2 Timoteyo 3 - Bibliya Yera 1951 1967 (Burundi)

Ibibi bizoza mu gihe c’iherezo

¹ Arik’ umenye yuko mu misi y’iherezo hazoza ibihe bigoye.

² Kukw abantu bazoba bikunda gusa, bakunda amahera, bīrārīra, bībona, batukana, batumvira abavyeyi, intashima, abanegura ivy’ Imana,

³ badakunda n’ababo, banka kwuzura, barementanya, batigarura, inkazi, badakunda ivyiza,

⁴ abaguranyi, ibirandamuke, abikakisha, bakunda ibibahimbara bakabirutisha Imana,

⁵ bafise ishusho yo kwubaha Imana, ariko bahakana ubushobozi bgakwo: abameze bartyo wame ubatera ibitugu.

⁶ Kuko muri bo harimw’ abagabo banyegetera mu mazu, bagatwara abagore batagira imitima, baremerewe n’ivyaha, batwarwa n’ukwifuza kw’ uburyo bginshi,

⁷ bama biga, ariko nta ho bashobora gushitsa ku kumenya ukuri.

⁸ Nk’uko Yane na Yambure bārwanije Mose, ni ko n’abo bagabo barwanya ukuri, abo n’abononekaye ubgenge, babaye ibihombe ku kwizera.

⁹ Mugabo ntibazoshobora kurengaho: kuk’ ubusazi bgabo buzogaragarira abantu bose, nk’uk’ ubga ba bandi bgagaragaye.

Ivyanditswe vyera ni vyo bizigama umuntu mu mutima

¹⁰ Ariko weho wakurikiye neza ukwigisha kwanje, n’ingeso, n’imigabo, n’ukwizera, n’ukutarambirwa, n’urukundo, n’ukwihangana,

¹¹ no guhamwa, n’imibabaro, nk’ivyambereyeko muri Antiyokiya no muri Ikoniyo n’i Lusitira; ivyo nihanganiye vyose mpamwa, kandi vyose Umwami wacu arabinkiza.

¹² Mber’ abagomba bose kugenda bubaha Imana bari muri Kristo Yesu, bazohamwa.

¹³ Arikw abantu babi, bo n’abahūmbūzi, bazorushiriza kuba babi, bazimiza bakazimizwa.

¹⁴ Ariko weho ugume mu vyo wize, ukavyizezwa, kuk’ uzi abākwigishije:

¹⁵ kand’ uzi yuk’ uhereye mu buto bgawe wamye uzi ivyanditswe vyera bishobora kukumenyesha ubgenge bgo kukuzanira agakiza gaheshwa no kwizera Kristo Yesu.

¹⁶ Ivyanditswe vyose vyahumetswe n’Imana, kandi bigira ikimazi co kwigisha umuntu, no kumuhana, no kumutunganya, no kumutoza indero nziza mu kugororoka:

¹⁷ kugira ng’ umuntu w’Imana abe ūshitse, afise ibimukwiye vyose, ngw akore igikorwa ciza cose.