1 Abami 7 - Bibliya Yera 1951 1967 (Burundi)

Salomo yubaka ingoro yiwe ubgiwe

¹ Maze Salomo yubaka iyiwe ngoro; amara imyaka cumi n’itatu mu kw arangiza vyose.

² Yubatse inzu yitwa iy’ Ikibira c’i Lebanoni, uburebure bgayo bgar’ amatambge ijana y’ukuboko uciriye mu nkokora, ubgaguke bgayo bgar’ amatambge mirongwitanu, uburebure bg’igihagararo bgar’ amatambge mirongwitatu; yar’ itezwe n’inkingi z’ amasederi zinegagiwe mu mirongo itatu, zitambitswekw imyaro y’ amasederi nyene.

³ Adondekanya imbaho z’amasederi kur’ iyo myaro itambitswe kur’ izo nkingi mirongwine na zitanu uko zinegagiye ar’ icumi‐icumi na zitanu mu murongo.

⁴ Atambika imbaho z’intumba mu mirongo itatu, zihānye imyanya irimw’ amadirisha mu mirongo itatu nyene, idirisha rirābana n’irindi.

⁵ Inzugi zose, uburebure bgazo n’ubgaguke vyari kimwe, n’amadirisha n’uko; kand’ idirisha ryārābana n’irindi mur’ iyo mirongo ukw ar’ itatu.

⁶ Yubaka n’urubaraza rufise inkingi, uburebure bgarwo bgar’ amatambge mirongwitanu y’ukuboko uciriye mu nkokora, ubgaguke bgarwo bgar’ amatambge mirongwitatu; imbere yarwo ahashira akandi kabaraza gafise inkingi nyene n’ingazi y’amabuye imanuka ija hanze.

⁷ Yubaka n’inzu yo guciramw’ imanza, ayishiramw’ intebe y’ ubgami; ahōmeka imbaho z’ amasederi uhereye hasi ugashitsa ku myaro.

⁸ Kand’ ingoro yiwe nyamugari yubatswe kuno nyene; inyubakwa yayo yaca inyuma y’iyo nzu. Yubaka n’iyindi ngoro isa n’iyo nzu y’imanza, ayubakiye umukobga wa Farawo yar’ afise.

⁹ Ayo mazu yose yari yubakishijwe amabuye y’igiciro kinini abājwe ku rugero, akerejwe imisumeno imbere n’inyuma, uhereye ku y’amatanguriro ugashitsa ku yo hejuru, uhereye no ku y’inyubakwa y’urusengero ugashitsa no ku y’urugo rw’intangaro.

¹⁰ Ay’ amatanguriro na yo nyene yar’ ay’ igiciro kinini, kandi yar’ amabuye manini‐manini, amwe yar’ ay’ amatambge cumi y’ukuboko uciriye mu nkokora, ayandi yar’ ay’ amatambge munani.

¹¹ Hejuru yayo hakurikirakw amabuye y’ igiciro kinini abājwe ku rugero, agasozerwa n’ibiti bibājwe vy’ amasederi.

¹² Urugo rw’intangaro rwari rwubakishijwe amabuye abājwe imirongo itatu igerekeranye, rusozeshejwe umurongo w’ibiti bibājwe vy’amasederi, nk’ uko bāgenjeje urugo rw’inyubakwa yo ku ngoro y’Uhoraho, n’ urubaraza rw’iyo ngoro.

Ivy’ inkingi zibiri zo gushariza urusengero

¹³ Bukeye Salomo atuma i Tiro guhamagaza Hiramu.

¹⁴ Hiramu uwo, nyina yar’ umupfakazi wo mu muryango wa Nafutali, ariko se yar’ uw’ i Tiro; yar’ umucuzi w’imiringa, yuzuye ubgenge no gutahura n’ubuhinga bgo gucura ikintu cose co mu miringa. Nuko yitaba umwami Salomo, amukorera ikintu cose yagomba.

¹⁵ Acura inkingi zibiri z’imiringa, uburebure bgazo bgar’ amatambge cumi n’umunani y’ukuboko uciriye mu nkokora, ubunini bgo mu nda yayo bgagerwa n’ umugozi w’amatambge cumi n’ abiri.

¹⁶ Maz’ avugutira imiringa mu nkero, ayikūramw’ imyashi ibiri yo gushira mu mitwe y’izo nkingi; uburebure bg’umwashi umwe bgar’ amatambge atanu, n’ubg’ uwundi bgar’ atanu nyene.

¹⁷ Acura ibimeze nk’insenga vy’ insobane n’imigufu ihotoranije, vyo gushira kur’ iyo myashi yo mu mitwe y’inkingi; ashira kimwe ku mwashi umwe, n’ikindi ku wundi.

¹⁸ Acura n’ibisa n’amakomamanga, abishira ku rusenga rumwe mu mirongo ibiri ikikuje, abirenza ku mwashi uri mu mutwe w’inkingi; no ku wundi mwashi agira kuno nyene.

¹⁹ Mugabo, imyashi yo mu mitwe y’inkingi zo ku rubaraza yar’ ishushanijwekw amashurwe y’amarebe, uburebure bg’ iyo myashi bgar’ amatambge ane.

²⁰ Nukw iyo myashi ayishira mu mitwe y’izo nkingi ukw ari zibiri, hejuru y’imikugiro yari kuri zo, ah’ izo nsenga zagarukira; ibisa n’amakomamanga vyar’ amajana abiri, biri mu mirongo ibiri; no ku wundi mwashi n’uko.

²¹ Izo nkingi azishinga ku rubaraza rw’ urusengero; iy’ i buryo ayishinze, ayita Yakini, ashinze iy’ i bubamfu, ayita Bowazi.

²² Ku mitwe y’izo nkingi hari hashushanijwekw amashurwe y’amarebe. Nukw igikorwa c’izo nkingi kirarangira.

Ivy’ igikarabiro co mu rusengero bīse ikiyaga

²³ Maz’ akora igikarabiro citwa ikiyaga, akivugutiye mu nkero, ubgaguke bgaco, uhereye ku rubiga rw’uruhande rumwe ugashitsa ku rundi, bgar’ amatambge cumi y’ukuboko uciriye mu nkokora, bgarangana impande zose; uburebure bgaco bg’igihagararo bgar’ amatambge atanu; urubiga rwaco rwazengukwa n’umugozi w’amatambge mirongwitatu.

²⁴ Musi y’urubiga rwaco hari hakikujwe n’ibishushanyo vy’uturende, mw itambge rimwe hār’ icumi‐icumi, dukikuje hirya no hino kur’ ico kiyaga; utwo turende twari dutondeshejwe mu mirongo ibiri, twāvugutiranywe na co kikiri mu nkero.

²⁵ Cari giteretswe ku bishushanyo vy’amapfizi cumi n’abiri; atatu yarāba i burārūko, yandi atatu yarāba i burengerazuba, yandi atatu yarāba i bumanuko, yandi atatu yarāba i burasirazuba; ico kiyaga cari giteretse kur’ ayo mapfizi, kandi yose yar’ ahānye imigongo.

²⁶ Intimba yaco yangana n’ikiganza c’umuntu, kand’ umunwa waco war’ umeze nk’uw’ igikombe, canke nk’ishurwe ry’irebe; cuzuzwa n’imibindi ibihumbi bibiri.

Ivy’ ibitereko cumi n’ibigarigari vyavyo

²⁷ Acura ibitereko cumi mu miringa. Igitereko kimwe, uburebure bgaco bgar’ amatambge ane y’ukuboko uciriye mu nkokora, ubgaguke bgaco bgar’ amatambge ane nyene, uburebure bg’igihagararo bgar’ amatambge atatu.

²⁸ Ivyo bitereko vyari bicuzwe birtya: vyari bifise imiringa y’utubāte ikikujwe n’imikugiro;

²⁹ kur’ utwo tubāte hagati y’iyo mikugiro hār’ ibishushanyo vy’ intambge n’amapfizi n’abakerubi; kur’ iyo mikugiro haruguru y’ivyo bishushanyo vy’intambge n’amapfizi no ku mikugiro yo hepfo yavyo, hārih’ utugenegene duhotoranije dutendeye.

³⁰ Igitereko cose cari gifise amakurudumu ane acuzwe mu miringa, kand’ ivyuma bitambitse bifashekw ayo makurudumu na vyo vyar’ ivyo mu miringa. Mu mfuruka zaco ukw ari zine hārih’ ibishigikizo vyo gushigikira ikigarigari; ivyo bishigikizo vyar’ ivyāvugutiwe mu nkero, bifise utugenegene duhotoranije mu mbavu zavyo zose.

³¹ Ivyo bishigikizo vyatega ikimeze bga rugata co guterekwakw ikigarigari; uburebure bgaco bgar’ itambge rimwe, n’ubg’ amajepfo bgar’ itambge n’igihimba, kandi cari giciye amagarwe; twa tubāte two kur’ ico gitereko ntitwari twihese, ariko twari dufise impande zine zingana.

³² Ayo makurudumu ukw ar’ ane yar’ ahahera musi ya twa tubāte, kand’ ivyuma bitambitse bifashekw ayo makurudumu vyari vyacuranywe n’ico gitereko; uburebure bg’ayo makurudumu bgar’ itambge n’igihimba.

³³ Kandi yakozwe nk’ay’ umukogote; ivyuma afasheko, n’imikugiro yayo, n’inkingi zayo, n’ivyuma vyayo vyo mw iteranirizo ry’inkingi, vyose na vyose vyar’ ivyāvugutiwe mu nkero.

³⁴ Vya bishigikizo ukw ari bine vyo mu mfuruka zine z’igitereko cose vyari vyacuranywe n’ivyo bitereko vyavyo.

³⁵ Hejuru ku gitereko hār’ ikintu cijingurije kimeze nk’urugata; uburebure bgaco bg’igihagararo bgar’ igihimba c’itambge ry’ukuboko uciriye mu nkokora; ivyari bigishigikiye bo n’utubāte two kuri co, vyari vyacuranywe na co.

³⁶ Kur’ ivyo bishigikizo, ahabāse havyo, no kuri twa tubāte nyene, ahashushanyakw ibishushanyo vy’abakerubi n’ivy’ intambge n’ivy’ ibigazi, nk’ uko hāgenda harēha, ashirako n’utugenegene duhotoranije mu mpande zose.

³⁷ Uko ni ko yakoze ivyo bitereko ukw ar’ icumi; vyose vyavugutiwe mu nkero z’uburyo bumwe; vyarangana cabugerwe, kandi vyari bifise ishusho imwe.

³⁸ Acura n’ibigarigari cumi mu miringa; kimwe‐kimwe cuzuzwa n’imibindi mirongwine; kimwe‐kimwe uburebure bgaco bgar’ amatambge ane y’ukuboko uciriye mu nkokora. Kand’ ivyo bitereko ukw ar’ icumi, kimwe‐kimwe caterekwakw ikigarigari caco.

³⁹ Ibitereko bitanu abishira ku ruhande rw’i buryo bg’iyo ngoro, bindi bitanu abishira ku ruhande rw’i bumoso. Ca gikarabiro citwa ikiyaga na co agishira ku ruhande rw’i buryo bg’iyo ngoro, ku mfuruka ihera i burasirazuba n’i bumanuko.

Ivyo Hiramu yakoze vyose

⁴⁰ Maz’ imibindi n’ivyuma vyo kuyora umunyota n’imibehe Hiramu arabikora na vyo. Uko ni ko yanonosoye igikorwa cose yakorera umwami Salomo c’ingoro y’Uhoraho.

⁴¹ Ivyo yakoze vyar’ ibi: za nkingi zompi, na ya myashi yompi yiburungushuye yari mu mitwe y’izo nkingi, na vya bindi bimeze nk’ insenga vyompi vyari kuri ya myashi yiburungushuye yari mu mitwe y’izo nkingi;

⁴² na vya bishushanyo vy’amakomamanga amajana ane bitondeshejwe kur’ izo nsenga, imirongo ibiri‐ibiri ku nsenga zompi, uko zari kur’ iyo myashi yompi yiburungushuye yari mu mitwe y’izo nkingi;

⁴³ na vya bitereko ukw ar’ icumi, na vya bigarigari ukw ar’ icumi nyene vyari biteretse kuri vyo;

⁴⁴ na ca kiyaga, na vya bishushanyo vy’amapfizi ukw ar’ icumi na bibiri biteretswekw ico kiyaga nyene;

⁴⁵ na ya mibindi na vya vyuma vyo kuyora umunyota na ya mibehe; ivyo bintu vyose Hiramu yakoreye umwami Salomo vy’ingoro y’Uhoraho, yabikoze mu miringa y’imyakaka.

⁴⁶ Umwami yabikoreshereje mu kiyaya ca Yorodani bivugutiwe mu nkero, ahantu hār’ ibumba, hagati y’i Sukoti n’i Saretani.

⁴⁷ Kandi Salomo apfa kureka ivyo bintu vyose atabigeze ku munzane, kuko vyari vyinshi cane; uburemerezi bg’imiringa vyakuwemwo ntibgāmenyekanye.

Ivyo Salomo yakoreye ingoro y’Uhoraho mu mazahabu

⁴⁸ Kandi Salomo acurisha ibintu vyose vyo mu ngoro y’Uhoraho, ni vyo ibi: igicaniro c’izahabu, n’ameza y’imitsima y’ibiterekērwa na yo yar’ izahabu;

⁴⁹ n’ibiterekwakw amatara, bitanu mu ruhande rw’i buryo, bindi bitanu mu ruhande rw’i bumoso, aharābana n’Ahēra Cane, vyose vyar’ izahabu iramuye; n’ibisa n’amashurwe, n’ayo matara nyene, n’imakasi zayo zo gutunganya urutambi, na vyo vyar’ ivy’ izahabu;

⁵⁰ n’ inzavya, n’imbugita, n’imibehe, n’udukombe, n’udusahani two gushirwak’ umunyota, na vyo nyene vyar’ ivy’ izahabu iramuye; n’ amapata y’inzugi zija haruguru, ari ho Hēra Cane, n’ay’ inzugi z’ingoro ubgayo, ari rwo rusengero, na yo yar’ ay’ izahabu.

⁵¹ Uko ni kw igikorwa cose umwami Salomo yakoreye ingoro y’Uhoraho carangiye. Maze yinjiza ivyo se Dawidi yari yaragize inyegu y’Uhoraho vyose, amafeza n’amazahabu, n’ibintu vy’ibikoreshwa, abishira mu bubīko bg’ ingoro y’Uhoraho.