1 Samweli 17 - Bibliya Yera 1951 1967 (Burundi)

Goliyati akēngēra Abisirayeli

¹ Maz’ Abafilisitiya bakoranya ingabo zabo ngo batere; bazikoraniriza i Sokoho h’i Buyuda, basagaza ahitwa Efesi‐damimu, hagati y’i Sokoho n’i Azeka.

² Sauli n’Abisirayeli na bo barakorakorana, basagaza ku mwonga Ela, batonda urugamba ngo barwanye Abafilisitiya.

³ Abafilisitiya batonda ku musozi wo hakurya, Abisirayeli ku wo hakuno, umwonga ugaca hagati yabo.

⁴ Bukeye mu nsago z’Abafilisitiya havamw’ umuhizi yitwa Goliyati w’i Gati; uburebure bgiwe bgar’ amatambge atandatu y’ukuboko uciriye mu nkokora n’itambge rimwe ry’intoke.

⁵ Kandi yari yambaye inkofero y’umuringa mu mutwe, n’umwinjiro ukozwe mu miringa, urivye shekeli ibihumbi bitanu;

⁶ ku maguru yari yambaye ibikingira imirundi bikozwe mu miringa; kandi yar’ afise agakobero k’umuringa nyene gatendera inyuma mu butīkorwa.

⁷ Uruti rw’icumu ryiwe rwāngana n’umwaro ujishirwakw impuzu, icumu ubgaryo ryar’ iryo mu vyuma, ryari ririvye shekeli amajana atandatu; kand’ uwamutwaza inkinzo yaja imbere yiwe.

⁸ Arahagarara, atera akamo ingabo z’Abisirayeli, ati N’iki cabazanye gutonda urugamba? Mbega sind’ Umufilisitiya, namwe mukaba abaja ba Sauli? Enda ni mwitorere umuntu, amanuke aze duhwane!

⁹ Ni yashobora kundwanya akanyica, tuzoba abaja banyu; nanje ni nashobora kumutsinda nkamwica, ni mwebge muzoba abaja bacu, mudukorere.

¹⁰ Uwo Mufilisitiya arongera aravuga, at’ Uyu musi ndagaye ingabo z’Abisirayeli! Enda ni muzane umuntu, twimarize twempi!

¹¹ Maze Sauli n’Abisirayeli bose bumvise ayo magambo y’Umufilisitiya, barīhebūra, bagira ubgoba bginshi.

Dawidi yumva Goliyati acōkōra Abisirayeli

¹² Kandi Dawidi yar’ umwana wa wa Munyefurata w’i Betelehemu h’i Buyuda yitwa Isayi; Isayi yar’ afise abahungu munani; kand’ igihe Sauli yīma Isayi yar’ ashitse mu zabukuru.

¹³ Kand’ abahungu batatu bakuru ba Isayi bāri bāratabaranye na Sauli; amazina y’abo bahungu biwe batatu bātabaye, uw’ imfura ni Eliyabu, uwa kabiri ni Abinadabu, uwa gatatu ni Shama.

¹⁴ Dawidi ni we yar’ umuhererezi; kand’ abo bakuru be batatu bāri bāratabaranye na Sauli.

¹⁵ Kandi Dawidi yaja agīshanya imbu, hamwe akaba kwa Sauli, ahandi akaja kuragira intama za se i Betelehemu.

¹⁶ Nuk’ uwo Mufilisitiya, uko bukeye uko bgije, akāma aseruka ahibonekeza, abasomboroza, kumara imisi mirongwine.

¹⁷ Bukeye Isayi abarira umuhungu wiwe Dawidi, ati Genda ugemurire bakuru bawe ingero imwe kur’ izi ngano zikaranze, n’iyi mitsima cumi, ubandanye aho bashagaje, ubibashīre.

¹⁸ Kand’ ugemurire umugabisha w’umuce barimwo, aya masoro ukw ar’ icumi y’umukānyūre w’amavuta; uheze urābe bakuru bawe uko bameze, unzanire agakuru k’imvāho.

¹⁹ Kandi Sauli n’abo bakuru ba Dawidi n’ingabo zose z’Abisirayeli bāri kuri wa mwonga Ela bashāmiranye n’Abafilisitiya.

²⁰ Nuko Dawidi akoroka kare, asigarana intama ūzimurābira, ahitana ivyo bintu aragenda, nk’uko Isayi yamubariye, ashikira aho barāza imikogote y’intambara, ahūra ingabo zigiye gutonda urugamba zīrahira ubutōre.

²¹ Nukw Abisirayeli batonda urugamba, n’Abafilisitiya n’uko, urugamba ruhanganye n’ urundi.

²² Maze Dawidi abītsa ivyo yar’ agemuye ūsigarana ibintu vy’intēkera, ariruka aja mu ngabo, aramutsa bakuru be.

²³ Akirikw arayāga na bo, wa muhizi w’Umufilisitiya w’i Gati yitwa Goliyati asokoroka mu ngabo z’Abafilisitiya, atangura kwiyamāmura nk’ uko yahora. Dawidi aravyumva.

²⁴ Abisirayeli bose bamubonye, bacika ivutu baramuhunga.

²⁵ Abisirayeli baravuga, bati Ntimubona uriya mugabo adūze? Adūganywe no gucōkōra Abisirayeli, nta kindi. Umuntu yomwica, umwami azomugororera vyinshi, kand’ azomushingira umwana wiwe, akūre n’inzu ya se kw ikori mu Bisirayeli.

²⁶ Maze Dawidi abaza abantu bahagaze i ruhande yiwe, at’ Uwokwica uwo Mufilisitiya, agakūra igitutsi ku Bisirayeli, bomugororera iki? Mbeg’ uwo Mufilisitiya w’intakebga n’iki, ah’ acōkōra ingabo z’Imana nzima?

²⁷ Abantu bamwishura nk’ivyo bari bahejeje kuvuga, bat’ Uwomwica, uko ni ko yogororerwa.

²⁸ Maze Eliyabu mukuru we, imfura ya se, yumvise Dawidi avugana n’abo bantu, uburake bgiwe buraziriringa, aramubaza, ati Wazanywe n’iki? Mbega bga butama wabusigaranye nde mu bugaragwa? Ndazi amanyama yawe, n’ ubugāba bgo mu mutima wawe: ereg’ icakuzanye n’ukugira ng’ urābe intambara.

²⁹ Dawidi aramwishura, ati None nkoze iki? Ntikwar’ ukubaza gusa?

³⁰ Arahindukira, arāba uwundi, na we amubaza nk’ivyo, abantu basubira kumwishura nk’ivya mbere.

Dawidi yica Goliyati

³¹ Bumvise amajambo Dawidi avuga, bayashengerana kwa Sauli; araheza aramuhamagaza.

³² Dawidi ashitse, abarira Sauli, ati Ntihagire uwo arandura umutima; jewe umusavyi wawe ndagiye kurwana n’uwo Mufilisitiya.

³³ Sauli yishura Dawidi, ati Ntiwoshobora kuja kurwanya uwo Mufilisitiya, kuk’ ukir’ umwana, ariko we yamenyereye kurwana uhereye mu buto bgiwe.

³⁴ Dawidi yishura Sauli, ati Jewe umusavyi wawe iyo ndagiye intama za data, hakaza intambge cank’ idubu kigasahura umwana w’intama mu mukuku,

³⁵ twāca tugerekerana nkagikubita, nkakiyāka mu kanwa; cāmvumbukana nkagisūmira urusakanwa, nkagikubita nkacica.

³⁶ Non’ umusavyi wawe ko namaze kwica intambge n’idubu, n’uwo Mufilisitiya w’intakebga azopfa nka kimwe muri vyo, kuko yacōkōye ingabo z’Imana nzima.

³⁷ Dawidi atakw aravuga, at’ Uhoraho yagiye andokora mu nzāra z’intambge no mu z’idubu, arandokora no mu maboko y’uwo Mufilisitiya. Nuko Sauli abarira Dawidi, ati Nuko genda; Uhoraho abane nawe.

³⁸ Maze Sauli yambika Dawidi imyambaro yiwe, amwambika n’inkofero y’umuringa mu mutwe, n’umwinjiro w’ ivyuma.

³⁹ Dawidi araheza ahagatira inkota yiwe hejuru y’iyo myambaro, agerageza gutambuka ngw arābe, kukw atabimenyereye. Maz’ abarira Sauli, at’ Ibi sinshobora kubijana, kuko ntābimenyereye. Nuko Dawidi aravyiyambura.

⁴⁰ Araheza ahitana inkoni yiwe, ashitse ku kagezi, atoramw’ amabuye y’imburungu atanu, ayarokeza mw isaho yiwe y’ubgungere; kandi yar’ afise umugozi mu ntoke wo guteresha ibuye; nukw aja guhūra na wa Mufilisitiya.

⁴¹ Wa Mufilisitiya na we aza guhūra na Dawidi, ūmutwaje inkinzo amutamaje imbere.

⁴² Nuko wa Mufilisitiya abonye Dawidi, aramwitegereza, aramukēngēra, kuko yar’ akir’ umwana w’umusore, kandi yar’ inzobe w’umunyakarānga.

⁴³ Wa Mufilisitiya abaza Dawidi, ati Mbeg’ ugira ngo nd’ imbga, k’uje kundwanya ufise inkoni? Araheza avuma Dawidi mu mazina y’imana ziwe.

⁴⁴ Uwo Mufilisitiya abarira Dawidi, ati Ngwino nkubāgire ibisīga vyo mu kirēre n’ibikōko vyo mw ishamba!

⁴⁵ Dawidi yishura uwo Mufilisitiya, at’ Uje kundwanya ufise inkota n’icumu n’agakobero, ariko jewe nje kukurwanya mw izina ry’Uhoraho Nyen’ ingabo, Imana y’ingabo z’Abisirayeli wacōkōye.

⁴⁶ Uyu musi Uhoraho arakugabuye mu maboko yanje; ngira nkwice, nguce izosi; kand’ imivyimba y’ingabo z’Abafilisitiya ngira ndayigaburire ibisīga vyo mu kirēre n’ibikōko vyo mw ishamba, kugira ngw isi yose imenye ko mu Bisirayeli har’ Imana;

⁴⁷ kand’ iri koraniro ryose rimenye yuk’ Uhoraho adakirisha inkota cank’ icumu, kukw intambara ar’ iy’ Uhoraho, kandi ni we agira abagabure mu maboko yacu.

⁴⁸ Nuko wa Mufilisitiya atanguye kuza ngw ahūre na Dawidi, Dawidi arabandanya ariruka atumbereye ingabo z’Abafilisitiya, ngw ahūre n’uwo Mufilisitiya nyene.

⁴⁹ Maze Dawidi atuma ukuboko mw isaho yiwe, akūray’ ibuye, ariteresha wa mugozi, arinega uwo Mufilisitiya mu ruhanga, rimwiteramwo, aca yikubita hasi yubamye.

⁵⁰ Uko ni ko Dawidi yagangahuje uwo Mufilisitiya ibuye yateresheje umugozi, akamwica; kandi nta nkota Dawidi yari yitwaje.

⁵¹ Maze Dawidi arirukanga, amuhagarara hejuru, asūmira inkota yiwe, ayimusokōra mu rwubati, aramuhohosha, amuca izosi. Maz’ Abafilisitiya babonye umuhizi wabo apfuye, baca baratemesha.

⁵² Maz’ ingabo z’Abisirayeli n’iz’ Abayuda zikūra hasi, zishira urwamo hejuru, zikinagiza Abafilisitiya zibashitsa i Gati no ku marembo y’i Ekuroni: Abafilisitiya bagenda barahindikirana bakomeretse ku nzira ija i Sharayimu, kurinda bashika i Gati n’i Ekuroni.

⁵³ Abisirayeli baraheza bava inyuma y’ Abafilisitiya, baragaruka basahura insago zabo.

⁵⁴ Maze Dawidi afata umutwe wa wa Mufilisitiya, awujana i Yerusalemu; arikw ibirwanishwa vyo asiga abibītse mw ihema ryiwe.

⁵⁵ Igihe Sauli yabona Dawidi agiye kurwana na wa Mufilisitiya, yabajije Abuneri umugabisha w’ ingabo ziwe, ati Harya ga Abuneri, urya muhungu ni mwene nde? Na we aramwishura, ati Mugenzi, indahiro ni wewe nyene nkamumenya!

⁵⁶ Umwami aramwishura, ati Baza se w’uwo muhungu uw’ ari we.

⁵⁷ Hanyuma Dawidi atabarutse, avuye kwica wa Mufilisitiya, Abuneri aramujana, amushikiriza Sauli, afise umutwe wa wa Mufilisitiya mu ntoke.

⁵⁸ Sauli aramubaza, ati Harya uri mwene nde, ga wa muhungu? Dawidi aramwishura, ati Nd’ umwana w’umusavyi wawe Isayi w’i Betelehemu.