1 Abami 22 - Bibliya Yera 1951 1967 (Burundi)

Ahabu na Yehoshafati bagīsha inama abavugishwa

¹ Kand’ Abasiriya n’Abisirayeli bari bamaze imyaka itatu batekereje batarwana.

² Maze mu mwaka ugira gatatu, Yehoshafati umwami w’Abayuda aramanuka, aja kuramutsa umwami w’ Abisirayeli.

³ Maz’ umwami w’ Abisirayeli abarira abantu biwe, ati Harya ntimuzi yukw i Ramoti‐gileyadi hār’ ahacu, natwe tugapfa kwihorera, ntituhagobotore umwami w’Abasiriya?

⁴ Araheza abaza Yehoshafati, ati Mbega wokwemera kuntabara, ukajana natwe kuja gutera i Ramoti‐gileyadi? Yehoshafati yishura umwami w’ Abisirayeli, at’ Ego cane, jewe nd’ umwe nawe, n’abantu banje ni bo b’iwawe, n’amafarasi yanje ni yo y’iwawe.

⁵ Maze Yehoshafati abarira umwami w’Abisirayeli, at’ Enda se banza usiguze ijambo ry’ Uhoraho.

⁶ Nuk’ umwami w’ Abisirayeli akoranya ba kamenyi, bār’ abantu nk’amajana ane; arababaza, ati Mbega tuje gutera i Ramoti‐gileyadi canke dusigeho? Baramwishura, bati Dūga uhatere, kuk’ Uhoraho azohagabura mu maboko yawe, mugenzi.

⁷ Ariko Yehoshafati arabaza, ati Mbeg’ uretse aba, nta muntu avugishwa n’Uhoraho yobaho ngo tumusiguze?

⁸ Umwami w’Abisirayeli yishura Yehoshafati, ati Haracasigaye umuntu umwe twoshobora kubaza, akadusiguriza Uhoraho; yitwa Mikaya mwene Imula; ariko ndamwanka, kukw ata ho avugishwa ivyiza kuri jewe, atar’ ivyago. Yehoshafati aramubarira, ati Sigaho mugenzi, nta co uvuga urtyo!

⁹ Nuk’ umwami w’Abisirayeli ahamagara umuntu w’inkone, aramubarira, ati Genda unyaruka uzane Mikaya mwene Imula.

¹⁰ Kand’ umwami w’Abisirayeli na Yehoshafati umwami w’Abayuda bāri bavyagiye ku ntebe zabo z’ubgami, bambaye imyambaro yabo y’ubgami, bari ku nama kw ishikiro ry’ikirimba c’i Samariya; ba kamenyi bose bavugishirizwa imbere yabo.

¹¹ Maze Zedekiya mwene Kenayana yicurishiriza amahembe y’ivyuma, aravuga, at’ Uku ni k’Uhoraho agize, ngw Aya mahembe ni yo uzokwirukanisha Abasiriya gushitsa baherengeteye.

¹² N’abandi ba kamenyi bose bavugishwa bartyo, bati Dūga utere i Ramoti‐gileyadi, bizokubera ko, kuk’ Uhoraho azohagabura mu maboko yawe, mugenzi.

¹³ Maz’ intumwa yari yagiye guhamagara Mikaya iramubarira, it’ Abavugishwa bose bahūrije hamwe gusigurira umwami ivyiza; none rero nawe amajambo yawe n’abe nk’ayabo, uvuge ivyiza.

¹⁴ Mikaya aramwishura, ati Ndakurahiye uguhoraho kw’Uhoraho, ic’ Uhoraho ambarira cose ni co nja kuvuga.

¹⁵ Nukw ashitse imbere y’umwami, umwami aramubaza, ati Mikaya, tuje gutera i Ramoti‐gileyadi, canke dusigeho? Aramwishura, ati Dūga utere, bizokubera ko, kand’ Uhoraho azohagabura mu maboko yawe, mugenzi!

¹⁶ Umwami aramubarira, at’ Aho nakurahirije nzogeza ryari, kugira ngo ntugire ico umbarira kitar’ ic’ ukuri mw izina ry’ Uhoraho?

¹⁷ Aramwishura, ati Mbonye Abisirayeli bose basābagiye ku misozi nk’intama zitagira umwungere; kand’ Uhoraho agize ngo Bariya n’abatagira shebuja; ni basubire i wabo, umuntu wese yīgīre amahoro.

¹⁸ Umwami w’Abisirayeli abarira Yehoshafati, ati Sinakubariye kw atogira ivyiza avugishwa kuri jewe, atar’ ivyago?

¹⁹ Mikaya arongera, ati None rero ni wumve ijambo ry’Uhoraho: mbonye Uhoraho avyagiye ku ntebe yiwe, ingabo zose zo mw ijuru zimuhagaze i buryo n’i bumoso.

²⁰ Maz’ Uhoraho arabaza, ati Ni nde yogenda kwosha Ahabu ngw adūge i Ramoti‐gileyadi, agweyo? Nuk’ umwe aravuga, ashira ukwiwe, uwundi ukwiwe.

²¹ Hanyuma haza impwemu, ihagarara imbere y’Uhoraho, iravuga, iti Jewe ndamwosha.

²² Uhoraho arayibaza, at’ Uja kumwosha ute? Na yo iti Ndagenda nihindure impwemu y’ibinyoma mu kanwa ka ba kamenyi biwe bose. Na we arayishura, ati Nuko, uramwosha, kand’ uzobishobora; genda ugire urtyo.

²³ Nuko non’ ehe rāba, Uhoraho ashize impwemu y’ibinyoma mu kanwa k’aba ba kamenyi bawe bose; kand’ akugeneye ivyago.

²⁴ Maze Zedekiya mwene Kenayana yēgēra Mikaya amukubita urushi, aramubaza, at’ Iyo mpwemu y’Uhoraho yaciye hehe mu kuva muri jewe iza kuvugana nawe?

²⁵ Mikaya aramwishura, at’ Uzoba urabimenya ku musi uzokwitera haruguru mu mpete winyegeza.

²⁶ Maz’ umwami w’ Abisirayeli aravuga, ati Ni mufate Mikaya, mumushīre Amoni umukuru w’umurwa, na Yowasi umwana wanje,

²⁷ mut’ Umwami agize ng’ Uru rugabo murushire mw ibohero, murugaburire ivyo kurya n’amazi vy’intīca ntīkize, uti Kugeza ah’ azotabarukira amahoro.

²⁸ Mikaya aravuga, ati Ni waramuka utabarutse amahoro, Uhoraho azoba atamvugishije. Arongera ati Mwa bantu mwese, muraba muvyumvise!

Ahabu agwa mu ntambara

²⁹ Nuk’ umwami w’Abisirayeli na Yehoshafati umwami w’Abayuda baradūga, baja gutera i Ramoti‐gileyadi.

³⁰ Maz’ umwami w’ Abisirayeli abarira Yehoshafati, ati Ngiye kwiyoberanya, nje mu rugamba; ariko weho ni wambare imyambaro yawe y’ubgami. Nuk’ umwami w’Abisirayeli ariyoberanya, aja mu rugamba.

³¹ Kand’ umwami w’i Siriya yari yabariye abagabisha b’imikogote yiwe y’intambara, ukw ari mirongwitatu na babiri, ati Ntimutumbere kurasa abandi, ar’ aboroshe cank’ abahambaye, atar’ umwami w’Abisirayeli wenyene.

³² Nukw abo bagabisha b’imikogote y’ intambara babonye Yehoshafati, baravuga, bati Nguriya umwami w’Abisirayeli nta gukēka! Nuko barakebanuka, batumbera we; Yehoshafati atura ubuku.

³³ Maz’ abo bagabisha b’imikogote babonye kw atar’ umwami w’Abisirayeli, barahindukira bareka kumwirukana.

³⁴ Maz’ umuntu umwe wo mu rugamba apfa kurasa, agema umwami w’Abisirayeli ah’ ivyuma bimukīngīra bihūrira; aca abarira ūtumbereza umukogote wiwe, ati Hindukiza, unkūre mu rugamba, kuko nkomeretse bibi.

³⁵ Uwo musi intambara irushiriza kuba ihambaye; umwami bamushigikirira aho nyene mu mukogote wiwe, ahangana n’Abasiriya; hageze ku mugoroba aratanga; kand’ amaraso yari yacunduguse ava mu ruguma, atega imbere mu mukogote.

³⁶ Maze nko ku kirengazuba humvikana akāmo mu ngabo, ngo Ni mutahe, musubire mu bisagara vyanyu no mu ntāra z’i wanyu.

³⁷ Uko ni k’umwami yatanze; bamujana i Samariya, bamuhambayo.

³⁸ Umukogote wiwe bawogereza ku kidengeri c’i Samariya aho ba maraya biyuhagirira; imbga ziraza zirigata amaraso yiwe nk’ukw ijambo Uhoraho yavuze riri.

³⁹ Ibindi vyose vyadonzwe kuri Ahabu, n’ivyo yakoze vyose, n’ivy’ inzu yubatse isharijwe n’amahembe y’inzovu, n’ibisagara vyose yubatse, mbega ntivyanditswe mu gitabo c’ivyo ku ngoma z’ abami b’Abisirayeli?

⁴⁰ Uko ni ko Ahabu yahambije ba sekuruza; maz’ umuhungu wiwe Ahaziya asubira ku ngoma yiwe.

Ivya Yehoshafati na Ahaziya

⁴¹ Yehoshafati mwene Asa aho yima i Buyuda hāri mu mwaka ugira kane Ahabu umwami w’ Abisirayeli ari ku ngoma.

⁴² Kandi Yehoshafati, aho yatangura kwima, yar’ amaze imyaka mirongwitatu n’itanu; araheza amara ku ngoma imyaka mirongwibiri n’itanu i Yerusalemu. Nyina yitwa Azuba umukobga wa Shiluhi.

⁴³ Kandi yagendera mu ngeso zose za se Asa; ntiyatirimuka ngw azivemwo, ariko yagenda akora ivyo Uhoraho abona kw ari vyiza. Mugabo ibitabo vyo ku mpinga z’imisozi vyo ntivyākūrwaho, arikw abantu bākomeje gutangiray’ ibimazi no kuhosereza imibavu.

⁴⁴ Kandi Yehoshafati ashira hamwe n’umwami w’Abisirayeli.

⁴⁵ Ibindi vyose vyadonzwe kuri Yehoshafati, n’ivy’ ubuhizi bgiwe, n’ingene yarwana intambara, mbega ntivyanditswe mu gitabo c’ivyo ku ngoma z’abami b’Abayuda?

⁴⁶ Kand’ abāri basigaye ku bagabo bendana, ari bo nyene bāri basigaye ku ngoma ya se Asa, abakūra mu gihugu ciwe.

⁴⁷ Kandi mur’ ico gihe nta mwami yariho mu gihugu ca Edomu: hāganza uwar’ agihagarikiye.

⁴⁸ Yehoshafati abāzisha amato y’i Tarushishi yo kwama aja i Ofiru kuzana amazahabu; ariko ntiyashikayo, kuko yamenagurikiye i Eziyoni‐geberi.

⁴⁹ Maze Ahaziya mwene Ahabu asaba Yehoshafati kw abantu biwe bojana n’abiwe mu mato, ariko Yehoshafati ntiyabikunda.

⁵⁰ Maze Yehoshafati ahamvya ba sekuruza, ahambga hamwe na bo ku murwa wa sekuruza Dawidi; maz’ umuhungu wiwe Yehoramu asubira ku ngoma yiwe.

⁵¹ Ahaziya mwene Ahabu aho yima i Samariya mu Bgisirayeli hāri mu mwaka ugira icumi n’ indwi Yehoshafati umwami w’ Abayuda ari ku ngoma; amara imyaka ibiri aganza Abisirayeli.

⁵² Akora ivyo Uhoraho abona kw ari bibi, agendera mu ngeso za se n’iza nyina, n’iza Yerobowamu mwene Nebati yakwegeye Abisirayeli mu vyaha.

⁵³ Asaba Bayali arayisenga, atera umwikomo Uhoraho Imana y’Abisirayeli, amuratsa nk’uko se yagize mu vyo yakoze vyose.