Ola Saam 114 - Kriol Baibul

Dijan song blanga Pasoba Serramoni

¹ Wen detlot Isreil pipul hubin det femilimob blanga Jeikob bin libum det kantri Ijip weya pipul deya tok najawan langgus,

² ola Juda pipul bin jidan seikridwan blanga YAWEI, en ola Isreil pipul bin jidan ronwan pipul blanga YAWEI.

³ God bin kaman langa det Redsi en imbin draiyimap det woda, en det Jodan Riba bin stap randan.

⁴ Detlot bigwan hil bin jampjamp wulijim nenigout, en najalot hil bin jamparanbat wulijim yangwan ship.

⁵ Wanim bin hepin langa yu solwoda blanga meigim yu draiyap? En yu Jodan Riba, wotfo yubin stap randanbat?

⁶ Ol yumob bigwan hil, wotfo yumob bin jampjamp wulijim nenigout? En ol yumob hil, wotfo yumob bin jamparanbat wulijim yangwan ship?

⁷ Sheiksheik graun! YAWEI im kaminap. Sheik lida langa YAWEI det God blanga Jeikob.

⁸ Im na bin meigim woda kamat brom bigwan rok, en bin meigim springwoda ranat brom ola adwan rok.