Ola Saam 124 - Kriol Baibul

God oldei lukaftumbat im pipul Song blanga Deibid.

¹ If YAWEI nomo bina jidan garram wi, wanim bina hepin langa wi? Yumob Isreil pipul ensim mi!

² “If YAWEI nomo bina jidan garram wi wen wi enamimob bin kaman blanga fait langa wi,

³ dei bina binijimap wi, dumaji deibin wail langa wi detmatj,

⁴ en jis laiga fladwoda, olabat bina deigimwei wi en gaburrumap wi,

⁵ en det fladwoda bina binijimap wi na.”

⁶ Wi gibit theingks langa YAWEI. Im nomo bin larram wi enamimob kilim wi ded, jis laiga brabli jigiwan dog.

⁷ Wibin ranawei friwan wulijim bard wen im flaiwei brom det breikinwan trep.

⁸ Oni YAWEI na oldei albumbat wi. Im na bin meigim det skai en dijan graun.