1 Abami 12 - Bibliya Yera 1951 1967 (Burundi)

Ubgami bgitandukanyamwo kubiri

¹ Bukeye Rehobowamu aja i Shekemu, kukw ari ho Abisirayeli bose bari bagiye kumwimikira.

² Maze Yerobowamu mwene Nebati aravyumva; kandi yar’ akiri muri Egiputa, iyo yari yarahungiye umwami Salomo, akagumayo;

³ nuko batuma kumuhamagara. Ashitse araza, bo n’ishengero ryose ry’Abisirayeli, babarira Rehobowamu,

⁴ bati So yadutwaje igitugu; none rero, n’ utugerurire ibikorwa bibabaza so yadukoresha, utugabanyeko n’iyo ntwaro yadutwaza, natwe tuzogusaba.

⁵ Arabishura, ati Ni mugende mumare imisi itatu, muze muheze mugaruke. Nukw abantu baragenda.

⁶ Maz’ umwami Rehobowamu aragenda agīsha inama abashingantahe bāri kuri se Salomo akiriho, arababaza, ati Mwongīra inama ki nokwishura abo bantu?

⁷ Baramwishura, bat’ Uyu musi ni wemera kwumvira aba bantu, ukabamerera neza, ukabishura amajambo meza, nuko na bo bazokwumvira ibihe vyose.

⁸ Ariko yanka iyo nama abo bashingantahe bamugīriye, aja kugīsha inama imisore yārukanye na we, yari kuri we.

⁹ Arababaza, at’ Inama yanyu n’inki, twokwishura abo bantu bambariye, ngo ni ndabagabanyekw intwaro data yabatwaza?

¹⁰ Nukw iyo misore iramubarira, it’ Uze wishure abo bantu bakubariye ngo so yabatwaje igitugu, ariko ngo weho ubagabanyekw iyo ntwaro; uz’ ubabarire, ut’ Uruhererezi rwanje ruruta ubunini ikiyunguyungu ca data!

¹¹ Ut’ Ariko naho data yabatwaje igitugu, uti Jeho nzorushiriza; uti Data yabakubitisha ibimoko, ut’ Ariko jeho nzobakubitisha sikorupiyo.

¹² Nuko ku musi ugira gatatu Yerobowamu n’abantu bose baza ku mwami Rehobowamu, nk’uko yababariye kuzogaruka i we ku musi ugira gatatu.

¹³ Maz’ umwami yanse inama yagīriwe na ba bashingantahe, yishura abantu abakankamira,

¹⁴ ababarira nk’ ukw inama ya ya misore iri, ati Data yabatwaje igitugu, ariko jeho nzorushiriza; data yabakubitisha ibimoko, ariko jeho nzobakubitisha sikorupiyo.

¹⁵ Nuk’ umwami ntiyemerera abantu; kukw ivyo vyari bivuye k’Uhoraho, kugira ngw ashitse ijambo yari yarabariye Yerobowamu mwene Nebati, aritumye Ahiya w’i Shilo.

¹⁶ Maz’ Abisirayeli bose babonye yuk’ umwami yanse kubemerera, baramubarira, bati Dawidi har’ ico tumwegako? Eka nta mugabane dufise kuri mwene Isayi: yemwe Bisirayeli, hogi twitahire i muhira! Nawe Dawidi, urimenya, mwe n’umuryango wawe! Nukw Abisirayeli baritahira, basubira i wabo.

¹⁷ Arikw Abisirayeli baba mu bisagara vy’i Buyuda, abo bo Rehobowamu arabaganza.

¹⁸ Bukeye umwami Rehobowamu arungika Adoramu, ari we yagaba ivy’ abanyabikebere; Abisirayeli bose bamutera amabuye, arapfa. Umwami Rehobowamu avyumvise, aca arakwakwanya yūrira mu mukogote wiwe, ahungira i Yerusalemu.

¹⁹ Uko ni kw Abisirayeli bāgararije inzu ya Dawidi gushitsa na bugingo n’ubu.

²⁰ Maz’ Abisirayeli bose bumvise yuko Yerobowamu yagarutse, batuma kumuhamagara ngw aze mw ikoraniro ryabo; baca baramwimika, aba umwami w’Abisirayeli bose; ntihāba hakigira ūsaba ab’ inzu ya Dawidi, atar’ umuryango wa Yuda gusa.

²¹ Ariko Rehobowamu ashitse i Yerusalemu, akoranya umuryango wose w’Abayuda, n’umuryango w’Ababenyamini, bakorana ar’ ingabo z’abahizi ibihumbi ijana na mirongumunani bo gutera ab’ inzu y’Abisirayeli, ngo bagarukanire Rehobowamu mwene Salomo igihugu.

²² Maz’ ijambo ry’ Imana riza kuri Shemaya umuntu w’Imana,

²³ riti Barira Rehobowamu mwene Salomo, umwami w’Abayuda, n’abo mu muryango w’Abayuda bose n’uw’ Ababenyamini, n’abandi bantu bose,

²⁴ ut’ Uku ni k’Uhoraho agize, ngo Ntimuze mudūge kurwanya ab’ i wanyu b’Abisirayeli; ngo Ni mwitahire, umuntu wese asubire i we; ngo Kukw ivyabaye vyavuye kuri we. Nuko bumvira ijambo ry’Uhoraho, baritahira, nk’uk’ Uhoraho yavuze.

Yerobowamu ashinga ibishushanyo vy’ibigirwamana

²⁵ Maze Yerobowamu yubaka i Shekemu mu mugamba w’Abefurayimu, abayo; hanyuma avayo, yubaka i Penuweli.

²⁶ Maze Yerobowamu yivuganya mu mutima, at’ Ereg’ igihugu kizohava cisubirira ku b’inzu ya Dawidi.

²⁷ Aba bantu ni bakomeza kudūga i Yerusalemu gutangira ibimazi mu ngoro y’Uhoraho, imitima yabo izosubira kuri shebuja, Rehobowamu umwami w’Abayuda; baheze banyice, bīsubirire kuri we.

²⁸ Umwami araheza yīgīra inama, acurisha ibishushanyo vy’ amamasa bibiri mw izahabu, abarira abantu, at’ Erega birabagoye kwama mudūga i Yerusalemu: ehe rāba, ngizi imana zanyu zabakūye mu gihugu ca Egiputa, yemwe Bisirayeli!

²⁹ Maze kimwe agishinga i Beteli, ikindi i Dani.

³⁰ Ico kintu gihindukira abantu icaha, kuko bagenda kucikubita imbere, bakarinda bashika no ku c’i Dani.

³¹ Kandi yubaka n’ utunyabugoro ahantu hār’ ibitabo ku mpinga z’imisozi, atoranya mu bandi bantu bose batar’ Abalewi, abagira abaherezi.

³² Yerobowamu ashinga ko haba umusi mukuru mu kwezi kw’umunani, ku musi wakwo w’icumi na gatanu, uhwanye n’umusi mukuru bāgira i Buyuda, yosereza ibimazi ku gicaniro; n’i Beteli ni ko yabigenza, aha ibimazi vya bishushanyo vy’amamasa yacurishije. I Beteli ahashira abaherezi b’ivyo bitabo yatabishije ku mpinga z’ imisozi.

³³ Aradūga aja ku gicaniro yari yarubakishije i Beteli, hāri ku musi ugira icumi na gatanu w’ukwezi kw’umunani, ari kwo kwezi yitoranirije ubgiwe, agashinga uwo musi mukuru w’ Abisirayeli; nukw aradūga aja ku gicaniro, kugira ngw ahosereze imibavu.