1 Korinto 16 - Bibliya Yera 1951 1967 (Burundi)

Ivy’ ugukoranya amashikanwa yo gutabara aboro b’i Yerusalemu

¹ Nuko ku vyo gukoranya ibitabara abera, nk’uko nageze amashengero y’i Galatiya, abe ari ko namwe mukora.

² Ku wa mbere wose w’imisi ndwi, umuntu wese muri mwebge abīke i we ibimuhaye uburyo, nk’ukw atunze, kugira ngw aho nzozira ntihabe ari ho amashikanwa azokoranirizwa.

³ Kand’ aho nzoshikira, abo muzoshima, nzobatuma mbahaye ivyete, kugira ngo bajane ivy’ ubuntu bganyu i Yerusalemu.

⁴ Kandi namba nzoba nkwiye kugenda nanje, tuzojana.

Paulo avuga kw agabiye kuzoja i Korinto

⁵ Ariko nzoza i wanyu, ni namara guca i Makedoniya; kuko nzorinda gucayo.

⁶ Ariko kumbure nzomarana namwe imisi, canke nzomara n’urushana, kugira ngo mumperekeze, munsezere neza aho nzoja hose.

⁷ Singomba ko tubonana none mbakubise rurabge, ariko nizigira kuzomarana namwe imisi, Umwami wacu ni yankundira.

⁸ Ariko nzotebera muri Efeso gushitsa kuri Pentekote:

⁹ kuko nugururiwe urugi runini ruja mu bikorwa bikomeye, kand’ abarwanizi bakaba benshi.

¹⁰ Timoteyo ni yaramuka aje i wanyu, muze mumubabare kugira ngw abane namwe ata bgoba; kukw akora igikorwa c’Umwami wacu nkanje.

¹¹ Nuko ntihaze hagire ūmukēngēra, ariko muze mumuherekeze mumusezere amahoro, az’ ansange ino, kuko niteze kw azozanana na bene Data.

¹² Arikw ivya Apolo mwene Data, naramwinginze cane ngw aze i wanyu, az’ azanane na bene Data abo; ntiyakunda na gatoya kuza none, arikw azoza, ni yabona uburyo.

¹³ Mwame mugavye, mushikame mu kwizera, mube abagabo, mugire inkomezi.

¹⁴ Ivyo mukora vyose mubikorane urukundo.

¹⁵ Nuko ndabinginze, bene Data, murazi abo kwa Stefana, kw ari bo bāshuje mu Banyakaya, kandi kw ari bo bītangiye gukorera abera.

¹⁶ Nuko namwe mugāmburukire abameze bartyo, n’uwundi wese afatanije n’abandi mur’ ico gikorwa, agatama.

¹⁷ Birannezereye ko Stefana na Forutunato na Akayiko baje; bāmmaze inkumbu nari mbafitiye,

¹⁸ kuko bāhēmbūye umutima wanje, bo n’uwanyu: mwame mwibuka abameze bartyo.

Intasho

¹⁹ Abo mu mashengero yo muri Asiya barabaganūtsa. Akwila na Purisikila barabaganutsa cane mu Mwami wacu, bo n’ishengero ryo mu nzu yabo.

²⁰ Bene Data bose barabaganūtsa. Muramukanishe kugumbirana kwera.

²¹ Uku ni kwo gutasha kwanje Paulo, kwanditswe n’ukwanje kuboko.

²² Ni hagira umuntu adakunda Umwami wacu, arakavumwa. Maran ata.

²³ Ubuntu bg’Umwami wacu Yesu Kristo bubane namwe.

²⁴ Urukundo rwanje rubane namwe mwese muri Kristo Yesu. Amen.