3 Yohana 1 - Bibliya Yera 1951 1967 (Burundi)

Yohana ashima igikorwa ca Gayo

¹ Jewe umushingantahe ndakwandikiye Gayo umukundwa, nkunda vy’ukuri.

² Mukundwa, ndagusengera ng’umererwe neza muri vyose, uhore uhangaye, nk’uk’ ubugingo bgawe bumerewe neza.

³ Kuko nanezerewe cane hamwe bene Data baza bagashingira intahe ukuri kwawe, yuk’ ugendera mu kuri.

⁴ Nta wundi munezero mfise uruta uyu, kwumva kw abana banje bagendera mu kuri.

⁵ Mukundwa, wama uyoboka mu vy’ ukorera bene Data vyose, kand’ ar’ injabuka:

⁶ na bo bashingiye intahe urukundo rwawe mu maso y’ishengero. Kand’ uzoba ugize neza ni wabarungika, uko bibereye ab’ Imana.

⁷ Kuko bavuye i wabo kubg’ Izina rya Yesu, ata co batse abanyamahanga.

⁸ Nuko twebge dukwiye kwākīra neza abameze bartyo, kugira ngo dufatanye n’ukuri gukora igikorwa.

Imivurungano yari mw ishengero

⁹ Har’ ico nandikiye ishengero: ariko Diyotirefe, akunda kwishira imbere muri bo, ntatwemera.

¹⁰ Ni co gituma, ni naza, nzobibutsa ivy’ akora, atuvuga amagambo mabi y’ubupfu, kandi ntagarukiza kur’ ivyo gusa, arik’ ubgiwe ntiyākīra bene Data, n’ababigomba arababuza, akabaca mw ishengero.

¹¹ Mukundwa, ntukīgāne ikibi, ariko wīgāne iciza. Ūkora ivyiza ni we w’Imana; ūkora ibibi ntiyabonye Imana.

¹² Demetiriyo ashingirwa intahe na bose, kandi n’ukuri ubgakwo kurayimushingira: natwe nyene turayimushingira; nawe urazi kw ivyo dushingira intahe ar’ ivy’ ukuri.

¹³ Nari mfise vyinshi vyo kukwandikira, mugabo singomba kukwandikishiriza wino n’ikaramu:

¹⁴ ariko nizigiye ko nzokubona vuba, tukazovugana imbonankubone.

¹⁵ Amahoro abane nawe. Abakunzi barakuganutsa. Untahirize abakunzi, ukw amazina yabo angana.