Юдэ́нгэ 4 - Biblija - Pe Baltitko Romani čib (Romanes) 2019

Lav pal Štéto te Otkhinjon

¹ Paldavá, paka phendló lav aménge te zadžán pe doiá phuv te otkhinjon Lésa, na xasijá, tedy javása te rakhaspe, sob (kaj) te na javél adiáke, so vari-kon javdiá drieván koríg (póznes).

² Bahtalý zan (zvies') sys phendly aménge, adiáke-pac' syr i lénge, ne lénge doiá zan, saví jone šundlé, na jandiá ni savó lačhipén, pal-dová so jone na prilyné davá phenybén patiaibnása.

³ Ne ame, savé patiása, zadžasa pe doiá phuv te otkhinjovas Lésa, adiáke, syr Devél phendiá: “Me sovlahadjom dre Mirí xolý: “Jone nijékhvar na zadžána te otkhinjon Mánca’”, na dykhí pe dová, so Léskire butiá sys saré kerdé angíl dová, syr Jov sozdyjá svéto.

⁴ Paldavá Devél phendiá vari-kate dro Svénto Čhinybén pal eftáto (bitrinéngiro déšto) dyvés adiáke: “I otkhinyja Devél pe eftáto dyvés saré Péskire butiendyr”:

⁵ i nevéstyr isyn phendló: “Jone nijékhvar na zadžána te otkhinjon Mánca.”

⁶ Ne Devléskiro lav, savó Jov dyjá, jačélape, i vari-savé manušá zadžána te otkhinjon Lésa; a kodolé, savénge sys phendló lav pal Xristosóste, na zadžána, pal-dová so jone na kandyné, so phendiá Devél,

⁷ i Jov vykedéla nevó dyvés, savó Jov khardiá “adadyvés.” Paló (poslie) dová, syr progijá (nakhcia) but berš, Devél phendiá Davidóskire ušténca adiáke, syr Jov rakirdiá ĥaredyr: “Adadyvés, kiéli tumé šunéna Léskiri zan (glos), na pharjakiren péskire ile.”

⁸ Paldavá, kóli Isúso-Navino délas Devléskire manušénge te otkhinjon Devlésa, tedy Devél na rakirélas korigedýr (pozžedýr) pal javír dyvés.

⁹ Paldavá sávato (subóta) jačélape vaš Devléskire manušénge te otkhinjon.

¹⁰ Kóli vari-kon zadžála te otkhinjol Lésa, jov adiáke-pac' otkhinjola péskire butiátyr, syr Devél otkhinyja Péskire butiátyr.

¹¹ I paldavá javása ame te pričhuvas zor te kerás butýr, sob (kaj) aménge te zadžas te otkhinjovas Lésa, sob (kaj) pir dová-pac' primiéro (sykaibén) ame te na peras, syr odolé manušá, savé na kandyné.

¹² Devléskiro lav isyn džidó i pherdó zorjása, vostredyr (čolaledýr) liubone kurtalátyr, saví čhinela pe duj rigá, Devléskiro lav zadžála xor maškír iló i dúho (fáno), maškír kokalý i trušúl, kaj isyn dumo, i sendinela manušéngire réndy i mysli pe iló.

¹³ Nisó dro svéto, so Devél sozdyjá, nane ĥarado Devléstyr; ne saró isyn nango i bicialó angíl Léskire jakhá, angíl Konéste ame javása te otphenas pal saró.

Isúso isyn Naj Baredýr Rašáj

¹⁴ Pal-dová so aménde isyn sámo baredýr Anglatunó Rašáj Isúso, Devléskiro Čhavó, Savó progijá bolybén ke Devél, ame javása te rikiraspe zoralés pal amaró patiaibén.

¹⁵ Aménde isyn na adasavó anglatunó rašái, savó na moginéla te pomoginel (te podel vast) aménge dro amaró bizorjakiriben, ne Adasavó Anglatunó Rašái, Savó sys propatiakirdo dro saró, ne syr i ame, ne Savó na kerdiá grého.

¹⁶ Paldavá ame javása te džas pašyledýr muršypnasa ke Devléskiro trono, Kon déla bahtalypén, sob (kaj) te doresas tangipén i bahtalypén te pomoginas (te podas vast) jekh jekhéske.