1 Samweli 10 - Bibliya Yera 1951 1967 (Burundi)

Samweli yimikisha Sauli amavuta

¹ Maze Samweli yābīra agakuza k’amavuta ya elayo, ayamusuka ku mutwe, aramugūmbīra, aravuga, ati Mbeg’ Uhoraho si we akwimitse ng’ ube ari wewe ugaba ishamvu yiwe?

² Uyu musi ni twamara gutandukana, uja gusanga abantu babiri hafi y’ imva ya Rakeli ku rubibe rw’Ababenyamini i Selusa; kandi barakubarira, bat’ Indogoba wari wagiye kurondera zarabonetse, bati Kandi so asigaye ahagarikiye umutima wewe kuruta izo ndogoba, avuga ngw ivy’ umwana wiwe yobigenza ate?

³ Maz’ uvuye aho, ugiye nk’akarēre, ugashika ku giti c’umweloni c’i Tabora, uja guhūra n’abantu batatu badūga gushengerera Imana i Beteli, umwe ateruye abagazi b’impene batatu, uwundi atwaye amarobe atatu y’imitsima, uwundi atwaye umukuza wa vino.

⁴ Barakuramutsa, baguhe n’amarobe abiri, nawe uyākīre.

⁵ Hanyuma urashika ku musozi w’ Imana, ahar’ iboma y’Abafilisitiya; ni washika mur’ ico gisagara, uja guhūra n’agakama k’abavugishwa n’Imana bamanuka bavuye ahēra ho ku mpinga y’umusozi, bafise amakembe n’udushāko tw’ingoma n’imyironge n’inanga bigenda biravugira imbere yabo; uja gusanga bariko baravugishwa n’Imana.

⁶ Maze Mpwemu w’Uhoraho aca akuzako akābushūngwe, nawe akuvugishe hamwe na bo, uce uhinduka ukundi, ube umuntu musha.

⁷ Kand’ ivyo bimenyamenya ni vyagushikako, ugenze uk’ ubona bikwiye, kukw Imana iri kumwe nawe.

⁸ Kand’ uz’ unyitangire imbere, umanuke i Gilugali; nanje nyene nzomanuka ngusangeyo, nje kwosa ibimazi no gutanga ivy’ ishimwe. Uz’ undorēre imisi ndwi kugeza igihe nzogusangayo nkakwereka uk’ ukwiye kugenza.

⁹ Akirora irya avuye aho Samweli ari, Imana imuha umutima musha: maze kur’ uwo musi nyene vya bimenyamenya vyose birashika.

¹⁰ Nuko bashitse kuri wa musozi, abavugishwa n’Imana b’agakama bahūra na we; maze Mpwemu w’Uhoraho amuzako akābushūngwe, avugishwa hamwe na bo.

¹¹ Maz’ abāri basanzwe bamuzi bose, babonye arikw aravugishwa hamwe n’abandi, barabazanya, bati Mbega mwene Kishi yabaye iki? None Sauli na we yari mu bavugishwa n’Imana?

¹² Umwe wo mu baba aho hantu arabaza, ati Mbeg’ abo ni bene nde? Ni co catumye bihinduka akagani, ngo Mbega Sauli na we yari mu bavugishwa n’Imana?

¹³ Maz’ arangije kuvugishwa aja ha hantu hēra ku mpinga y’umusozi.

¹⁴ Se wabo wa Sauli abaza Sauli na wa muntu wiwe, ati Mbega mwagiye hehe? Aramwishura, ati Twagiye kurondera za ndogoba; maze tubonye tuzibuze tuja kwa Samweli.

¹⁵ Se wabo wa Sauli aramwishura, at’ Enda se mbarira ivyo Samweli yababgiye.

¹⁶ Sauli yishura se wabo, ati Yatubariye neza kw indogoba zabonetse. Ariko ku vy’ubgami Samweli yamubariye, ntiyagira ico amukerukiriza.

Ubupfindo butora Sauli ngw abe umwami

¹⁷ Bukeye Samweli akoraniriza abantu i Misipa imbere y’Uhoraho,

¹⁸ abarira Abisirayeli, at’ Uku ni k’Uhoraho Imana y’Abisirayeli agize, ngo Yadūganye Abisirayeli abakūye muri Egiputa, ngw Arabarokora abakūra mu maboko y’ Abanyegiputa no mu maboko y’ abami bose bābahahaza;

¹⁹ arik’ uyu musi muranse Imana yanyu, kand’ ari yo nyene ubgayo ihora ibakiza mu vyago vyanyu vyose no mu magorwa; mwarayibgiye ngo n’ibahe umwami. Nuko rero, ni muze muhagarare imbere y’Uhoraho, umuryango wose uk’ uri, n’ inzu yose ukw iri.

²⁰ Nuko Samweli ahamagaza imiryango yose y’Abisirayeli, ubupfindo bufata umuryango w’Ababenyamini.

²¹ Ahamagaza umuryango w’Ababenyamini, inzu imwe‐imwe ukwayo, inzu ya ba Matiri irafatwa; araheza ahamagaza ab’ inzu ya ba Matiri, umuntu umwe‐umwe; hafatwa Sauli mwene Kishi; ariko bamurondeye baramubura.

²² Nuko bongera gusiguza Uhoraho, bati Mbeg’ uwo muntu yoba ataraza? Uhoraho arabishura, at’ Ereg’ arinyegeje mu bintu vy’intēkera.

²³ Bagenda biruka, baramuzana; ahagaze mu bantu, abasumba bose uko bangana: bamugera ku bitugu gusa.

²⁴ Maze Samweli abarira abantu bose, ati Mbega murabona uw’ Uhoraho yatoranije, kw ata wuhwanye na we mu bantu bose? Abantu bose bashira akamo hejuru, bat’ Umwami n’ahangame.

²⁵ Maze Samweli amenyesha abantu imiganzirize y’ubgami ukw izobamerera, avyandika mu gitabo, akibīka imbere y’Uhoraho. Samweli araheza asēzera abantu bose, barataha.

²⁶ Sauli na we arītāhira, aja i muhira i Gibeya, acagatiwe n’abantu b’abahizi, abo Imana yakoze mu mitima.

²⁷ Arikw abantu b’abagesera bamwe baravuga, bati Mbeg’ uwo muntu yodutabara ate? Baramukēngēra, ntibāruha bamuzanira n’ imishikīro. Arikw apfa kwinumira.