Юдэ́нгэ 6 - Biblija - Pe Baltitko Romani čib (Romanes) 2019

Zoraló Patiaibén

¹ Paldavá mekasa ame pérva lavá pal Xristosóste i javása te piridžas te pričhuvas zor ke dasavo sykliakiribén, savó trej vaš stalone devlytkonenge; ne ame na javása nevéstyr te sykliakiras pal dasavo džiibén, so janéla manušén ke meribén, a pal patiaibén dre Devléste;

² pal boldeipen, pal vastengiro čhuibén upré pe manušéste, pal otdžidiakiriben muléndyr i pal viéčno séndo.

³ I ame kerása davá, kóli javéla pe davá Devléskiri vólia.

⁴ Davá na moginéla (šašty) te javél vaš odolénge, konéske sys rosphendlo čačipén pal Devléste, i savé udžindlé Bolybnáskiro taláno (dáro), i doresné (dolyne) péskiri paš javire manušénca Sventoné Duhóstyr;

⁵ i savé udžindlé lačhipén Devléskire lavéstyr i viekoskiri zor, saví javéla angíl, kiéli Devél javéla te xulainél;

⁶ i savé mekné te patián; kadasaven manušén naštý nevéstyr te sykliakiras, sob (kaj) jone te riskirén péskiro džiibén ke Devél, pal-dová so jone sýrby nevéstyr primarena ke trušúl Devléskire Čhavés i otdena Les pe saben manušénge.

⁷ Devél bahtiakiréla dasaví phuv, saví léla paní bryšyndestyr i savjátyr giv barjola vaš odolé manušénge, kon keréla butý pe láte;

⁸ a kóli jekh xrústo suv'jénca (dylyny čar) i phusadýtko xrústo (ĥar') barjona pe daja phuv, tedy joj isyn nalačhi ni ke so, i Devél moginéla te prokošel la, a jag shačkiréla daja čar dro kónco (dro jagóro).

⁹ Dróga amaré, na dykhí pe davá, so ame rakirasa adiáke, ame patiása dre tuménde, so tumé san fedýr i pašyledýr ke dová, sob (kaj) Devél te zrakhél tumen.

¹⁰ Pal-dová so Devél nane napatiaibnaskiro i Jov na bistrela tumarí butý i patýv ke javír manušá, savé tumé kerdé vaš Léskiro lav, kiéli tumé pomoginenas (dénas vastá) i kakaná pomoginena devlytkonenge.

¹¹ Ame kamasa, sob (kaj) kažno manúš tuméndyr te patial xačkirdé ilésa ke kónco (ke jagóro),

¹² sob (kaj) tumé te na javén kirne-maséngiro, a tumé te kerén adiáke-pac', syr kodolé manušá, savé péskire patiaibnása i dlugone užakiribnasa doreséna dová, pal so Devél dyjá lav lénge.

Devléskiri Sovláh isyn Čačuný

¹³ Kiéli Devél dyjá lav Avraamóske, pal-dová so Jov na mogindiá ni pe konéste vučedýr Péstyr te sovlahal, tedy Jov sovlahadiá Kokoró pe Péste,

¹⁴ i phendiá: “Me, čačes, bahtiakirava Tut i Me dáva but but čhavén túke”;

¹⁵ a Avraámo užakirdia ĥará (dlúges) i doresciá dová, pal so Devél dyjá lav léske.

¹⁶ Manušá sovlahana pe vari-konéste, kon isyn baredýr léndyr i sovláh isyn sýrby dophenybén, so léske trej te spolninel i te čhuvél kónco (jagóro) pe saré léngire čingardá.

¹⁷ Paldavá Devél vykedyjá zoraledýr te sykavél Péskiri naparuibnýtko vólia te kerél ke kónco (ke jagóro) lav, so Jov dyjá odolé manušénge, savé prilyné Léskiro phendló lav, i Jov dophendia sovlahasa.

¹⁸ Devél kerdiá adiáke pir duj čačipená: Devél na paruvela phendló lav i na xohavela. Aménge, savé čhurdyjampe ke Jov te uhtylaspe pal nadiéia, so sys dyný aménge, javéla zoraló podyno vast (pomošš) te zrakhaspe.

¹⁹ Kadaja nadiéia podrikiréla amaró iló dre zor bidarakires i isyn sýrby jakrjo vaš di, savó rikiréla amen, i joj zadžála dro naj sventedyr štéto pal šýrma, dro Bolybnáskiro Rajo,

²⁰ odorík zagijá Isúso angíl aménde, i jaciá Anglatuné Rašása pe saré viéki, pir dasavo-pac' titulo, syr i Mielhisedeko.