1 Abami 19 - Bibliya Yera 1951 1967 (Burundi)

Eliya ahunga Yezebeli

¹ Maze Ahabu adondera Yezebeli ivyo Eliya yakoze vyose, n’ingene yicishije inkota ba kamenyi bose.

² Yezebeli araheza atuma intumwa kuri Eliya, ut’ Ejo nk’aya mango wewe ubgawe, uti N’atakugira nk’uko wagize abo, ut’ Imana zirakabimuhanira kandi birushirije!

³ Eliya aca aterwa n’ubgoba, akūra hasi, arahunga ngw akize amagara, aja i Beri‐sheba h’i Buyuda, ahasiga umuntu wiwe.

⁴ Mugabo we, agenda urugendo rw’umusi umwe mu bugaragwa, araza yicara musi y’igiti c’umurotemu, yisabira gupfa, at’ Ewe Uhoraho, ivyanje ni bigarukire hano: ntabara unkūreho, kuko ntaruta ba sogokuruza.

⁵ Araheza yiryamira musi y’ico giti c’umurotemu, arasinzira; maz’ umumarayika araza aramukoma, aramubarira, ati Vyuka, urye.

⁶ Akanuye, abona umutsima ugeretse ku makara, n’umukuza w’ amazi, biri haruguru y’umutwe wiwe. Nukw aravyābīra, ararya, aranywa, arongera ariryamira.

⁷ Umumarayika w’Uhoraho agaruka ubugira kabiri, aramukoma, aramubarira, ati Vyuka urye, urugendo ntirukunanire kukw ari rurerure.

⁸ Nukw aravyuka, ararya, aranywa; izo ndya azigendera imisi mirongwine n’amajoro mirongwine, ashika i Horebu ku musozi w’Imana.

Imana yiyerekera Eliya i Horebu

⁹ Ashitseyo, yinjira mw isenga, abaho; maz’ ijambo ry’Uhoraho rimuzako, riramubaza, rit’ Ukora iki hano ga Eliya?

¹⁰ Na we arishura, ati Nagize ishaka ryinshi ryawe, Uhoraho Mana Nyen’ ingabo; kukw Abisirayeli bavuye mw isezerano ryawe, bagahomvagura ibicaniro vyawe, kandi bicishije inkota abavugishwa nawe; ni jewe jenyene nsigaye, nanje nyene barangenza ngo banyice.

¹¹ Aramwishura, ati Sohoka uhagarare hanze ku musozi imbere yanje, jewe Uhoraho. Ako kanya Uhoraho arahaca, maze haza umuyaga mwinshi w’igihuhuta usatagura imisozi, umenagura ibitandara imbere y’Uhoraho; arik’ Uhoraho ntiyari mur’ uyo muyaga. Umuyaga uciye, habaho gutigita kw’isi; arik’ Uhoraho ntiyari mur’ ukwo gutigita.

¹² Isi irangije gutigita habah’ umuriro; arik’ Uhoraho ntiyari mur’ uwo muriro. Hanyuma y’uwo muriro haza agacerere.

¹³ Maze Eliya akumvise, yipfuka umutamana wiwe mu maso, arasohoka ahagarara ku muryango w’iryo senga. Haza ijwi rimubaza, rit’ Ukora iki hano ga Eliya?

¹⁴ Arishura, ati Nagize ishaka ryinshi ryawe, Uhoraho Mana Nyen’ ingabo; kukw Abisirayeli bavuye mw isezerano ryawe, bagahomvagura ibicaniro vyawe, kandi bicishije inkota abavugishwa nawe; ni jewe jenyene nsigaye, nanje nyene barangenza ngo banyice.

¹⁵ Uhoraho aramubarira, ati Subiray’ ujane inzira wazananye, uje mu bugaragwa bg’i Damasiko; ni washikayo, uz’ urobanuze Hazayeli amavuta, az’ abe umwami w’i Siriya;

¹⁶ na Yehu mwene Nimushi na we uz’ umurobanuze amavuta, az’ abe umwami w’Abisirayeli; kandi na Elisa mwene Shafati w’i Abeli‐mehola uz’ umurobanuze amavuta, az’ abe ūvugishwa mu gishingo cawe.

¹⁷ Maz’ ūzokira inkota ya Hazayeli, Yehu azomwica; ūzokira iya Yehu, Elisa azomwica.

¹⁸ Yamara rero, ngiye kwisigariza abantu ibihumbi ndwi mu Bisirayeli, batigeze bapfukamira Bayali canke ngo bamusome.

Ihamagarwa rya Elisa

¹⁹ Nukw avayo, aragenda abona Elisa mwene Shafati, arikw ararimisha inka mirongwibiri na zine zirongōye imbere yiwe, zisangiye ingōgo ari zibiri‐zibiri, na we ari ku z’imperēra; Eliya akebereza iy’ ari, amutererak’ umutamana wiwe.

²⁰ Maze Elisa asiga inka ngaho, agenda ariruka akurikira Eliya, aramubarira, ati Ndakwinginze reka mbanze nje gusezera data na mama, mpeze nze ngukurikire. Na we ati Genda: ubonye nkugize nte?

²¹ Nukw areka kumukurikira, asubira inyuma, ahitana inka zibiri zisangiye ingōgo, arazibāga, atekesha inyama zazo ibiti vy’ingōgo zazo, agaburira abantu, bararya. Araheza ava hasi, akurikira Eliya, agenda aramukorera.