1 Samweli 5 - Bibliya Yera 1951 1967 (Burundi)

Imana itēza Abafilisitiya ivyago kubg’ isandugu yayo

¹ Abafilisitiya bafashe mpiri isandugu y’Imana, bayikūra i Ebenezeri bayijana i Ashidodi.

² Baraheza bayinjiza mu ngoro ya Dagoni, bayitereka i ruhande ya Dagoni nyene.

³ Bukeye mu mavyuka ya kare Abanyashidodi basanga Dagoni yatemvye yubamye imbere y’isandugu y’Uhoraho; barayegura, bayisubiza ahantu hayo.

⁴ Bukeye bgaho, mu mavyuka ya kare nyene, basanga Dagoni yongeye gutemba yubamye imbere y’isandugu y’Uhoraho, kand’ umutwe n’ibikonjo vyayo vyahimbaguritse vyayivuyeko, bitembagara mu rwinjiriro; hari hasigaye umutumba wayo gusa.

⁵ Ni co gituma abaherezi ba Dagoni n’uwinjira mu ngoro yayo wese, bitonda kudakandagira mu rwinjiriro rw’ ingoro ya Dagoni yo muri Ashidodi gushitsa n’ubu.

⁶ Maz’ ukuboko kw’Uhoraho gushikamira Abanyashidodi n’abāhakūkira, arabageseza, abatērēra ibihute.

⁷ Abanyashidodi babonye bibaye birtyo baravugana, bat’ Isandugu y’Imana y’Abisirayeli ntikagume muri twebge, kuk’ ukuboko kwayo kudushikamiye, twe na Dagoni imana yacu.

⁸ Ni kwo gutuma ku baganwa b’Abafilisitiya bose, bakoraniraho barababaza, bati Mbeg’ isandugu y’Imana y’ Abisirayeli tuyigenze dute? Barabishura, bati Ni bayijane i Gati. Nuko bajanay’ iyo sandugu y’ Imana y’Abisirayeli.

⁹ Bamaze kuyishikanayo, ukuboko kw’Uhoraho kurwanya ico gisagara, kubaca ivutu; atērēra ibihute abo mur’ ico gisagara, abato n’abakuru, bisēsa ku mibiri yabo.

¹⁰ Nukw iyo sandugu y’Imana bayirungika i Ekuroni. Igiserukayo, Abanyekuroni bavuza induru, bati Batuzaniye ya sandugu y’Imana y’Abisirayeli ngw itumarane n’ abacu!

¹¹ Ni kwo gutuma ku baganwa bose b’Abafilisitiya, bakoraniraho, barababgira, bati Ni murungike iyi sandugu y’Imana y’Abisirayeli, isubire aho yahora, ireke kutumarana n’abacu; kuko mur’ ico gisagara cose urupfu rwari rwabaciye ivutu, kand’ ukuboko kw’Imana kwari kubashikamiye cane.

¹² Abatāpfuye batērērwa ibihute; induru z’ico gisagara zishika mw ijuru.