Юдэ́нгэ 3 - Biblija - Pe Baltitko Romani čib (Romanes) 2019

Isúso isyn Baredýr Mojzastyr

¹ Paldavá, pšalále svénta, savén Devél adiáke-pac' prikhardia, dykhén pe Isusóste, Saves Devél bičhadiá te javél anglatuné Rašása pir amaró patiaibén,

² Savó isyn patiaibnýtko Odoléske, Kon čhudiá Les pe daja butý, syr i Mójza adiáke-pac' pir saró Devléskiro Kher.

³ Pal-dová so Léste sys baredýr sláva, syr Mojzaste, adiáke-pac' syr manušéste, savó čhudiá kher, kutiakirena (déna patýv) butýr, syr kokoró kher.

⁴ Pal-dová so kažno kher vari-savó manúš čhuvéla, a Kodová, Kon čhudiá saró, isyn Devél.

⁵ I Mójza sys čačunó dynári pir saró Devléskiro Kher vaš dophenybén pal dová, so trej te javél angíl;

⁶ a Xristóso syr Devléskiro Čhavó, sys Xuláj pir Léskiro kher; ame sam kokoré manušá Léskire kheréskire, kóli zoraló patiaibén i nadiéia, savjása ame šarasape, javéla aménde ke kónco (ke jagóro).

Otkhinyben vaš Devléskire Manušénde

⁷ Paldavá Svénto Dúho (Fáno) rakiréla: “Kóli adadyvés tumé šunéna Léskiri zan,

⁸ na otriskiren péskiro iló, syr da tumé ĥazdynépe pe Devléste, kiéli tumé sánas pe čhučí phuv;

⁹ kaj tumaré dadá propatiakirenas Man, mek jone i dykhné, so Me kerdjom štardešá berš.

¹⁰ Paldavá Me i xoliasyjom pe adalé manušénde i phendjom: ‘Saró časo jone xohavena pes dro péskiro iló, i jone na džinéna Miro drom’;

¹¹ paldavá Me sovlahadjom dre xolý: ‘Jone nijékhvar na zadžána dro Miro štéto te otkhinjon Mánca’.

¹² Pšalále, dykhén, sob (kaj) te na javél phut'kirdo iló ni dre konéste tuméndyr, savó na kandéla Devlés, sob (kaj) tumé te na otdžan džidé Devléstyr.

¹³ A podrikiren jekh jekhés so dyvés ke/žýko dová časo, paka saštý te rakirés “adadyvés”, sob (kaj) grého te na xohavél tumen i te na otriskirel tumaró iló.

¹⁴ Pal-dová so ame jačasape khetané Xristosósa, kóli zrakhasa dová zoraló patiaibén ke kónco (ke jagóro), so aménde sys angledýr.

¹⁵ Paldavá isyn phendló: “Kóli tumé adadyvés šunéna Léskiri zan, na otriskiren péskiro iló, syr tumaré dadá davá kerdé, kiéli ĥazdynépe pe Devléste”;

¹⁶ kon sys odolé manušá, so, kiéli šundlé, ĥazdynépe pe Devléste? Naúšto na saré léndyr vyginé Jegiptóstyr Mojzasa?

¹⁷ i pe konéste Devél sys xoliamó štardešá berš? Ci na pe odolénde, savé kerdé gréhi, i koneskire kokalý jačnépe te pasjon pe čhučí phuv?

¹⁸ I konéske Jov sovlahadiá, so jone na zadžána pe štéto te otkhinjon Lésa, naúšto na odolénge, kon na kandyjá Les?

¹⁹ I ame dykhasa, so jone na mogindlé te zadžán pe Léskiro štéto te otkhinjon, pal-dová so jone na patiandyné.