1 Samweli 15 - Bibliya Yera 1951 1967 (Burundi)

Imana ituma Sauli kurandura Abamaleki

¹ Maze Samweli abarira Sauli, ati Ni jewe Uhoraho yatumye kukwimikisha amavuta, ng’ ube umwami w’abantu biwe b’ Abisirayeli. None rero ni wumve amajambo y’Uhoraho.

² Uku ni k’Uhoraho Nyen’ ingabo agize: ngw Amaramaje guhana Abamaleki, abahoye ivyo bagiriye Abisirayeli, ingene bābabujije inzira igihe bādūga bava muri Egiputa.

³ None rero genda, utere Abamaleki, ubarandure rwose n’ivyo bafise vyose; ntuz’ ugire uwo uziguriza, arik’ uz’ ugeseze abagabo n’abagore n’abana, mbere n’abonka, bo n’inka n’intama n’ingamiya n’indogoba.

⁴ Nuko Sauli ahamagaza ingabo, aziharūrira i Telayimu, zār’ ingabo ibihumbi amajana abiri, bo n’iz’ i Buyuda ibihumbi cumi.

⁵ Bukeye Sauli aja ku gisagara c’Abamaleki, aryama mu mwonga waho.

⁶ Ariko Sauli abarira Abanyakeni, ati Hogi ni mugende, muve mu Bamaleki, noye kubarandurana na bo, kuko mwagiriye Abisirayeli bose neza, igihe bādūga bava muri Egiputa. Nukw Abanyakeni bava mu Bamaleki.

⁷ Maze Sauli ageseza Abamaleki uhereye i Havila ugashitsa i Shura, aharābana na Egiputa.

⁸ Afata mpiri umwami wabo Agagi, aranduza abantu bose inkota.

⁹ Ariko Sauli n’ingabo ziwe baziguriza Agagi, bo n’ibirusha ibindi ubgiza mu ntama no mu nka no mu mashūri anuze no mu myagazi y’intama, mber’ ivyiza‐vyiza vyose, banka kubigeseza rwose; arikw ibigayitse vyose n’ ibitagira ico bimaze aba ari vyo bageseza rwose.

Samweli ahana Sauli kukw atumviye Imana

¹⁰ Maz’ ijambo ry’Uhoraho riza kuri Samweli,

¹¹ riti Ndicujije icatumye nimika Sauli; kuko yamvuyeko, akanka gukora ivyo namubariye. Maze Samweli araraka, akēsha ijoro atakambira Uhoraho.

¹² Bukeye akoroka kare ngw aje gusanganira Sauli; baramubarira, bati Sauli yari yagiye i Karumeli, ahīshingira icibutso; hanyuma arahindukira, akomeza inzira amanuka i Gilugali.

¹³ Maze Samweli ashikīra Sauli; Sauli aramubarira, at’ Uragahezagirwa n’Uhoraho! Ico Uhoraho yambariye nāgishikije.

¹⁴ Samweli aramubaza, ati Non’ urwo rwānāga rw’intama runza mu matwi, bo n’ukwabagirana kw’inka numva, n’ivy’ iki?

¹⁵ Sauli aramwishura, ati N’izo bākūye mu Bamaleki, kukw abantu bazigurije izirusha izindi ubgiza mu ntama no mu nka, ngo n’izo gushikanira Uhoraho Imana yawe kw ibimazi; na vyo ibindi vyose twarabigesheje rwose.

¹⁶ Maze Samweli yishura Sauli, ati Hagarara! Hinge nkubarire nanje ivyo Uhoraho yarāye ambariye iri joro. Aramwishura, at’ Ego, vuga.

¹⁷ Samweli aramubgira, ati Naho wari warīkēngereye, mbega ntiwagizwe uwo kuganza imiryango y’ Abisirayeli? Uhoraho ntiyakwimikishije amavuta ng’ube umwami w’Abisirayeli?

¹⁸ Kand’ akagutuma ku rubanza, akakubgira, ati Genda ugeseze rwose ba banyavyaha b’Abamaleki, ubarwanye gushitsa baherengeteye?

¹⁹ None se n’iki cakubujije kwumvira Uhoraho, ukagurukira ku minyago, ugakora ivyo Uhoraho abona kw ari bibi?

²⁰ Maze Sauli yishura Samweli, at’ Ereg’ Uhoraho nāmwumviye: kand’ urwo rubanza Uhoraho yantumyeko nārumaze; nazanye Agagi umwami w’Abamaleki, kand’ Abamaleki ubgabo narabagesheje rwose.

²¹ Arikw abantu ni bo bākūye intama n’inka mu zo bānyaze, izarusha izindi kuba nziza mu zāgira zigesezwe, ngo zize zibe izo gushikanira Uhoraho Imana yawe kw ibimazi ngaha i Gilugali.

²² Samweli aramwishura, ati Mbeg’ Uhoraho ahimbarwa n’ibimazi vyoswa n’ ibindi bimazi gusumba ūmwumviye? Erega kwumvira gusumba ibimazi, no kuyoboka gusumba ibinure vy’impfizi z’intama.

²³ Kuk’ ubugarariji ari co kimwe n’icaha c’ubupfumu, kandi kuba ntagondwa ni kimwe no gusenga ibishushanyo n’ibigirwamana. Ko wanse ijambo ry’Uhoraho, na we yanse k’uba ku ngoma.

²⁴ Maze Sauli yishura Samweli, ati Naracumuye, kuko ntumviye icagezwe c’Uhoraho n’amajambo yawe, ngatinya abantu nkabumvira.

²⁵ None rero ndakwinginze, mparira icaha canje; uze dusubiraneyo, kugira ngo nsenge Uhoraho.

²⁶ Samweli yishura Sauli, at’ Eka sinsubiranayo nawe; ko wanse ijambo ry’Uhoraho, na we yanse k’uba umwami w’Abisirayeli.

²⁷ Nuko Samweli agihindukira ngw agende, Sauli ashingīra umutwe w’impuzu yiwe, iratabuka.

²⁸ Maze Samweli aramubarira, at’ Uhoraho na we uyu musi agutabuyekw ingoma y’Abisirayeli, ayihaye mugenzawe akuruta.

²⁹ Ereg’ Inyenkomezi y’Abisirayeli ntibesha, kandi ntiyīrīmbūra, kukw atar’ umuntu ngw ize yīrīmbūre.

³⁰ Na we aramwishura, ati Naracumuye; yamara none ndakwinginze, untere itēka imbere y’abakuru bo mu bantu banje n’imbere y’Abisirayeli, dusubiraneyo kugira ngo nsenge Uhoraho Imana yawe.

³¹ Nuko Samweli arahindukira, akurikira Sauli; Sauli asenga Uhoraho.

Urupfu rwa Agagi

³² Maze Samweli aravuga, ati Ni munzanire hano Agagi umwami w’Abamaleki. Nuko Agagi aza ah’ ari araramanga; aravuga, ati N’ukuri ibamba ry’urupfu rirashize.

³³ Maze Samweli aramubgira, ati Nk’ukw inkota yawe yagira abagore imbura, ni ko na nyoko abaye imbura mu bandi bagore. Nuko Samweli amuhimbagurira imbere y’Uhoraho i Gilugali.

³⁴ Maze Samweli aja i Rama, Sauli na we aradūga, ataha i muhira i we i Gibeya.

³⁵ Guhēra ico gihe Samweli ntiyongera kubonana na Sauli kurinda apfa, atar’ ukwama amuririra; kand’ Uhoraho aricuza ico yimikiye Sauli ngw abe umwami w’Abisirayeli.