Abacamanza 7 - Bibliya Yera 1951 1967 (Burundi)

Ingene Gideyoni yasigaranye ingabo amajana atatu

¹ Yerubayali, ari we Gideyoni, n’abantu bose bari kumwe na we, bazinduka kare, baragenda basagaza kw iriba ry’i Harodi, kand’ Abamidiyani bari bashagaje ahahera i burārūko bgabo, ahēgeranye n’umusozi More, mu kiyaya.

² Maz’ Uhoraho abarira Gideyoni, at’ Abantu muri kumwe ni benshi kurenza urugero: kubg’ ivyo sinshobora kugabura Abamidiyani mu maboko yabo, kugira ngw Abisirayeli boye kunyishirako hejuru, bat’ Ubutōre bgacu ni bgo bgadukijije.

³ None genda ubitāngāze, abantu bavyumve, ut’ Umuntu wese afise akōba atinya, n’atahe, ave kur’ uyu musozi Gileyadi. Nuko hataha abantu ibihumbi mirongwibiri na bibiri, hasigara ibihumbi cumi.

⁴ Uhoraho yongera kubarira Gideyoni, ati N’ubu abantu baracari benshi kurenza urugero; bamanukane ku mazi, nanje ndabagusuzumire; maz’ uwo nja kukubarira kw ari we mujana, abe ari we mujana nyene; arik’ uwo nja kukubarira, nti Ntimujane, uwo we ntagende.

⁵ Nukw amanukana abo bantu ku mazi, maz’ Uhoraho abarira Gideyoni, at’ Umuntu wese aja gusabagira amazi n’ ururimi nk’imbga, umushire ukwiwe; kandi n’ūja gupfukama mu kunywa na we umushire ukwiwe.

⁶ Igitigiri c’abānyoye basabagiye ku mashi yabo car’ amajana atatu; arikw abandi bose bārapfukamye mu kunywa amazi.

⁷ Maz’ Uhoraho abarira Gideyoni, at’ Abo bantu amajana atatu banyoye basabagira ni bo nzobakirisha, ngabure Abamidiyani mu maboko yawe; abandi bose ni bītahire.

⁸ Nukw abo amajana atatu bāka abo bandi impamba zabo n’inzamba zabo. Maze Gideyoni arungika abo Bisirayeli bose bacaguwe, umuntu wese asubira i we, asigarana n’abo amajana atatu. Kand’ Abamidiyani bari bashagaje mu kiyaya hepfo yabo.

Gideyoni aja gutata Abamidiyani

⁹ Ijoro ry’uwo musi Uhoraho aramubarira, ati Va hasi, umanuke aho bashagaje, kuko mbagabuye mu maboko yawe.

¹⁰ Ariko ni waba utinya kumanukayo, jana n’uwo muntu wawe Pura umanuke aho bashagaje;

¹¹ wumvirize ivyo bavuga; ni ho uja kurema, ubone kumanuka kubatera. Nukw amanukana n’umuntu wiwe Pura, bashikira ku ngabo za mbere ziteramye aho bashagaje.

¹² Kand’ Abamidiyani n’Abamaleki n’ab’i burasirazuba bose bari bajimagije ico kiyaya, ar’ amasinzi nk’inzige, n’ingamiya zabo zitoharūrika, ar’ amasinzi nk’umusenyi wo kw isēsero ry’ikiyaga.

¹³ Nuko Gideyoni ashitseyo, yumva umuntu arotorera inzozi mugenzi we, ati Ndose inzozi, mbona irobe ry’umutsima wa sayiri ritembagara, rishika mu nsago z’Abamidiyani, ryikubita kw ihema, iryo hema rirubama, rirambarara hasi.

¹⁴ Mugenzi we aramwishura, ati Nta kindi, iyo n’inkota ya Gideyoni mwene Yowasi, w’Umwisirayeli. Imana yagabuye Abamidiyani n’ingabo zabo zose mu maboko yiwe.

¹⁵ Nuko Gideyoni yumvise izo nzozi n’uko zisobanuwe, ashima Imana, asubira mu nsago z’Abisirayeli, arababarira, ati Ni mukūre hasi, kuk’ Uhoraho agabuye ingabo z’Abamidiyani mu maboko yanyu.

¹⁶ Nukw abo bantu ukw ar’ amajana atatu abagabanyamw’ imitwe itatu, umuntu wese amuha inzamba n’umubindi uri gusa, urimw’ urumuri.

¹⁷ Arababarira, ati Muje kundābirako: uko nja gukora abe ari ko mukora; ni twashika ku nsago za mbere, uko nja kugira namwe mugire kuno.

¹⁸ Ni navuza inzamba, jewe n’abo turi kumwe bose, namwe muce muvuza inzamba ku mpande zose z’aho bashagaje, mwihe akaruru, muti Kubg’ Uhoraho na Gideyoni!

Gideyoni atera Abamidiyani

¹⁹ Nuko Gideyoni n’abantu ijana bajanye na we bashika ku nsago za mbere, igihe umuteramyi wa kabiri agitanguye, ari ho bakimuvyutsa; nuko baca bavuza inzamba, bamenagura ya mibindi bari bafise mu ntoke.

²⁰ Nuko ya mitwe ukw ar’ itatu baca bavuza inzamba, bamenagura ya mibindi, bafatisha za muri ukuboko kw’i bumoso, inzamba bazifatisha ukw’ i buryo mu kuvuza; biha akaruru, bat’ Inkota n’iy’ Uhoraho na Gideyoni!

²¹ Umuntu wese ahagarara aho yar’ ari, bakīkūje izo nsago; maz’ ingabo zose zirashikuka, bavuza induru barahunga.

²² Nuko bakomeza kuvuza za nzamba ukw ar’ amajana atatu, maz’ Uhoraho atuma Abamidiyani basubiranamwo, bazibagurana inkota mu ngabo zose; maz’ ingabo zisigaye zirahunga, zirinda zishika i Betishita ku nzira ija i Zerera, zishika no ku rubibe rw’i Abeli‐mehola ahahereranye n’i Tabati.

²³ Batabaza Abisirayeli bo mu Banafutali n’abo mu Basheri n’abo mu Bamanase bose, bōma inyuma y’Abamidiyani.

²⁴ Gideyoni atuma intabaza mu mugamba wose w’Abefurayimu, kubabarira ngo bamanuke batege Abamidiyani, babatange ku majabukiro kurinda bashitsa i Beti‐bara no kuri Yorodani. Nukw Abefurayimu bose baratabara, babatanga ku majabukiro kurinda bashitsa i Beti‐bara no kuri Yorodani nyene.

²⁵ Bafata abaganwa bompi b’Abamidiyani, Orebu na Zebu; Orebu bamwicira ku gitandara citwa Orebu nyene, Zebu bamwicira ahar’ ubgato baganiramwo vino, hitwa i Zebu; bakomeza kwōma inyuma y’Abamidiyani, bazanira Gideyoni imitwe ya Orebu na Zebu bayimusanza hakurya ya Yorodani.