Юдэ́нгэ 1 - Biblija - Pe Baltitko Romani čib (Romanes) 2019

Devléskiro Lav Pir Léskire Čhavéste

¹ Devél na jékhvar i pir saró ĥarým-ĥará (vágo) rakirdiá amaré pradadenge pir prorokénde,

² a dre dalé palatuné (posliednia) dyvesá Jov rakirdiá aménge pir Péskire Čhavéste, Saves čhudiá xulása te prilel Léstyr saró, i pir Savéste Jov sozdyjá svéto (lot):

³ a Čhavó, Savó ziainela Dadéskire slavása, sykavéla Pésa čačipén pal Devléste, i rikiréla Péskire zoralé lavésa saró svéto, i kiéli Jov vyžužakirdiá saré amaré gréhi, tedy besciá pir čačí rig Devléskire Baripnastyr dro Bolybnáskiro Rajo.

Devléskiro Čhavó isyn Baró

⁴ Jov jaciá pe adákicy fedýr Jangolendyr, pe kicý lav, savó Jov prilyjá Dadéstyr, isyn naj fededýr lengirendyr.

⁵ Pal-dová so nikonéske iščo (inké) Jangolendyr na phendiá Devél: “Tu san Miro Čhavó, adadyvés me jacjom Tyré Dadésa (Tyró Dad).” Ci: “Me javáva Léske Dad, i Jov javéla Čhavó Mánge”?

⁶ adiáke-pac', kiéli Jov nevéstyr (nevés) janelas Péskire Pervoné Čhavés, so lathiape pe svéto, Devél rakirélas: “I mek saré Devléskire Jangóly te kloninenpe (te keren šerésa) patyvása Léske.”

⁷ Pal Jangolende Jov rakiréla: “Jov kerdiá Péskire Jangolen te javén syr balvál i Péskire devlytkoné dynar'jén (slugen) te javén syr jag, so xačola”,

⁸ a pal Čhavéste: “Dévla, Tyró trono, isyn pe saré viéki i Tu kralinesa čačipnýtkes.

⁹ Túke pir iló čačipén i Túke isyn na pir iló dová, so isyn proti Zakóno, pal-dová so Devél, Tyró Devél dyjá patýv i rádyma Túke butýr, syr Tyré malénge (drugénge).”

¹⁰ I iščo (inké) phendiá Jov pal Čhavéste: “Tu, Rajo Dévla, angledýr saréstyr sozdyjan phuv, i bolybén, davá kerdé vastá Tyré.

¹¹ Jone xasjona, a Tu javésa te dživés, jone saré phurjona, syr upratuno uribén;

¹² i syr baró dykhlo Tu skrencynesa les i paruvesa pe nevó, ne Tu javésa adasavó-pac' i Tyré beršenge na javéla nijékhvar kónco (jagóro).”

¹³ Kiéli konéske Jangolendyr Devél phendiá: “Beš pe čačó vast Mándyr, paka Me čhuváva vergén tyrén tel ĥerá tyré.”

¹⁴ Ci jone isyn na saré dúhi, kadalé Jangóly, savé dynarinena (služynena) odolénge, kon doreséla péskiri paš dro zrakhibén.