2 Samweli 13 - Bibliya Yera 1951 1967 (Burundi)

Amunoni yonona mushiki we Tamari

¹ Hanyuma y’ivyo ivyābaye n’ibi: Abusalomu mwene Dawidi yar’ afise mushiki we mwiza w’umunyakaranga, yitwa Tamari. Bukeye Amunoni mwene Dawidi nyene aramugomwa.

² Amunoni atuntuzwa no kwifuza mushiki we Tamari, biranamurwaza; kuko yar’ inkumi igumije ibanga, Amunoni akamubura uburyo.

³ Ariko Amunoni yar’ afise umugenzi bakundana yitwa Yonadabu mwene Shimeya, Shimeya mukuru wa Dawidi; kandi Yonadabu uwo yar’ umuntu w’incabgenge.

⁴ Aramubaza, ati Mbega mwana w’umwami, k’ugenda ushira umunywera imisi yose, ntiwombgira icabiguteye? Amunoni aramwishura, ati Nagomwe Tamari mushiki wa Abusalomu mwene data.

⁵ Yonadabu aramubgira, ati Genda wiryamire ku buriri bgawe, wirwaze; maze so ni yaza kurāba uko umeze, umubarire, uti Ndasavye mundungikire mushikanje Tamari, aze ampēreze utwo ntamira; uti Kand’ abironderere imbere yanje aho mbona, uti Maz’ ubgiwe abimpēreje, ni ho nobirya.

⁶ Nuko Amunoni araryama, arirwaza; maz’ umwami aje kurāba ukw ameze, Amunoni aramubgira, ati Ndasavye mundungikire mushikanje Tamari, andonderere udukāte tubiri aho mbona, maz’ abe ari we atumpēreza; ni ho norya.

⁷ Maze Dawidi atuma i muhira kuri Tamari, uti Genda kwa musazāwe Amunoni, umuronderere utwo kurya.

⁸ Nuko Tamari aja kwa Amunoni musaza we, asanga aryamye; yābīra igikandu, akibumbabumbamw’ udukāte Amunoni abona, aradukaranga.

⁹ Yābīra ico yakaranzeko, aratumusukira, ariko yanka kurya. Maze Amunoni aravuga, ati Bose ni bataramuke. Nuko barataramuka bose.

¹⁰ Maze Amunoni abarira Tamari, ati Nzanira mu mpete utwo warondeye, unyīhēre mbone kurya. Nuko Tamari yābīra utwo dukāte yarondeye, adushīra musaza we Amunoni haruguru mu mpete.

¹¹ Atumuhēreje ngw arye, Amunoni aramucakira, aramubgira, at’ Enda mushikanje, n’uze turyamane.

¹² Na we aramwishura, at’ Oyaye, mwana wa data, reka kunyambika ibara, kuko ben’ ivyo bidakwiye gukorwa mu Bisirayeli; reka gukora ikizira nk’ico.

¹³ Mbega nanje noheza ngakwirwa hehe n’ibitētērwa? Kandi nawe woba ugotse mu Bisirayeli. Enda se n’ubivugane n’umwami, kukw atokunyima.

¹⁴ Ariko yanka kwumva ivyo amubgiye; maze kuko yamurusha inkomezi amufata ku kagōbēro, aryamana na we.

¹⁵ Maze Amunoni aca amwanka urunuka; urwanko yamwanse rwaruse urukundo yamukunda. Aramubgira, ati Hoji va hasi ugende.

¹⁶ Na we aramwishura, at’ Oyaye si ko, kuko kunyirukana ari bibi kuruta ivyo umaze kungirira. Ariko yanka kwemera.

¹⁷ Maz’ ahamagara umuntu wiwe amusukurira, ati Sohora uyu mukobga amve i ruhande, umwugaranire hanze.

¹⁸ Kandi yari yambaye umwambaro muremure w’amaboko, kukw abakobga b’umwami bakir’ abigeme ari ko bambara. Nuk’ uwo musuku wiwe aramusohora, aramwugarana.

¹⁹ Maze Tamari yiyorera umunyota mu mutwe, yitantamurirako wa mwambaro wiwe w’amaboko, yiremēka ukuboko, agenda ararira ingenda, aboroga.

²⁰ Maze Abusalomu musaza we amubonye, aramubaza, at’ Aho ntiwamanye na musazāwe Amunoni? Enda ni wiyihorerere, mwana wa mama; erega kw ari musazāwe, reka kubishirak’ umutima. Nuko Tamari aguma kwa musaza we Abusalomu yifumbereje.

²¹ Maz’ umwami Dawidi yumvise ivyo vyose, araraka cane.

²² Kandi Abusalomu ntiyaba akigira ico avugana na Amunoni, ari kibi ari ciza, kuko Abusalomu yar’ agiriye Amunoni urwanko, kuko yononye mushiki we Tamari.

Abusalomu yica Amunoni, amuhōye Tamari

²³ Hashize imyaka ibiri yiramvuriye, Abusalomu arārika abamukemurira intama i Bayali‐hasori, hāri hahereranye n’i Bgefurayimu; maz’ atumira abana b’umwami bose.

²⁴ Aragenda abarira umwami, ati Jewe umusavyi wawe ndafise abankemurira intama; none ndakwinginze mugenzi, mwe n’abantu bawe muze tujane.

²⁵ Umwami yishura Abusalomu, at’ Oyaye mwananje, ntitwojana twese, ngo tuje kukurusha. Abusalomu aramugōbēra, ariko yanka kugenda, mugabo aramuhezagira.

²⁶ Maze Abusalomu aramubarira, ati None rero k’utaje, urungike mukurwanje Amunoni, aze tujane. Umwami aramubaza, at’ Ugombera iki ko mujana?

²⁷ Ariko Abusalomu aramuzigitīra, umwami araruha aremera ko Amunoni n’ abandi bana biwe bose bajana na we.

²⁸ Nuko Abusalomu arahava abarira abasuku biwe, ati Muje muritegereza Amunoni: ni mwabona amaze guhimba vino, nkababarira, nti Ni muzibagure Amunoni; nuko muce mumwica, ntimutinye: none si jewe nzoba ndabibabariye? Nuko mugumye imitima, mube abahizi.

²⁹ Nukw abo basuku ba Abusalomu bagira Amunoni nk’uko Abusalomu yababariye. Maz’ abana b’umwami bose baca barabatagurika, umuntu wese asimbira ku nyumbu yiwe, barahunga.

³⁰ Bakiri mu nzira, imbitsi ibikira Dawidi ko Abusalomu yishe abana b’umwami bose, ngo Ntihasigaye n’umwe.

³¹ Maz’ umwami arabaduka, yitantamurirakw impuzu ziwe, arambarara mw ivu; n’ abantu biwe bose bamuhagaze i ruhande na bo bitantamurirakw impuzu zabo.

³² Maze Yonadabu mwene Shimeya, Shimeya mukuru wa Dawidi, aramubarira, ati Mugenzi, erega ntugire ngo bishe abana bawe bose; Amunoni wenyene ni we yapfuye; kukw ivyo Abusalomu yabigabiye guhēra umusi Amunoni yonona mushiki we Tamari.

³³ Nuko none mwami wanje nyen’ ingoma, izo nkuru ureke kuzemera ngo wiyumvire kw abana bawe bose bapfuye, kuko hapfuye Amunoni wenyene.

³⁴ Kandi Abusalomu yari yahunze. Maz’ umuhungu yar’ ashibamye, yunamuye amaso, abona haje abantu benshi, baturutse mu nzira iva i Horonayimu ikikamanye umusozi.

³⁵ Maze Yonadabu abarira umwami, at’ Eh’ abana bawe baraje; nk’uko jewe umusavyi wawe nabivuze, ni ko bibaye.

³⁶ Akirangiza kuvuga, abana b’ umwami barashika, maze baraturikisha bararira; n’umwami na we nyene n’abantu biwe bose bararira baraboroga.

³⁷ Ariko Abusalomu we yari yahunze, aja ku mwami w’i Geshuri, Talumayi mwene Amihuri. Kandi Dawidi yamana akabonge k’umwana wiwe imisi yose.

³⁸ Abusalomu amara imyaka itatu i Geshuri iyo yahungiye.

³⁹ Hanyuma umwami Dawidi amugirira inkumbu nyinshi, kuko yar’ amaze gushira umubabaro w’urupfu rwa Amunoni.