Юдэ́нгэ 9 - Biblija - Pe Baltitko Romani čib (Romanes) 2019

Syr te Mangénpe Devléske pe Phuv i dro Bolybnáskiro Rajo

¹ Dro pérvo zavieto sys phendló, syr treindiá te mangélpe Devléske, i pal svénto štéto, savó kerélas manúš pe daja phuv.

² Sys čhudý Svénto Šátra: dre pérvo paš sys momolýtko (svietíl'niko) i skamínd svencononé marésa, davá štéto khardiape Svénto Štéto.

³ Pal javír šýrma sys javír paš dre Svénto Šátra, davá štéto khardiape Naj Sventedyr Štéto.

⁴ Odój sys suvnakunó altárjo, kaj xačkirenas lačhé-khandypnáskiri smóla, i Kovčegóskiro Mohtó/Mohtén (Jaščyko) zavietósa, savó sys občhudo suvnakása saré rigéndyr. Dro davá Svénto Mohtó sys suvnakunó čaró mannasa, Aronoskiro destó, savó vylienindia. I sys odój adiáke-pac' baruné tablicy, kaj sys vyčingirde zavietoskire priphenybená.

⁵ A uprál pe Kovčegóskiro Mohtó sys terdé slavákire xieruvimy. Jone začhakirenas péskire phakenca štéto, kaj gréhi otmekenaspe; ne kakaná nane dová časo te rakiras butýr pal davá.

⁶ Davá adiáke saró sys sčhudo: rašaja kažno mólo zadžanas dre pérvo Svénto Šátra te mangénpe Devléske, syr treindiá butý pir Zakóno,

⁷ a dre javír Svénto Šátra, saví sys andrál, zadžalas jekh Anglatunó Rašái, jékhvar dro berš, ratésa i sventoné dyibnasa pal manušéngire gréhi, savé jone kerdé pir péskiro nadžinyben.

⁸ Svénto Dúho (Fáno) sykavéla dalésa, so paka isyn pérvo Svénto Šátra, drom nane otčhakirdo dro Naj Sventedyr Štéto;

⁹ kadaja pérvo Svénto Šátra isyn sýrby primiéro (sykaibén), so kerélape dro amaró časo, dro savó janéna dáry, i svénta dyibená, savé na moginéna te kerén bidošakiresa kodolés, kon mangelape Devléske, syr trej pir Zakóno,

¹⁰ pal-dová so jone otlydžanaspe ke uphenybená, so saštý te xas, i so te p'jes, syr so te mores (te xalaves), ke amarí loč (plot'), lénde isyn zor ke/ žýko davá časo, paka Devél keréla nevó lado (poriadko).

¹¹ Ne Xristóso javdiá, syr Anglatunó Rašáj vaš lačhipén, savó javéla angíl barydyršone i fedydyršone šatrasa, saví kerdé na manušéngire vastá, i saví nane dalé svetoskiri, so isyn kerdó,

¹² i na buznéngire (kozlengire) i cielianténgire ratésa, a Péskire ratésa Jov zagijá jékhvar dro Naj Sventedyr Štéto, i doresciá viéčno vykinybén pal amaré gréhi.

¹³ Pal-dová so, kóli buznéngiro ci cielianténgiro rat i terné-recákiri (tjolkakiri) práska (pieplo), so kropinelape pe manušénde, savé isyn nažužo te kloninenpe patyvása Devléske, keréla žužása (čystonasa) léngiri loč,

¹⁴ to ci pe but butedýr vyžužakiréla amen Xristosóskiro rat, Savó pir viéčno Dúho (Fáno) jandiá Pes bidošákires, sob (kaj) te vyžužakirel amarí patýv mulé rendéndyr te dynarinás džidé Devléske?

¹⁵ I paldavá Xristóso jandiá Nevó Zavieto, sob (kaj) odolé manušá, savén Devél khardia ke Pe prikhardia, mogindlé te doresen viéčno štéto dro Bolybnáskiro Rajo, pal so Jov i dyjá lav. Léskiro meribén isyn sýrby vykinybén pal gréhi, savé kerdé manušá, kiéli phuranó zavieto rikirdia zor.

¹⁶ Kóli isyn zavieto, savó manúš jačkiréla javirénge paló (poslie) péskiro meribén, trej te dophenen, so kodová manúš myjá.

¹⁷ Pal-dová so zavieto féni javéla te rikirél zor paló (poslie) meribén, i davá zavieto nisó nane mol, paka isyn džidó manúš, savó sčhudia les.

¹⁸ Adiáke-pac' i pérvo zavieto na prilyjá zor bi ratéskiro.

¹⁹ I paldavá, kiéli Mójza phendiá saré priphenybená Zakonóstyr saré manušénge, jov lyjá cieliantengire i buznengiro (kozlengiro) rat paniésa, lolé balenca i isoposkire randienca, i kropindia lénca syr kokori lylvarí-svítko, adiáke-pac' i saré manušén.

²⁰ I phendiá: “Davá isyn rat zavietóskiro, ke savó Devél priphendiá tuménge te rikirenpe.”

²¹ I adiáke-pac' jov kropindia ratésa i šátra i saré khoré (sosudy), so trej te len, kiéli mangénape Devléske.

²² I nábut so na saró žužakirelape grehostyr ratésa, i bi rateskiro pročhuiben na otmekelape grého.

Hristosóskiro Svénto Dyibén Otmekéla Grehi

²³ Treindiá, sob (kaj) dová, so sys sozdynó pe phuv pir bolybnáskiri patrín (óbrazo), adiáke te žužakirelpe, a dová, so isyn Bolybnáskiro čačunés, trebinela fedýr svénta dyibená, syr kodolé.

²⁴ Pal-dová so Xristóso zagijá na dre Svénto Štéto, savó kerdé manušéngire vastá, i savó isyn patrín (kopija) dolé Štetoskiro, so isyn dro Bolybnáskiro Rajo. Jov zagijá dro Bolybnáskiro Rajo, sob (kaj) te terdjol pal aménde angíl Devléste:

²⁵ na vaš dová, sob (kaj) te janel Pes but móly, syr Judéngiro anglatunó rašáj zadžála dro Naj Sventedyr Štéto na péskire ratésa;

²⁶ tedy Xristosóske treindiá te menčynelpe kažno mólo, syr svéto sys sozdynó. Ne kakaná, jékhvar pe viekoskiro kónco (jagóro), Jov sykadiá Pes i otdyjá Pes syr svénto dyibén, sob (kaj) te otparuvel gréhi.

²⁷ I syr užakiréla manušés jékhvar te merél, a paló davá séndo;

²⁸ adiáke-pac' i Xristóso sys jékhvar jandlo syr svénto dyibén pal buté-manušéngire gréhi. Ne Jov javéla javír mólo ke odolé, savé drieván užakiréna Les te zrakhél len, ne na vaš dová, sob (kaj) te otmekél gréhi.