Ola Saam 100 - Kriol BaibulSong blanga gibit theingks 1 Sing adbala langa YAWEI det trubala God, ol yumob pipul langa ebri kantri! 2 Weship YAWEI gudbinjiwei. Kaman langa im en sing ola hepiwan song! 3 Yumob garra sabi dijan brabliwei. YAWEI im God. Imbin meigim wi, en wi na im pipul. Wi blanga im en wi jidan jis laik im ronwan shipmob. 4 Kamap thru det geit en tok theingkyu langa im. Kaman langa im haus en preisim im. Gibit im theingks en preisim im neim. 5 YAWEI im gudwan. Im laigim im pipul olabat olagijawan. Im garra oldei dum wanim imbin pramis. |
© 2019, Wycliffe Bible Translators, Inc. All rights reserved.
Wycliffe Bible Translators, Inc.