Юдэ́нгэ 2 - Biblija - Pe Baltitko Romani čib (Romanes) 2019

Baró Zrakhibén

¹ Paldavá aménge trej te rikiraspe drieván rakhunes ke dová, so rakiréna, sob (kaj) te na džan krig čačuné droméstyr.

² Pal-dová so, kóli lav, savó Jangóly phendlé, isyn spolnindlo (kerdó ke kónco (ke jagóro)), i manušá doreséna kára pal dová, so jone kerdé proti Zakóno i pal dová, so jone na kandyné,

³ ne syr tedy ame mieninasa kára, kóli ame na prilasa ilésa dasavo baró zrakhibén, savó angledýr phendiá Devél, i dophendle aménge odolé, kon kokoró šundiá Léstyr;

⁴ so Devél i dophendia Péskire znamienijénca (ĥiertykénca), i divénca i kažnoné zor'jénca, i Sventoné Duhóskire talanenca, savó Jov délas manušénge pir Péskiri vólia.

⁵ Pal-dová so Devél na čhudiá Jangolenge telé tel ĥerá svéto, savó javéla, pal savó ame rakirasa:

⁶ ne vari-kon dophenelas vari-kate: “Kon adavá manúš isyn, so Tu ripiresa les? Ci so da dasavo manušéskiro čhavó isyn, so Tu dykhésa pal léste?

⁷ Tu les nábut tykniakirdian angíl Jangolende, tu proslavindian i kutiakirdian les, Tu čhudián xulása les pe dová, so Tyré vastá kerdé,

⁸ Tu čhudián saró telé tel léskire ĥerá. Kiéli Tu čhudián saró telé tel Léskire ĥerá te xulainél, tedy ničý na jaciápe, sob (kaj) te na javél léskiro. Ne ame iščo (inké) na dykhasa, sob (kaj) saró te javél léskiro”,

⁹ ne ame dykhasa Isusós, Saves Devél nábut tykniakirdia angíl Jangolende, i Savó isyn proslavindlo i kutiakirdo, pal-dová so Jov piridživdia mén'ki i meribén; Jov piridživdia meribén pal saré manušénde pir Devléskiro bahtalypén.

¹⁰ Pal-dová so, čačes, treindiá, sob (kaj) Devél, Savó sozdyjá saró i duredýr rakhéla, te spolninel saró pir Léste pir Léskire mén'ki, Savó isyn Lydžaibnaskiro, sob (kaj) te janel sarén te zrakhenpe.

¹¹ Pal-dová so Odová, Kon otmekéla manušéngire gréhi, i odolé, savénge Jov otmekciá gréhi, saré isyn Dadéskire čhavé, paldavá Isusóske nane ladžavo te kharel len pšalénca;

¹² i Jov rakiréla: “Me javáva te phenáv zan pal Tyró lav Miré pšalénge, i Me javáva te bagáv šardýtko gilý Túke maškír sarénde dre Khangirí.”

¹³ I iščo (inké): “Me javáva te patiav zoralés dre Léste. I iščo (inké): “Ĥáda, Miré čhavé isyn, savén Devél dyjá Mánge.”

¹⁴ Pal-dová, so syr saré-manušéngire čhavénde isyn rat i loč (plot'), adiáke-pac' i Jov prilyjá saró, syr manúš, kiéli bijándyja, sob (kaj) pir Péskiro meribén Jov mogindiá te xasiakirél nalačheskiri zor pe meribén;

¹⁵ i te del vólia sarénge kodolénge, savé darándyne meribnástyr i sys pishárja angíl meribén saró péskiro džiibén.

¹⁶ Pal-dová so isyn bicialó, so Jov pomoginela na Jangolenge, a Avraamóskire rodóske.

¹⁷ Vaš davá Xristosóske treindiá te javél adasavó-pac', syr Léskire pšála, sob (kaj) jov te javél lačhé-iléskiro i čačunó Anglatunó Rašáj te dynarinél angíl Devléste, sob (kaj) Jov te otmekél manušéngire gréhi;

¹⁸ pal-dová so, syr Jov kokoró menčindiape i nálačho propatiakirelas Les, to Jov kakaná moginéla te pomoginel odolénge, konés propatiakirena.