹⁸ Nuko rer’ icagezwe ca mbere cakūweho kubg’ inkomezi nke zaco n’ikimazi gike,

¹⁹ (kukw ivyagezwe bitigeze kugira ico bihīngūra rwose) hasubizwah’ ivyizigiro bikiruta, biduhesha kwegera Imana.

²⁰ Kand’ ivyo ntivyabaye hatarih’ indahiro.

²¹ Abalewi bo bāhawe ubuherezi ata ndahiro; arikw iyabuhaye uyo yararahiye, imubgiye, it’ Uhoraho ararahiye, ntazokwicuza, At’ Ur’ umuherezi ibihe bidashira.

²² Uko ni ko Yesu yabaye umwishinzi w’isezerano riruta rya rindi.

²³ Kandi ba bandi bābaye abaherezi benshi, kuk’ urupfu rubabuza kwamaho;

²⁴ arik’ uyo we, kuko yamah’ ibihe bidashira, afise ubuherezi budakūrwaho.

²⁵ Ni co gituma ashobora gukiza rwose abashikīra Imana kubgiwe, kuko na ntaryo yamaho ngw abasabire.

²⁶ Vyari bitubereye kugira umuherezi mukuru ameze artyo, yera, atagira ubugunge, atanduye, yatandukanijwe n’abanyavyaha, yashizwe hejuru y’amajuru,

²⁷ atarinda kubanza gutanga ibimazi vy’ivyiwe vyaha uko bukeye, nka ba baherezi bakuru bandi, hanyuma agatanga ivy’ abandi bantu. Kukw ivyo yabikoze rimwe, hamwe yitanga.

²⁸ Ivyagezwe bishirah’ abanyantege nke kuba abaherezi bakuru, arikw ijambo ry’indahiro yaherukiye ivyagezwe rishirah’ Umwana w’Imana yahīngūwe rwose gushitsa ibihe bidashira.